Yesaia 38 - ŊMALƐ KRƆŊKRƆŊ LƐ

Maŋtsɛ Hezekia he ye

¹ Nakai be lɛ mli lɛ, hela mɔ̃ Maŋtsɛ Hezekia, ni eehe egbo. Gbalɔ Yesaia, Amoz bi lɛ, tee eyasara lɛ, ni ekɛɛ lɛ akɛ, “Bɔ ni Yehowa kɛɛ nɛ, ‘Too owe lɛ he gbɛjianɔ, ejaakɛ oyi naŋ wala; obaagbo.’ ”

² Kɛkɛ ni Hezekia tsɔ̃ ehiɛ eha gbogbo lɛ, ni esɔle ekpa Yehowa fai,

³ ni ekɛɛ akɛ, “Ao Yehowa, miikpa bo fai, kaimɔ bɔ ni misɔmɔ bo kɛ anɔkwa kɛ mitsuiŋ fɛɛ, ni mifee nɔ ni hi yɛ ohiɛ!” Kɛkɛ ni Hezekia fo blobloblo.

⁴ Kɛkɛ ni Yehowa kɛɛ Yesaia akɛ,

⁵ “Yaa koni oyakɛɛ Hezekia akɛ, ‘Bɔ ni Yehowa, otsɛ David Nyɔŋmɔ lɛ, kɛɛ nɛ: Minu ofaikpamɔ lɛ, ni mina oyaafo lɛ; maŋɔ afii nyɔŋma kɛ enumɔ mafata owala be lɛ he.

⁶ Asaŋ mahere bo kɛ nɛkɛ maŋ nɛɛ fɛɛ yiwala kɛjɛ Asiria maŋtsɛ lɛ dɛŋ. Ni mabu maŋ nɛɛ he.’ ”

²¹ Yesaia kɛɛ Maŋtsɛ Hezekia akɛ eŋɔ agbãmi ni awiɛ eto esane lɛ nɔ, ni ehe baawa lɛ,

²² Maŋtsɛ Hezekia bi Yesaia akɛ, “Mɛɛ okadi tsɔ̃ɔ akɛ manyɛ maya Yehowa we lɛ ekoŋŋ?”

⁷ “Enɛ ji okadi ni tsɔ̃ɔ bo akɛ mibafee nii ni mikɛɛ lɛ.

⁸ Naa, mibahã atrakpoi lɛ asusuma ni hulu ni nyɔɔ shi hãa ebakãa atswere ni Maŋtsɛ Ahaz tswa lɛ nɔ lɛ atsi kɛya sɛɛsɛɛ nanefaamɔi nyɔŋma.” Kɛkɛ ni susuma lɛ tsi kɛtee sɛɛ nanefaamɔi nyɔŋma.

⁹ Be ni Yuda Maŋtsɛ Hezekia he eye, ni ehe ewa lɛ sɛɛ lɛ, eŋma yijiemɔ lala nɛɛ:

¹⁰ Misusu akɛ miwala teŋ tuuŋtu lɛ, mashi kɛya gbohiiaje agboi lɛ anaa, mayaye mifii ni eshwɛ lɛ yɛ jɛi.

¹¹ Misusu akɛ minaŋ Yehowa dɔŋŋ yɛ hiɛkãalɔi ashikpɔŋ lɛ nɔ. Minaŋ gbɔmɔ adesa ko hu dɔŋŋ yɛ jeŋ.

¹² Afo miwala sɛɛ tamɔ akpaa tookwɛlɔ buu ni ashi, tamɔ mamalolɔ kotaa ni efoɔ mama nɔ yɛ mamaloo tsɔne nɔ. Gbi kome jenamɔ lɛ miwala sɛɛ efo.

¹³ Mifo mitsɛ yelikɛbuamɔ nyɔɔŋnyɔɔŋ fɛɛ kɛyashi jetsɛremɔ. Ojwara miwui amli tamɔ jata, Ofo miwala sɛɛ gbi kome jenamɔ.

¹⁴ Mibolɔ tamɔ nyɔŋmɔbitɛte loo kpokukpoku; miye ŋkɔmɔ tamɔ okpo. Ŋwɛikwɛmɔ sɔŋŋ hã mihiŋmɛii shiu. Ao Yehowa, efĩ mi, daamɔ mli oha mi.

¹⁵ Te makɛɛ tɛŋŋ? Ejaakɛ ekɛ mi ewie; ni lɛ diɛŋtsɛ efee nɔ ni ba lɛ. Ehiii mi wɔɔ, ejaakɛ misusuma miiye awerɛhoo.

¹⁶ Ao Nuŋtsɔ, enɛɛmɛi anɔ adesai tsɔ̃ɔ amɛhiɔ shi; ni enɛɛmɛi fɛɛ amli mimumɔ yɔɔ. Ao tsa mi, ni oha miyi ana wala.

¹⁷ Naa, mijurɔyeli hewɔ jɛ ni mina hejaramɔ babaoo lɛ, Ojie miwala kɛje hiɛkpãtãmɔ mli, ejaakɛ osherɛ mihe eshai lɛ fɛɛ oshwie osɛɛ.

¹⁸ Gbohiiaje ejieŋ oyi, ni gbele hu kafoŋ bo; gbohii eŋɔŋ amɛhiɛ amɛfɔŋ onɔkwayeli lɛ nɔ.

¹⁹ Hiɛkãalɔi hɛɛ, hiɛkãalɔi moŋ ji mɛi ni jieɔ oyi, tamɔ bɔ ni mifeɔ ŋmɛnɛ nɛɛ. Tsɛmɛi ni hãa bii leɔ onɔkwayeli lɛ.

²⁰ Yehowa ohere miyiwala, ni no hewɔ lɛ, wɔkɛ saŋku aaala milalai lɛ, wɔwala gbii abɔ fɛɛ yɛ Yehowa we lɛ.