Yesaia 34 - ŊMALƐ KRƆŊKRƆŊ LƐ

Nyɔŋmɔ baagbala ehenyɛlɔi atoi

¹ Ao nyɛ majimaji, nyɛtsia nyɛbɛŋkɛa koni nyɛbaboa toi. Nyɛ shikpɔŋ lɛ nɔ bii, nyɛboa toi. Hã jeŋ muu lɛ kɛ emli nibii fɛɛ, je lɛ kɛ nii fɛɛ ni kwɛ̃ɔ yɛ mli afee toi.

² Ejaakɛ Yehowa mli efu majimaji lɛ fɛɛ; egri ewo amɛtai lɛ, ni ejɔɔ amɛ nɔ, ni eŋɔ amɛ eha koni akpãtã amɛhiɛ.

³ Abaashɛrɛ amɛgbohii lɛ ashwie, ni gbohii lɛ aaaje fu, ni amɛlá aaakpa gɔji lɛ anɔ kpɔtɔɔ.

⁴ Hulu kɛ nyɔɔŋtsere kɛ ŋulamii aaasere, ni aaakota ŋwɛi tamɔ wolo. Amɛtabilɔi lɛ fɛɛ aaatswiatswia shi tamɔ baa kpalaa yɛ waintso nɔ loo agbãmitso nɔ lɛ.

⁵ Yehowa esaa klante lɛ eto yɛ ŋwɛi. Naa, klante lɛ baayi Edom nɔ, maŋ ni ajɔɔ enɔ aha hiɛkpãtãmɔ lɛ.

⁶ Yehowa klante lɛ amɛlá kɛ fɔ ewu he kpɔtɔɔ; tamɔ too gwantɛŋi kɛ too kpakpoi alá kɛ agbɛnɛ ojwɛnii asabai ahe fɔ ni akɛshã afɔle. Ejaakɛ Yehowa miishã afɔle yɛ Bozra, ni ebaakpãtã wala hiɛ waa diɛŋtsɛ yɛ Edom.

⁷ Gbɔmɛi baanyɔnyɔi tamɔ wuoi kɛ tsina hii kɛ tsina ajebui. Lá baakpa amɛshikpɔŋ lɛ nɔ kpɔtɔɔ, ni amɛshikpɔŋ su baafee ŋɛlɛŋŋ kɛ fɔ.

⁸ Ejaakɛ Yehowa oweletɔɔ be lɛ ni, be ni ebaaye Zion sane lɛ ehã lɛ koni eto lɛ najiaŋ pɛpɛɛpɛ lɛ.

⁹ Edom fai lɛ baadi tuŋŋ tamɔ kootaa, ni eshikpɔŋ lɛ su aaatsɔ̃ tamɔ swɔɔ. Eshikpɔŋ tso muu aaatsɔ̃ tamɔ kootaa ni miitso.

¹⁰ Ebaatso nyɔɔŋnyɔɔŋ kɛ shwaneshwane fɛɛ, ni ebaaje lasu kɛya naanɔ. Shikpɔŋ lɛ aaatsɔ̃ amaŋfɔ̃ yinɔi fɛɛ; mɔ ko mɔ ko tsɔŋ jɛi kɛhoŋ dɔŋŋ kɛaatee naanɔ.

¹¹ Jɛi aaatsɔ̃ kpokukpokui kɛ kɔtɔkɔi agboshinii; ni patui kɛ kwãakwãalabitei aaahi jɛi. Yehowa baaha eshikpɔŋ lɛ agbo koni etsɔ̃ olɛŋlɛ, ni nɔ kpakpa ko ehiŋ nɔ.

¹² Aaawo jɛi akɛ, “Maŋnɔyeli bɛ”, ni akɛ emli lumɛi fɛɛ efeŋ fɛifɛi.

¹³ Ŋmei kɛ sansrɔ kɛ aŋlɛŋlɛ fɛɛ aaakwɛ̃kwɛ̃ɛ yɛ amɛmɔji lɛ kɛ amɛmaji ni atswa gbogbo awo amɛhe lɛ amli. Jɛi aaatsɔ̃ ŋaŋgbei ashihilɛhe kɛ dugumai hu ahilɛhe.

¹⁴ Ŋaŋ kooloi kɛ klãji aaabakpe yɛ jɛi, ni sasabonsami hu aaatsɛtsɛɛ amɛhe yɛ jɛi. Jɛi nɔŋŋ sisai aaaya koni amɛyatao hejɔɔmɔhe.

¹⁵ Patu aaafee etsu yɛ jɛi, eeeŋmɛ yɛ jɛi ni eeebu nɔ; eeefɛlɛ, ni eeebu ebii lɛ anɔ yɛ hɔ̃ɔŋ mli. Akromai aaayabua amɛhe naa yɛ jɛi ekomekome.

¹⁶ Nyɛtaoa yɛ Yehowa wolo lɛ mli koni nyɛkanea. Kooloi nɛɛ ateŋ ekome folo nɛkɛ eshwɛŋ ni eyaŋ jɛi, ni eko eko hefatalɔ ebɔŋ lɛ. Ejaakɛ eje Yehowa naa, ni efã, ni Emumɔ lɛ ji nɔ ni baabua amɛnaa.

¹⁷ Lɛ diɛŋtsɛ nɔŋŋ efɔ̃ shikpɔŋ lɛ nɔ oshiki eha amɛ. Shikpɔŋ lɛ baatsɔ̃ amɛgbɛfaŋnɔ kɛaatee naanɔ, ni amɛaahi nɔ yinɔi fɛɛ.