Yesaia 30 - ŊMALƐ KRƆŊKRƆŊ LƐ

Akɛ Ijipt kpãŋ yaka

¹ Yehowa kɛɛ akɛ, “Kpoo hã bii kaniŋkajelɔi ni yaa ajina ni mi, mibɛ mli, ni amɛkpãŋɔ kpãŋmɔi ni jeee mitsui naa yiŋtoi ni, ni amɛkɛfeɔ esha amɛshiɔ esha nɔ.

² Amɛyiŋ amɛtee Ijipt, be mli ni amɛbiii mi ŋaawoo, koni amɛyaba Ijipt maŋtsɛ abo koni amɛyatao teemɔhe yɛ Ijipt.

³ Shi Ijipt maŋtsɛ lɛ hewalɛ lɛ aaahã nyɛhiɛ agboi, ni Ijipt abo ni nyɛyaabɔ lɛ aaahã nyɛhiɛ agboi.

⁴ Ejaakɛ eyɛ mli akɛ amɛlumɛi lɛ eshɛ Zoan, ni amɛbɔfoi lɛ hu eshɛ Hanes, ni ji Ijipt maji wuji lɛ anɔ nɛ,

⁵ kɛ̃lɛ amɛ fɛɛ amɛhiɛ aaagboi yɛ maŋbii ni he bɛ sɛɛnamɔ ko hã amɛ lɛ hewɔ; amɛyeŋ amɛbuaŋ amɛ, ni amɛnaŋ amɛhe sɛɛ ko; shi hiɛgbele kɛ ahorabɔɔ moŋ amɛaana.”

⁶ Kooloi ni yɔɔ wuoyigbɛ shiaŋa lɛ mli lɛ ahe ninaa nɛ, “Amɛtsɔ̃ɔ haomɔ kɛ hejaramɔ shikpɔŋ lɛ nɔ, he ni jatayoo kɛ jatanuu hũuɔ yɛ, he ni shinɔ kɛ onufu filikilɔ yɔɔ lɛ, ni amɛloɔ amɛnii ni amɛna lɛ amɛtereɔ tejibii ni amɛkɛ amɛjwetrii tereɔ yoomai kɛyaa maŋ ko ni he bɛ sɛɛnamɔ kɛha amɛ lɛ ŋɔɔ.

⁷ Akɛni Ijipt dɛŋ yelikɛbuamɔ lɛ bɛ fɛifɛi, ni enyɛɛɛ nɔ ko nɔ ko etsu hewɔ lɛ, mitsɛɔ lɛ ‘Naafuutsɛ ni etĩii ehe.’ ”

Maŋbii toigbolɔi

⁸ Kɛkɛ ni Nyɔŋmɔ kɛɛ mi akɛ, “Agbɛnɛ yaa ni oyaŋma yɛ tɛi tɛtɛrɛbii anɔ yɛ amɛhiɛ, ni oŋma owo wolo mli koni ekã shi akɛ odaseyelinɔ ehã wɔsɛɛ be kɛya naanɔ.

⁹ Ejaakɛ gbɔmɛi atuatselɔi, bii amalelɔi ni amɛkpɛlɛ̃ɛɛ Yehowa toiboo ji amɛ.

¹⁰ Amɛkɛɔ ninalɔi lɛ akɛ, ‘Nyɛkanaa nii’ ni amɛkɛɔ gbalɔi lɛ hu akɛ, ‘Nyɛkagbaa anɔkwale gbalɛ nyɛtsɔa wɔ; shi moŋ nyɛkɛ wɔ awiea wiemɔi ni ŋɔɔ; nyɛgbaa shishiumɔ gbalɛi moŋ;

¹¹ nyɛshĩa gbɛ lɛ, nyɛgbaa afã kɛjea tɛmpɔŋ lɛ nɔ; nyɛ kɛ wɔ akawiea Israel Mɔ Krɔŋkrɔŋ lɛ he dɔŋŋ.’ ”

¹² No hewɔ lɛ, agbɛnɛ nɔ ni Israel Mɔ Krɔŋkrɔŋ lɛ kɛɔ nɛ, “Akɛni nyɛkwa wiemɔ nɛɛ, ni nyɛkɛ nyɛhiɛ fɔ̃ yiwalɛ kɛ kutumpɔo nɔ, asaŋ nyɛshwãa hu nyɛfɔɔ nɔ,

¹³ hewɔ lɛ nɔsha ni nyɛfee nɛɛ aaahã nyɛtsɔ̃ tamɔ gbogbo gojoo ni mli egba, ni ekpa, ni eehe egbee shi, ni trukaa hiŋmɛitswaa mli lɛ eeekumɔ eshwie shi.

¹⁴ Ekuumɔ lɛ aaafee tamɔ gbɛshɔ̃lɔ gbɛ ni ajwara lɛ wɔtsɔwɔtsɔ bɔ ni anaaa eŋɛsuko kome po nɛkɛ kɛkɛ yɛ ekoi lɛ amli ni aaanyɛ akɛje la yɛ latɛ mli, aloo akɛyɛ nu yɛ dudɔ mli tete.”

¹⁵ Bɔ ni Nuŋtsɔ Nyɔŋmɔ, Israel Mɔ Krɔŋkrɔŋ lɛ, kɛɔ nɛ, “Sɛɛkuu kɛbaa kɛ diŋŋfeemɔ mli nyɛyi aaana wala yɛ; kpoofeemɔ kɛ hiɛnɔkãmɔ mli nyɛhewalɛ yɔɔ. Shi moŋ nyɛkwa,

¹⁶ ni nyɛkɛɛ akɛ, ‘Dabida! Wɔɔtara okpɔŋɔi anɔ kɛjo foi.’ No hewɔ lɛ, foi kɛ̃ nyɛaajo. Ni nyɛkɛɛ hu akɛ ‘Wɔɔtara okpɔŋɔi ni foijee naa wa nɔ.’ No hewɔ lɛ, mɛi ni aaatiu nyɛ lɛ hu afoijee naa baawa.

¹⁷ Gbɔmɔ kometoo yiŋaa naa lɛ, mɛi akpe aaajo foi; nyɛ fɛɛ nyɛaajo foi kɛji mɛi enumɔ ŋa nyɛyi kɛyaashi beyinɔ ni aaashwɛ mɛi fioo tamɔ aflaŋaa tso ni ma gɔŋ yiteŋ, loo tamɔ aflaŋaa ni ma gɔŋkpɔ yiteŋ.

¹⁸ No hewɔ lɛ, Yehowa miimɛ koni eduro nyɛ, ni no hewɔ lɛ, efee kralo koni ena nyɛ mɔbɔ, ejaakɛ Yehowa lɛ Nyɔŋmɔ ni yeɔ jalɛ sane ni. Ajɔɔ mɛi fɛɛ ni hiɛ kã enɔ lɛ.”

Nyɔŋmɔ baajɔɔ emɛi lɛ

¹⁹ Ao nyɛ Zionbii ni nyɛyɔɔ Yerusalɛm, nyɛwoŋ yara nyɛfoŋ dɔŋŋ. Emusuŋ baatsɔ̃ lɛ yɛ nyɛhe kɛji nyɛbolɔ nyɛtsɛ lɛ. Kɛji enu blɔmɔ lɛ, eeehã nyɛ hetoo.

²⁰ Yɛ mli akɛ Nuŋtsɔ lɛ ehã amanehulu kɛ haomɔ eba nyɛnɔ moŋ nɛ, shi nyɛ-Tsɔɔlɔ lɛ eteŋ ehe dɔŋŋ, shi nyɛhiŋmɛii aaana nyɛ-Tsɔɔlɔ lɛ.

²¹ Ni ninejurɔgbɛ esa akɛ nyɛtsɔ jio, abɛkugbɛ esa akɛ nyɛtsɔ jio, nyɛtoii aaanu wiemɔ ko yɛ nyɛsɛɛgbɛ akɛ, “Gbɛ lɛ nɛ, nyɛyia nɔ!”

²² Kɛkɛ lɛ nyɛaabule nyɛmãgãi ni ashwie he jwiɛtɛi kɛ amãgãi ni ashwie he shika lɛ hu. Nyɛaashɛrɛ amɛ nyɛshwie tamɔ nibii ni ahe tseee; nyɛaakɛɛ akɛ, “Aloo amɛ ashwie kɛje wɔhiɛ.”

²³ Eeehã nu anɛ ashwie nyɛdumɔ wui ni nyɛdu lɛ nɔ, kɛ ŋmãa ni ekwɛ̃ lɛ nɔ, ni amɛaawo yibii babaoo. Nakai be lɛ mli lɛ, nyɛtsinai lɛ aaaye nii yɛ ŋa ni lɛɛ nɔ,

²⁴ ni nyɛtsinai kɛ tejii ni akɛhuɔ lɛ aaaye nii ni ŋoo yɔɔ mli, ní akɛ sofi kɛ ŋmɔshi faka esha mli.

²⁵ Ni gbi nɔ ni aaaplene gbɔmɛi babaoo, ni amɛmɔji lɛ aaagbeegbee shi lɛ, faa baaho yɛ gɔji grɔŋŋi fɛɛ kɛ gɔ̃ŋkpɔi ni kwɔlɔ fɛɛ anɔ.

²⁶ Ni nyɔɔŋtsere aaakpɛ tamɔ hulu tsoɔ, ni hulu aaatso bɔ ni etsoɔ daa lɛ toi kpawo, tamɔ gbii kpawo mli hulutsoo ni abua naa, gbi ni Yehowa aaafimɔ emaŋ lɛ pilamɔi anɔ, ni eeetsa faji ni ewo amɛ be ni etswia amɛ nii lɛ.

Nyɔŋmɔ baagbala Asiria toi

²⁷ Naa Yehowa hewalɛ jɛ shɔŋŋ miiba! Emlifu miitso, ni eeje lasu kpɔŋŋ; enaa miitswa afui kɛ mlila, ni elilɛi tamɔ la ni kpãtãa nii ahiɛ.

²⁸ Emumɔ ni emuɔ lɛ tamɔ faa ni eyi kɛbata kuɛ, ni ebaakpãtã maji ahiɛ koni ekɛsha amɛmli tamɔ akɛ shaanii shaa nii amli lɛ. Ebaawo majimaji lɛ adaaŋ manyoflɛ koni ekpala amɛ kɛya.

²⁹ Nyɛaala lala ko tamɔ bɔ ni alaa nyɔɔŋ kɛji aaye gbijurɔ krɔŋkrɔŋ ko lɛ. Kɛkɛ lɛ nyɛtsui aaayimɔ kɛ miishɛɛ tamɔ mɛi ni aakpã blɛ aahã amɛ, be mli ni amɛnyiɛ kɛyaa Yehowa, ni ji Israel Tɛsaa lɛ, we lɛ.

³⁰ Ni Yehowa aaahã anu enunyam gbee lɛ, ni eeehã ana ehewalɛ nine ni kpelekeɔ shi lɛ kɛ emlifu ni naa wa lɛ; la ni kpãtãa nii ahiɛ aaatso, ni atatui aaaflɛ, ni nu kɛ nyɔŋmɔŋtɛi aaanɛ.

³¹ Asiriabii aaayoyoro kɛji amɛnu Yehowa gbee lɛ, be ni ebaatswa amɛ nɔ kɛgbala amɛtoi lɛ.

³² Bɔ ni miji kɛ saŋkui agbɛɛmɔ nyiɛɔ lɛ, nakai Yehowa baatswa amɛ kpãa kɛgbala amɛtoi. Yehowa diɛŋtsɛ kɛ Asiriabii lɛ baawu.

³³ Ejaakɛ kɛjɛ jeeŋmɔ beebe ni asaa he ko ato kɛha Asiria maŋtsɛ lɛ shãa. Jɛi kwɔ, ni elɛɛ, ni eyi kɛ la kɛ lai babaoo. Ni Yehowa mumɔ ni emuɔ ni tamɔ la lɛ baama laii lɛ anaa la.