Yesaia 3 - ŊMALƐ KRƆŊKRƆŊ LƐ

Yerusalɛm yɛ basabasa

¹ Naa, Nuŋtsɔ Yehowa, Taiatsɛ lɛ, baajie mɔ fɛɛ mɔ kɛ nɔ fɛɛ nɔ ni Yerusalɛm kɛ Yuda kpasa akɛ sɛɛtso lɛ kɛya. Ebaajie amɛdaaŋ ŋmãa, ni ebaahã amɛye nuhɔmɔ.

² Ebaajie nuu ekãalɔ lɛ kɛ tabilɔ lɛ kɛ kojolɔ lɛ kɛ gbalɔ lɛ kɛ okɔmfo lɛ kɛ maŋ onukpa lɛ.

³ Ebaajie tabilɔi nyɔŋmai enumɔ nɔ asafoiatsɛ lɛ kɛ gbɛnaahiɛlɔ lɛ kɛ maŋ ajinafonyo lɛ. Ebaajie ashwãifeelɔ ni he esa lɛ kɛ ŋkunyaayelɔ ni he esa lɛ fɛɛ.

⁴ Mi Yehowa, mibahã gbekɛbii hii atsɔmɔ amɛnɔ lumɛi, ni fufɔbii baaye amɛnɔ.

⁵ Maŋbii lɛ aaawawaa amɛhe yi, mɔ fɛɛ mɔ baawa enyɛmi yi. Oblahii ebuŋ amɛnukpai, ni maŋ bii yakagbɔmɛi ebuŋ mɛi ni hiɛ yɔɔ nyam.

⁶ Be miiba, be ni tsɛmɛi awe bii baamɔ amɛteŋ mɔ kome, ni amɛaakɛɛ lɛ akɛ, “Anyɛmi, bo lɛ oyɛ hebo, no hewɔ lɛ, obaaye wɔlumɔ koni okwɛ wɔwe ni ekumɔ nɛɛ nɔ.”

⁷ Shi gbɔmɔ nɛɛ baakɛɛ yɛ nakai gbi lɛ nɔ akɛ, “Mibɛ niyenii loo hehaabo yɛ mishĩaŋ ni mikɛaanyɛ mikɛwa nyɛ. Nyɛkafea mi nyɛlumɔ.”

⁸ Ejaakɛ Yerusalɛm ejwa, ni Yuda hu egbee shi, ejaakɛ amɛdaaŋ wiemɔ kɛ amɛnifeemɔnii fɛɛ tsɔ̃ɔ akɛ amɛte shi amɛwo Yehowa, ni amɛhiɛ eshwieee ehiɛiaŋ tete.

⁹ Amɛmɛiahiɛiaŋkwɛmɔ baaye odase eshi amɛ. Eshai ni amɛfeɔ lɛ amɛkɛteee, shi moŋ amɛkɛshwãa tamɔ Sodom fee lɛ. Kpoo hã amɛ! Ejaakɛ amɛfee amɛ diɛŋtsɛ nɔŋŋ amɛhe efɔŋ.

¹⁰ Kɛɛmɔ jalɔi lɛ akɛ ebaahi ehã amɛ, ejaakɛ amɛbaaye amɛnifeemɔnii lɛ mli yibii.

¹¹ Shi kpoo ha efɔŋfeelɔ; ehiŋ ehaŋ lɛ, ejaakɛ nɔ ni ekɛfee mɛi krokomɛi lɛ, no nɔŋŋ akɛbaafee lɛ.

¹² Naa, shikafalɔi miiwa mimaŋbii lɛ ayi, ni amɛnyɔjiatsɛmɛi lɛ shishiuɔ amɛ. Ao! Miwebii, nyɛmaŋhiɛnyiɛlɔi lɛ miihã nyɛmiidu gbɛ, ni amɛmiihã nyɛnane miitɔ̃tɔ̃.

Yehowa kojo ewebii lɛ

¹³ Yehowa eho eta esɛi nɔ, ni ekɛ ewebii lɛ baaye sane.

¹⁴ Yehowa kɛ emaŋ onukpai kɛ maŋ lumɛi lɛ miikojo akɛ, “Nyɛ ji mɛi ni nyɛkpa waintrom lɛ mli nii ni nyɛye lɛ. Ohiafoi adɛŋ nibii ni nyɛhahaa lɛ yɛ nyɛshĩai lɛ amli.

¹⁵ Te nyɛjwɛŋɔ tɛŋŋ hewɔ ni nyɛmiaa mimaŋ lɛ, ni nyɛkɛ ohiafoi ahiɛ shwishwiaa shi nɛɛ lɛ? Mi, Nuŋtsɔ Nyɔŋmɔ, Taiatsɛ, miibi nyɛ!”

Abɔ Yerusalɛm yei lɛ kɔkɔ

¹⁶ Yehowa kɛɛ akɛ, “Yerusalɛm yei lɛ woɔ amɛhe, amɛtsĩaa kɛ amɛkuɛkuumɔ kɛ ahoshwibɔɔ hiŋmɛii kɛ amɛnanetalɔŋ gai ni miigbɛɛ.

¹⁷ Enɛ hewɔ lɛ, mi Yehowa, mibahã gbɛ̃i ashwie Yerusalɛm biyei ayiteiaŋ, ni ebaahã amɛyitsei ahe akpekpei, ni mi Yehowa, mahã amɛnyiɛ yayai.”

¹⁸ Nakai be lɛ Nuŋtsɔ lɛ aaakpɔlɔ amɛhewulamɔ nibii lɛ yɛ amɛhe nanetalɔŋ gai lɛ kɛ yifii dukui lɛ,

¹⁹ kɛ amɛkuɛnii lɛ kɛ kuɛnii kɛ enaa kpɔbii lɛ kɛ nineshinii lɛ kɛ dukui lɛ,

²⁰ kɛ yitsɔisaamɔ nibii lɛ kɛ nineshi gai kɛ mlifiinii lɛ kɛ ojeŋma tɔi lɛ kɛ sɛbɛi lɛ;

²¹ kɛ wolonaasɔomɔ waogai lɛ kɛ gugɔŋ gai lɛ,

²² kɛ afiyeli hewulamɔ atadei lɛ kɛ atadei wuyawuyai lɛ kɛ nɔhaa atadei lɛ kɛ kotokui bibiibii ni amɛhiɛɔ lɛ,

²³ kɛ atadei ni akɛ mama ni mli yɔɔ haŋŋhaŋŋ ekpɛ lɛ kɛ klala atadei lɛ kɛ bɔndukui lɛ kɛ hiɛhaanii lɛ.

²⁴ Amɛjeŋmai lɛ baatsɔ̃ nɔ ko ni jeɔ fu, amɛkɛ taŋkpee baafi amɛmli yɛ mlifiinii najiaŋ, ni yiteŋ ni ekpe aaabaye yi ni ahɔ najiaŋ, ni kpekpe aaabaye atade wuyaa najiaŋ, ni amɛhe fɛo lɛ baatsɔ̃ hiɛgbele nɔ.

²⁵ Omli hii lɛ baanyɔnyɔi yɛ klante naa, ni ohii kãkãlɔi lɛ hu yɛ ta mli.

²⁶ Maŋ lɛ agboi lɛ baaye ŋkɔmɔ kɛ awerɛho, ni maŋ lɛ diɛŋtsɛ baatsɔ̃ tamɔ yoo ni afee lɛ shwɛm ni eshwata shikpɔŋ.