Yesaia 29 - ŊMALƐ KRƆŊKRƆŊ LƐ

Yerusalɛm naagbee

¹ Ni Yehowa kɛɛ, “Kpoo hã Nyɔŋmɔ afɔleshãa latɛ ni ji Yerusalɛm diɛŋtsɛ lɛ. Kpoo hã maŋ he ni David kɛ etabilɔi lɛ to shi yɛ lɛ! Nyɛyea afi mli gbii juji lɛ pɛpɛɛpɛ; daa afi lɛ nyɛyea!

² Kɛ̃lɛ mi, Nyɔŋmɔ mahã hejaramɔ aba Yerusalɛm nɔ. Ŋkɔmɔyeli kɛ kɛ̃ɛmɔ aaaba maŋtso muu lɛ fɛɛ nɔ, ni Yerusalɛm baayi obɔ̃ kɛ lá tamɔ afɔleshãa latɛ ni lá ewu he kpɔtɔɔ.

³ Ni tamɔ bɔ ni David fee lɛ, mibatua bo, ni mibabɔle ohe kɛkpe, ni mibasa oyi, ni mibatswa kawoo gbogbo mabɔle ohe.

⁴ Kɛkɛ lɛ ooojɛ shikpɔŋ lɛ shishi tɔ̃ɔ owie; owiemɔi lɛ aaajɛ su mli agbɛɛ blɛoo; ogbee aaajɛ shikpɔŋ egbɛɛ tamɔ sisa gbee, ni obaawie ablɛbi kɛajɛ su mli.

⁵ “Ohenyɛlɔi gbɔi lɛ ayifalɛ aaatamɔ mlu, ni yiwalɔi lɛ aaafee tamɔ tutuu ni kɔɔyɔɔ tswaa. Ni trukaa, hiŋmɛitswaa mli lɛ,

⁶ Yehowa, Taiatsɛ lɛ, kɛ ŋwɛi shiimɔ kɛ shikpɔŋhosomɔ kɛ gbɛɛmɔ kpeteŋkple kɛ lasuogbele kɛ ahum kɛ la ni kpãtãa nii hiɛ aaakpɔ̃ bo.

⁷ Ni maji fɛɛ ni kɛ Nyɔŋmɔ maŋ he ni afɔleshãa latɛ lɛ mã lɛ wuɔ, ni mɛi fɛɛ ni ebatua lɛ kɛ emɔji ni amɛhaoɔ lɛ lɛ, asane lɛ aaatsɔ̃ tamɔ lamɔ̃, tamɔ nyɔɔŋ ninaa kɛkɛ.

⁸ Bɔ ni mɔ ni hɔmɔ miiye lɛ laa ni ena nii eeye, shi be ni ehiɛ aaatsɛ̃ lɛ hɔmɔ lɛ miiye lɛ lolo, aloo bɔ ni mɔ ni kumai miiye lɛ laa ni eenu nu, shi be ni ehiɛ aaatsɛ̃ lɛ efee gbedee, ni kumai lɛ miiye lɛ lolo lɛ, nakai maji fɛɛ ni kɛ Zion Gɔŋ lɛ wuɔ lɛ asane aaafee.

⁹ “Nyɛhãa nyɛhe ajɔ̃a nyɛhe, ni nyɛlua! Nyɛshwilaa nyɛhe koni nyɛtsɔ̃mɔa shwilafoi! Nyɛtɔrɔa dãa, shi jeee kɛ wain; nyɛdidãa, shi jeee kɛ dãa ni wa.

¹⁰ Ejaakɛ Yehowa ehã wɔ ni mli tsii mumɔ enyɔ nyɛnɔ. Nyɛ gbalɔi, Yehowa eŋamɔ nyɛhiŋmɛii; ni nyɛ ninalɔi, Yehowa kɛ nɔ̃ eha nyɛhiɛ.

¹¹ Enɛɛmɛi ahe ninaa lɛ etsɔ̃ tamɔ wolo ni asɔo naa mli wiemɔi eha nyɛ. Kɛji akɛ wolo lɛ hã mɔ ko ni eeenyɛ ekane, ni afã lɛ akɛ, ‘Kanemɔ’ lɛ, ebaakɛɛ akɛ, ‘Minyɛŋ, ejaakɛ asɔo naa.’

¹² Ni kɛji akɛ wolo lɛ hã mɔ ko ni nyɛŋ ekane, ni afã lɛ akɛ, ‘Kanemɔ wolo nɛɛ’ lɛ, ebaakɛɛ akɛ, ‘Minyɛŋ makane.’ ”

¹³ Kɛkɛ ni Nuŋtsɔ lɛ kɛɛ akɛ, “Akɛni maŋbii nɛɛ bɛŋkɛɔ mi kɛ amɛnaabu kɛkɛ, ni amɛkɛ amɛnaabu kɛkɛ woɔ mi, shi amɛtsui kɛ miteŋ jɛkɛ kwraa, ni jamɔ ni amɛjaa mi lɛ ejeee fɛifɛi fe wiemɔi ni amɛkase amɛwo amɛyitseiaŋ kɛkɛ amɛwieɔ

¹⁴ hewɔ lɛ, naa, mibafee naakpɛɛ nibii yɛ nɛkɛ maŋbii nɛɛ ahiɛ ekoŋŋ, ni amɛhe baajɔ̃ amɛhe. Amɛhii nilelɔi lɛ anilee lɛ baafee yaka, ni amɛhii hiɛtɛ̃lɔi lɛ ahiɛtɛ̃ɛ lɛ aaaŋmɛɛɛ amɛ.”

Wɔsɛɛ hiɛnɔkãmɔ

¹⁵ Kpoo hã mɛi ni kaa akɛ amɛkɛ amɛyiŋtoi aaatee Yehowa, ni amɛfeɔ dujiaŋnii, mɛi ni kɛɔ akɛ, “Namɔ naa wɔ?” loo “Namɔ le wɔ? lɛ!”

¹⁶ Nyɛtsɔ̃ɔ nibii ahiɛ nyɛbuɔ shi. Ani abaaŋɔ gbɛshɔ̃lɔ akɛ nishɔ̃ɔ su? Ani nɔ ko ni mɔ ko fee aaanyɛ ekɛɛ yɛ mɔ ni fee nɔ lɛ he akɛ, “Jeee lɛ efee mi!” lo? Aloo nɔ ko ni ashɔ̃ aaakɛɛ yɛ mɔ ni shɔ̃ nɔ lɛ he akɛ, “Eleee nɔ ko?”

¹⁷ Te etsɛŋ ni Lebanon koo lɛ baatsɔ ŋa nɔ humɔhe ni baa nii, ni aaaŋɔ ŋa nɔ humɔhe lɛ akɛ koo?

¹⁸ Nakai gbi lɛ nɔ lɛ, toimulɔi tete baanu wolo lɛ mli wiemɔi ni shwilafoi ahiŋmɛii anɔ ni ewo duŋ lɛ aaatse, ni amɛaana nii.

¹⁹ Humii baana miishɛɛ hee yɛ Yehowa hewɔ, ni ohiafoi amli aaafli amɛ yɛ Israel Mɔ Krɔŋkrɔŋ lɛ hewɔ.

²⁰ Ejaakɛ yiwalɔi aaatã, ni hefɛoyelɔi asɛɛ aaafo, ni mɛi fɛɛ ni shiɔ efɔŋfeemɔ he kpe lɛ, aaakpãtã amɛhiɛ,

²¹ mɛi ni hãa mɔ yeɔ fɔ yɛ saneyeli mli, kɛ mɛi ni tsɔ̃ɔ kojolɔ tsɔne yɛ koishi, kɛ mɛi ni wieɔ nɔ ni bɛ mli ni no hãa atsɔ̃ɔ mɔ ni sane ja sane hiɛ abuɔ shi lɛ.

²² No hewɔ lɛ, bɔ ni Yehowa mɔ ni kpɔ̃ Abraham lɛ kɛɔ yɛ Yakob we lɛ he nɛ, “Agbɛnɛ Yakob we lɛ hiɛ gboŋ dɔŋŋ, ni ehiɛ eshwieŋ shi dɔŋŋ.

²³ Ejaakɛ kɛji ena ebii lɛ, ni ji mininenaa nitsumɔnii lɛ yɛ amɛteŋ lɛ, amɛaakpɛlɛ̃ Yakob Mɔ Krɔŋkrɔŋ lɛ nɔ akɛ eyɛ krɔŋkrɔŋ lɛɛlɛŋ, ni amɛaashe Israel Nyɔŋmɔ lɛ gbeyei.

²⁴ Ni mɛi ni duɔ gbɛ yɛ mumɔ gbɛfaŋ lɛ aaana jwɛŋmɔ, ni mɛi ni wieɔ huhuuhu lɛ aaakase nii.”