Yesaia 27 - ŊMALƐ KRƆŊKRƆŊ LƐ

¹ Nakai gbi lɛ nɔ lɛ, Yehowa kɛ klante agbo ni naa ba ni wa hu baabamɔ Leviatan, onufu lɔgɔligi lɛ, ni eeegbe ogboole ni yɔɔ ŋshɔ lɛ mli lɛ.

² Nakai gbi lɛ nɔ lɛ, nyɛlaa yɛ waintrom fɛɛfɛo lɛ he nyɛkɛa akɛ,

³ “Mi, Yehowa, misaa mli; mishwieɔ enɔ nu be fɛɛ be. Mibuɔ ehe nyɔɔŋ kɛ shwane fɛɛ bɔ ni afee ni mɔ ko akafite emli nɔ ko.

⁴ Mimli fuko. Eji ŋmeii kɛ kpitikpitii baawo mi naagba kulɛ, mate shi mawo amɛ, ni mibashã fɛɛ tswɛm.

⁵ Kɛji miwebii ahenyɛlɔi lɛ miitao mihebuu lɛ, ja amɛbaba mi abo, ni amɛkɛ mi kpãtã. Hɛɛ! Ja amɛna amɛkɛ mi kpãtã!”

⁶ Wɔsɛɛ ko lɛ Israel aaatsɛ̃rɛ̃ fãi tamɔ tso, ni Israel aaagba afofro hu, ni eyibii aaayi jeŋ fɛɛ.

⁷ Ani Yehowa eyi Israel tamɔ eyi mɛi ni yi Israel lɛ? Aloo egbe Israel tamɔ egbe mɛi ni gbe Israel lɛ?

⁸ Okɛ amɛ ye bɔ ni ja gbɛ kɛtsɔ̃ amɛnomŋɔɔ nɔ. Yehowa kɛ kɔɔyɔɔ ni naa wa lɛ loo amɛ kɛtee be ni bokã kɔɔyɔɔ lɛ tswa lɛ.

⁹ No hewɔ lɛ, kɛji Yakob gbɛlɛ afɔleshãa latɛi lɛ amli tɛi lɛ munyɔmunyɔ tamɔ kaaloo tɛi ni afuflu, ni Ashera wɔŋkoi kɛ tsofakɛŋmashãa latɛi bɛ he ko he ko dɔŋŋ lɛ, no nɔ baatsɔ̃ ni akɛ Yakob tɔ̃mɔ lɛ baafa lɛ, ni no aaatsɔ̃ yibii ni etɔ̃mɔkɛfaa lɛ aaawo ahã lɛ.

¹⁰ Ejaakɛ maŋ ni atswa gbogbo awo he lɛ etsɔ̃ amaŋfɔ̃ kɛ shihilɛhe ni ashi afɔ shi ni akwa lɛ tamɔ shiaŋa. Tsinabii miiye nii yɛ jɛi; amɛbumɔɔ shi yɛ jɛi, ni amɛyeɔ nii.

¹¹ Kɛji emli tsei aniji lɛ gbi lɛ, akumɔɔ ni yei baa ni amɛbalɛɔ akɛ lai kɛyaa, ni amɛyashãa. Ejaakɛ amɛjeee maŋ ni nuɔ nii ashishi. No hewɔ lɛ, Nyɔŋmɔ, mɔ ni bɔ amɛ lɛ musuŋ etsɔŋ lɛ yɛ amɛhe, ni enaŋ amɛ mɔbɔ.

¹² Ao Israel, nakai gbi lɛ, Yehowa aaahala nyɛ ekomekome kɛjɛ Eufrate Faa lɛ naa kɛyaashi Ijipt husu lɛ nɔ, tamɔ mɔ ko ni miigbee ŋmãa.

¹³ Aaakpã tɛtɛrɛmantɛrɛ wulu ko nakai gbi lɛ, ni mɛi fɛɛ ni elaaje yɛ Asiria shikpɔŋ lɛ nɔ lɛ, kɛ mɛi ni ashwie amɛ kɛtee Ijipt shikpɔŋ lɛ nɔ lɛ aaaba, ni amɛaabaja Yehowa yɛ Gɔŋ Krɔŋkrɔŋ lɛ nɔ yɛ Yerusalɛm.