Yesaia 26 - ŊMALƐ KRƆŊKRƆŊ LƐ

Nyɔŋmɔ baahã emaŋ lɛ aye kunim

¹ Nakai gbi lɛ nɔ lɛ aaala lala nɛɛ yɛ Yuda shikpɔŋ lɛ nɔ akɛ, “Wɔmaŋ ni wa, Yehowa tswaa kunimyeli tamɔ gbogboi kɛ kawoohei ewoɔ he.

² Nyɛgbelea maŋ lɛ agboi lɛ koni maŋ ni emli bii feɔ jalɛnii asaŋ yeɔ anɔkwa lɛ abote mli.

³ Yehowa ohãa maŋ ni hiɛ kã onɔ lɛ naa toiŋjɔlɛ krɔŋŋ, ejaakɛ bo onɔ amɛhiɛkãa.

⁴ Nyɛkɛ nyɛhiɛ afɔa Yehowa nɔ daa ejaakɛ Yehowa, Nyɔŋmɔ lɛ, naanɔ tɛsaa ni.

⁵ Ejaakɛ eba mɛi ni tara hei grɔŋŋi lɛ ashi; ni maŋ ni kwɔ lɛ, eba lɛ shi, ni ekɛ shikpɔŋ eye egbɔ; ewo lɛ etswa mlu mli.

⁶ Mɛi ni aye amɛnɔ kɛ yiwalɛ lɛ, amɛmiinaanaa enɔ agbɛnɛ; ohiafoi miinaanaa enɔ.

⁷ Mɔ ni feɔ jalɛnii lɛ, egbɛ jaa hãa lɛ. Ao, Jalɔ Koome, ohãa jalɔ lɛ gbɛ lɛ nɔ feɔ trɛtrɛ hãa lɛ.

⁸ Yehowa, wɔmiikwɛ bo gbɛ yɛ okojomɔi lɛ amli; wɔmiishwe ogbɛ́i ni kaiɔ wɔ saji lɛ.

⁹ Nyɔɔŋ lɛ, misusuma shweɔ bo, mimumɔ ni yɔɔ mimli taoɔ bo kɛ hiɛdɔɔ. Ejaakɛ ojalɛ saneyeli yɛ shikpɔŋ lɛ nɔ, je lɛ mli bii kɛkaseɔ jalɛ nifeemɔ.

¹⁰ Kɛji ana efɔŋfeelɔi amɔbɔ lɛ, amɛkɛkaseee nɔ ni ja feemɔ; shi moŋ amɛyeɔ saji fɔ̃ji yɛ he ni afeɔ jalɛnii yɛ, ni enaaa Yehowa agbojee lɛ.

¹¹ Ao Yehowa, owo onine nɔ, shi kɛ̃lɛ amɛnaaa. Hã amɛna joomɔ ni ojoɔ yɛ omaŋbii ahe lɛ koni amɛhiɛ agboi. Hã la ni oto hã ohenyɛlɔi lɛ akpãtã amɛhiɛ.

¹² Ao Yehowa, oooha wɔna toiŋjɔlɛ ejaakɛ nitsumɔi fɛɛ ni wɔtsu lɛ, bo ji mɔ ni otsu.

¹³ Ao Yehowa, wɔNyɔŋmɔ, nuŋtsɔmɛi krokomɛi ebaye wɔnɔ kɛho; shi bo pɛ ogbɛi lɛ kɛkɛ wɔle.

¹⁴ Amɛgboi, ni amɛhiɛ etsɛ̃ŋ; amɛtsɔmɔ sisai ni eteŋ shi dɔŋŋ, ejaakɛ ogbala amɛtoi, ni okpãtã amɛhiɛ, ni akaiŋ amɛ dɔŋŋ.

¹⁵ Ao Yehowa, ohá maŋ lɛ eshwere, olɛɛ maŋ lɛ husui amli ni enɛ ewo ohiɛ nyam.

¹⁶ Ao Yehowa, amɛhejaramɔ mli lɛ, amɛtao osɛɛgbɛ; amɛsɔle amɛkpa bo fai be ni ogbalaa amɛtoi lɛ.

¹⁷ Ao Yehowa, bɔ ni yoo ni hiɛ musu kɛ̃mɔɔ ni ebolɔɔ yɛ enɔnaa lɛ mli kɛji fɔ̃mɔ eshɛ shi etã lɛ, nakai pɛpɛɛpɛ wɔyɔɔ yɛ ohiɛ nɛɛ.

¹⁸ Wɔhiɛ musu, ni wɔmiikɛ̃mɔ; wɔfɔɔɔ gbɔmɔ; shi wɔfɔ kɔɔyɔɔ. Wɔnyɛko shikpɔŋ lɛ yiwala wɔhere; wɔnyɛko nɔ ko wɔtsu.

¹⁹ Omɛi ni egboi lɛ ahiɛ aaatsɛ̃, ni amɛgbɔmɔtsei lɛ aaate shi. Ao nyɛ su mli bii, nyɛhiɛ atsɛ̃a, ni nyɛlaa kɛ miishɛɛ! Ejaakɛ obɔ ni nyɔɔ lɛ, bɔ ni kpɛlɛɔ ni, ni ooohã gbohii lɛ ate shi.

²⁰ Mimaŋbii, nyɛbaa! Mimaŋbii, nyɛbotea nyɛpiai lɛ amli, ni nyɛŋamɔa nyɛshinai lɛ nyɛwoa nyɛyi. Nyɛtea nyɛhe hiŋmɛitswaa fioo ko kɛyaashi Nyɔŋmɔ mlifu lɛ sɛɛ aaafo.

²¹ Ejaakɛ, naa, Yehowa miije kpo kɛmiijɛ eshihilɛhe lɛ koni ebagbala je lɛ mli bii atoi yɛ amɛnishaianii lɛ ahewɔ, ni shikpɔŋ lɛ aaajie lá shi ni ashwie yɛ enɔ lɛ etsɔ̃ɔ, ni ehaŋ mɛi ni agbe yɛ enɔ lɛ anɔ dɔŋŋ.”