Yesaia 24 - ŊMALƐ KRƆŊKRƆŊ LƐ

Yehowa baagbala Je lɛ toi

¹ Naa, Yehowa baakpãtã je lɛ hiɛ koni efee lɛ amaŋfɔ̃? Ebaatsɔ̃ je lɛ hiɛ ebu shi, ni ebaagbɛ enɔ bii lɛ eshwã.

² Bɔ ni abaafee maŋbii lɛ, nakai nɔŋŋ abaafee osɔfo lɛ; ni bɔ ni abaafee nyɔŋ lɛ, nakai nɔŋŋ abaafee enuŋtsɔ lɛ; bɔ ni abaafee weyoo lɛ, nakai nɔŋŋ abaafee ewula lɛ; ni bɔ ni abaafee nihelɔ lɛ, nakai nɔŋŋ aaafee nihɔɔlɔ lɛ; bɔ ni abaafee mɔ ni kɛ nii filiɔ lɛ, nakai nɔŋŋ aaafee mɔ ni filiɔ nii lɛ; ni bɔ ni abaafee mɔ ni ahiɛ lɛ nyɔmɔ lɛ, nakai nɔŋŋ aaafee mɔ ni hiɛ nyɔmɔ lɛ.

³ Abaakpãtã shikpɔŋ lɛ hiɛ butuu, ni abaashi lɛ shwɛm, ejaakɛ Yehowa ekɛɛ, ni ja ena eba mli.

⁴ Shikpɔŋ lɛ miigbi, ni eeŋala; je lɛ miigbede, ni eeŋala; ŋwɛi kɛ shikpɔŋ lɛ fɛɛ miigbede.

⁵ Shikpɔŋ lɛ nɔ bii lɛ ewo shikpɔŋ lɛ he muji, ejaakɛ amɛtɔ̃ mlai lɛ anɔ, ni amɛyeee akpɔi lɛ anɔ, ni amɛku naanɔ kpãŋmɔ lɛ mli.

⁶ No hewɔ lɛ, loomɔ miikpãtã shikpɔŋ lɛ hiɛ, ni enɔ bii miina nɔ yɛ amɛfɔyeli hewɔ. Enɛ ehã shikpɔŋ lɛ nɔ gbɔmɛi etã ni eshwɛ mɛi fioo ko kɛkɛ.

⁷ Wain tete miiye ŋkɔmɔ, ni waintso lɛ miigbi. Mɛi ni mli fili amɛ fɛɛ miiye ŋkɔmɔ.

⁸ Miji kɛ kpãa saŋkui agbɛɛmɔi kɛ nyamɔ lɛ ejɔ, ni mliflilɔi lɛ abolɔmɔ sɛɛ efo.

⁹ Wainnumɔ kɛ lala sɛɛ efo, ni dãa ni wa miijoo yɛ dãanulɔ daaŋ.

¹⁰ Maŋ kɛ emli basabasa nifeemɔ lɛ hiɛ ekpãtã; aŋamɔ emli shĩai fɛɛ ashinai koni mɔ ko akabote eko mli.

¹¹ Aabolɔ yɛ blohui lɛ amli yɛ wain hewɔ; miishɛɛ fɛɛ naa eba shi; afo miishɛɛ sɛɛ yɛ shikpɔŋ lɛ nɔ.

¹² Afee maŋ lɛ amaŋfɔ̃, ni akumɔ agboi lɛ amli dukuduku.

¹³ Nɔ ni baaba shikpɔŋ lɛ kɛ majimaji lɛ anɔ nɛ. Amɛaatsɔ̃ tamɔ mutso ni akpa enɔ yibii loo waintso ni akpa enɔ wainyibii atã.

¹⁴ Mɛi ni aaashwɛ lɛ aaahole amɛgbei anɔ amɛaala kɛ miishɛɛ. Mɛi aaajɛ anaigbɛ amɛbɔ oshe kɛkafo Yehowa agbojee,

¹⁵ No hewɔ lɛ, nyɛwoa Yehowa hiɛ nyam yɛ bokãgbɛ. Ŋshɔnaa maji, nyɛwoa Yehowa, Israel Nyɔŋmɔ lɛ, gbɛi lɛ hiɛ nyam.

¹⁶ Wɔmiinu yijiemɔ kɛ Jalɔ Koome lɛ hiɛ nyamwoo lalai kɛmiijɛ shikpɔŋ lɛ naagbeehei fɛɛ. Shi mi lɛ mikɛɛ akɛ, “Miitã loo! Miitã loo! Kpoo ha mi, ejaakɛ kutumpɔfoi miiye mihe kutumpɔo! Kutumpɔfoi miiye mihe kutumpɔo waa diɛŋtsɛ!

¹⁷ Ao shikpɔŋ lɛ nɔ bii, gbeyei nii kɛ bu ni atsa kɛ tsɔne ni atsɔ̃ miimɛ nyɛ!

¹⁸ Mɔ ni baajo foi kɛji anu gbeyei sane lɛ, ebaagbee bu lɛ mli; ni mɔ ni baakwɔ kɛje kpo yɛ bu lɛ mli lɛ, ebaadu tsɔne; ejaakɛ aaagbele ŋwɛi samfɛji lɛ, ni shikpɔŋ lɛ shishitoo lɛ aaahoso.

¹⁹ Shikpɔŋ lɛ ewule, shikpɔŋ lɛ egbala, shikpɔŋ lɛ ehoso waa diɛŋtsɛ.

²⁰ Shikpɔŋ lɛ baatsɔ̃ tamɔ dãatɔlɔ ni miididãa, ebaahoso tamɔ aboŋo yɛ ahum mli. Etɔmɔ lɛ tsii yɛ enɔ, ni ebaatsi lɛ egbee shi, ni eteŋ shi dɔŋŋ.

²¹ “Nakai gbi lɛ nɔ lɛ, Yehowa baagbala ŋwɛi asafo lɛ toi yɛ ŋwɛi, ni ebaagbala shikpɔŋ lɛ nɔ maŋtsɛmɛi lɛ hu atoi yɛ shikpɔŋ lɛ nɔ.

²² Abaabua amɛ fɛɛ amɛnaa awo bu ko mli tamɔ gboklɛfoi. Abaaŋa amɛyi awo gboklɛfoi atsu ko mli, ni be kplaŋŋ sɛɛ lɛ, abaagbala amɛtoi.

²³ Nyɔɔŋtsere kpɛŋ, ni hulu etsoŋ, ejaakɛ Yehowa, Taiatsɛ lɛ, baaye nɔ yɛ Zion Gɔŋ lɛ nɔ, yɛ Yerusalɛm, ni ebaajie enunyam lɛ kpo etsɔ̃ɔ maŋ lɛ mli onukpai lɛ.”