Yesaia 17 - ŊMALƐ KRƆŊKRƆŊ LƐ

Nyɔŋmɔ baagbala Siria kɛ Israel toi

¹ Damasko he gbalɛ nɛ, “Naa, abuŋ Damasko ashiŋ maji lɛ anɔ dɔŋŋ, shi ebaatsɔ̃ amaŋfɔ̃.

² Abaashi Siria maji lɛ ashwie shi kɛya naanɔ. Toi kɛ tsinai kɛ jɛi baafee amɛniyelihe, ni mɔ ko mɔ ko woŋ amɛhe gbeyei.

³ Mɔɔ ko mɔɔ ko ni wa eshwɛŋ yɛ Israel shikpɔŋ lɛ nɔ, ni Damasko yeŋ maŋ ko maŋ ko nɔ dɔŋŋ; ni mɛi ni baashwɛ yɛ Siria lɛ ahiɛ aaashwie shi tamɔ Israel. Mi Yehowa, Taiatsɛ lɛ, mikɛɛ.”

⁴ Yehowa kɛɛ, “Gbi miiba, ni nakai gbi lɛ Israel anunyam lɛ nɔ baagbɔ, ni eninamɔ ni ehã eshwi lɛ baatsɔ̃ ohia, ni ebaatã loo.

⁵ Israel baatsɔ̃ tamɔ ŋmɔ ni ŋmãakulɔ efolɔ emli abeletsei lɛ eshwie shi, ni eku amɛyi abele lɛ; ebaatsɔ̃ tamɔ Refaim Jɔɔ lɛ mli ŋmɔ ni aye emli ŋmãa kpɛkpɛo butuu.

⁶ Shi kɛ̃lɛ eeeshwɛ mɛi fioo yɛ Israel tamɔ bɔ ni kɛji ahoso mutso ni eshwɛɔ yibii enyɔ loo etɛ̃ kɛ̃ yɛ tso lɛ yiteŋ fɔfɔoo lɛ; loo bɔ ni eshwɛɔ yibii ejwɛ loo enumɔ oo ko yɛ aduawa tso ni ewo babaoo nɔ lɛ. Mi Yehowa, Israel Nyɔŋmɔ lɛ, mikɛɛ.”

⁷ Nakai gbi lɛ mɛi ahiɛ baasɔ amɛ-Bɔlɔ lɛ; ni amɛbaakwɛ Israel Mɔ Krɔŋkrɔŋ lɛ dɛŋ yelikɛbuamɔ gbɛ.

⁸ Amɛbuŋ afɔleshãa latɛi ni amɛkɛ amɛniji fee lɛ amɛhaŋ nɔ ko nɔ ko. Amɛkɛ nii ni amɛkɛ amɛ diɛŋtsɛ amɛniji fee tamɔ Asherim wɔŋkoi lɛ loo tsofakɛŋmashãa latɛi lɛ efeŋ nɔ ko nɔ ko dɔŋŋ.

⁹ Nakai gbi lɛ nɔ lɛ, amɛmaji ni he wa lɛ baatsɔ̃mɔ tamɔ maji ni Hivbii lɛ kɛ Amorbii lɛ jo foi shi ni amɛtsɔmɔ amaŋfɔ̃i be ni amɛjoɔ Israelbii lɛ anaa foi lɛ, ni nibii ahiɛ baakpãtã lɛ.

¹⁰ Israel, ohiɛ ekpa oyiwalaheremɔ Nyɔŋmɔ lɛ nɔ, ni okaiii obobaa Tɛsaa lɛ. No hewɔ lɛ, yɛ mli akɛ oootɛo tsei fɛɛfɛji, ni ooofee wɔŋkoo oha maŋsɛɛ wɔŋ,

¹¹ ni ooohã tsei nɛɛ ahere gbi nɔŋŋ ni otɛo amɛ lɛ, ni ooohã tsei nɛɛ agba afofro gbi leebi lɛ nɔŋŋ ni otɛo amɛ lɛ nɔ, shi nikpamɔ lɛ baaje odɛ̃ŋ, ni gbi lɛ aaatsɔ ŋkɔmɔyeli kɛ hejaramɔ ni naa wa gbi.

Aye Henyɛlɔi amaji anɔ

¹² Ao! Mɛi babaoo ahoofeemɔ nɛ; amɛhoofeemɔ lɛ miigbɛɛ tamɔ ŋshɔ! Ao! Maji ahoofeemɔ nɛ; amɛmiigbɛɛ tamɔ ŋshɔkei wuji agbɛɛmɔ.

¹³ Maji lɛ ahoofeemɔ lɛ tamɔ ŋshɔi agbɛɛmɔ, shi Nyɔŋmɔ aaaŋa amɛyi, ni amɛaajo foi kɛaatee sɛɛ shɔŋŋ, ni aaawo amɛ foi tamɔ gɔŋ nɔ tutuu yɛ lasuogbele mli.

¹⁴ Ni gbɛkɛnaashi lɛ aaahã ŋmiŋmi amɔmɔ mɛi, shi be ni je aaatsɛre lɛ anaŋ amɛ yɛ he ko he ko dɔŋŋ! Mɛi fɛɛ ni tswaa wɔ ojo kɛ mɛi fɛɛ ni haa wɔ nii lɛ, nɛkɛ ji bɔ ni amɛnaagbee aaatamɔ ahã.