Yesaia 15 - ŊMALƐ KRƆŊKRƆŊ LƐ

Nyɔŋmɔ baakpãtã Moab shikpɔŋ lɛ hiɛ

¹ Moab shikpɔŋ lɛ toigbalamɔ he gbalɛ nɛ: Akɛni akpãtã Ar maŋ lɛ hiɛ nyɔɔŋnyɔɔŋ kɛ jetsɛremɔ hewɔ lɛ, Moab bɛ nɔ ko mli dɔŋŋ. Ni Kir maŋ lɛ hiɛ ni akpãtã nyɔɔŋnyɔɔŋ kɛ jetsɛremɔ hewɔ lɛ Moab bɛ nɔ ko mli dɔŋŋ.

² Dibonbii lɛ ekwɔ kɛtee amɛwɔŋjamɔhei lɛ koni amɛyafo. Moabbii ewɔ lele yɛ Nebo kɛ Medeba maji lɛ ahewɔ. Amɛshɛ yi fɛɛ yi kɛ tsɛŋ fɛɛ tsɛŋ.

³ Amɛbumɔ kpekpe kɛnyiɛ blohuiaŋ, ni amɛwo lele kɛ yaafo tsoo yɛ tsui ayiteiaŋ kɛ jaji anɔ.

⁴ Heshbon kɛ Eleale majiaŋbii lɛ miibolɔ, ni aanu amɛgbee yɛ Yahaz tɔ̃ɔ. Moab tabilɔi lɛ miibolɔ waa; amɛyoyro.

⁵ Mitsui miiye miihã Moab. Emli foijelɔi eshɛ Zoar kɛ Eglat Shelishiya; mɛi kɛ yaafo miikwɔ kɛmiiya Luhit, ni mɛi hu ewo maŋ lɛ hiɛkpãtãmɔ lɛ he yara yɛ Horonaim gbɛjegbɛ lɛ nɔ.

⁶ Nimrim Faa lɛ egbi; jɛi jwɛi eŋala, ni jwɛfɔ bɛ he ko he ko, ni baa ŋmɔŋ hu bɛ he ko he ko.

⁷ No hewɔ lɛ, amɛtereteree nii babaoo ni amɛyɔɔ kɛ nii ni amɛtĩa fɛɛ kɛmiifo faa naa kpãi ajɔɔ lɛ kɛya.

⁸ Ejaakɛ Moab husui anaa fɛɛ lɛ yaafo sɔŋŋ. Yaafo lɛ shɛ Eglaim kɛ Beer-Elim tɔ̃ɔ,

⁹ ejaakɛ Dibon Faa lɛ eyi kɛ lá. Shi mibahã Dibon ana amanehulu ni naa wa fe nakai. Mɛi ni na foijee hegbɛ kɛje Moab lɛ kɛ mɛi ni eshwɛ yɛ shikpɔŋ lɛ nɔ lɛ, mibafã jata mawo amɛhe.