Yesaia 13 - ŊMALƐ KRƆŊKRƆŊ LƐ

Nyɔŋmɔ baagbala Babilon toi

¹ Babilon toigbalamɔ he gbalɛ ni Nyɔŋmɔ kɛtsɔ̃ Amoz bi Yesaia nɔ nɛ.

² Nyɛshĩa aflaŋaa yɛ gɔŋ kɛ eyiteŋ kpataa nɔ, nyɛbolɔa nyɛtsɛa amɛ, nyɛfɔa amɛ nine, koni amɛbabote lumɛi agboi amli.

³ Mi diɛŋtsɛ mifã mimɛi krɔŋkrɔŋi lɛ, ni ji mitabilɔi kakabãi lɛ, koni amɛkɛ mɛi ni nyaa kɛ hewoo lɛ aye yɛ mimlifu lɛ naa.

⁴ Nyɛboa toi! Aafee hoo yɛ gɔji lɛ anɔ tamɔ mɛi babaoo ahoofeemɔ. Naa jeŋ majimaji ni jɛ maŋtsɛyeli shikpɔji anɔ ahoofeemɔ ni; Yehowa, Taiatsɛ lɛ, miibua tabilɔi asafo naa kɛha tawuu.

⁵ Amɛjɛ shikpɔji ni yɔɔ shɔŋŋ yɛ jeŋ naagbeehei lɛ anɔ; Yehowa miiba kɛ mlifu kɛ tawuunii koni ebakpãtã je lɛ fɛɛ hiɛ.

⁶ Nyɛwɔa lele ejaakɛ gbi ni Yehowa to lɛ eshɛ shi etã. Akɛni niiahiɛkpãtãmɔ lɛ jɛ Ofe lɛ dɛŋ lɛ, ebaaba mli kɛ̃.

⁷ No hewɔ lɛ, mɔ fɛɛ mɔ niji baagboi yɛ ehe, gbɔmɛi adesai fɛɛ atsuii baafã,

⁸ ni amɛbaajijaa; ŋmiŋmi baamɔmɔ amɛ, ni amɛbaababla shi tamɔ yoo ni miikɔmɔ; amɛaakwɛkwɛɛ amɛhiɛiaŋ kɛ naakpɛɛ, ni amɛhiŋmɛii aaatsu tamɔ lá.

⁹ Naa, gbi ni Yehowa eto lɛ miiba. Gbi lɛ baafee yiwalɛ gbi ni jɛ mlila kɛ mlifu ni naa wa mli. Ebaaha je lɛ atsɔ̃ amaŋfɔ̃, ni aaakpãtã emli eshafeelɔi lɛ ahiɛ kɛje je lɛ mli.

¹⁰ Ejaakɛ gbi lɛ ŋulamii krokomɛi lɛ kɛ oŋwɛ̃i fɛɛ kpɛŋ, ni hulushitee mli tɔ̃ɔ lɛ, ehiɛ aaawo duŋ, ni nyɔɔŋtsere hu kpɛŋ.

¹¹ Mibagbala je lɛ toi yɛ emli nifɔɔjianii hewɔ, ni mibagbala mɛi fɔ̃ji atoi yɛ amɛnɔshai lɛ ahewɔ. Mibaha hewolɔi ahetsɔ̃ɔmɔ lɛ sɛɛ afo, ni mibaba yiwalɔi ahenɔwomɔ lɛ shi.

¹² Mibahã gbɔmɔ adesa he asɛ̃ fe shika ŋmiiŋmi; adesa he baasɛ̃ fe Ofir shika ŋmiiŋmi.

¹³ No hewɔ lɛ, Yehowa, Taiatsɛ lɛ, mlifu ni naa wa lɛ gbi lɛ nɔ lɛ, yɛ emlila naa lɛ, ebaahã ŋwɛi he akpokpo, ni shikpɔŋ lɛ aaakpokpo kɛjɛ egbɛhe.

¹⁴ “Gbɔmɔ adesa baatsɔ tamɔ soŋai ni afã lɛ, loo tamɔ too gwantɛŋi ni mɔ ko bɛ ni buaa amɛnaa. Ni no hewɔ lɛ, mɛi fɛɛ aaaku amɛsɛɛ kɛya amɛmaŋbii aŋɔɔ, ni mɔ fɛɛ mɔ baawo foi kɛya lɛ diɛŋtsɛ eshikpɔŋ nɔ.

¹⁵ Mɔ fɛɛ mɔ ni aaana lɛ lɛ, aaatsu lɛ nɔ, ni mɔ fɛɛ mɔ ni aaamɔ lɛ lɛ, eeenyɔ yɛ klante naa.

¹⁶ Amɛmiikwɛ nɛkɛ nɔŋŋ ni aaaŋɔ amɛbii atswia shi yɛ amɛhiɛ, ni amɛshĩa lɛ, aaahahaa amɛmli nii, ni amɛŋamɛi lɛ abaato amɛ kabonaa.”

¹⁷ Yehowa kɛɛ akɛ, “Naa, miitee Midiabii ashi mawo Babilon. Amɛ lɛ amɛbuuu jwiɛtɛi, ni shika ekɔ̃ɔ amɛhiɛ.

¹⁸ Amɛgãii baagbe oblahii lɛ, amɛmusuŋ etsɔŋ amɛ yɛ bii ni yɔɔ musuŋ tete he, ni amɛnaŋ gbekɛbii mɔbɔ.

¹⁹ Babilon, maŋtsɛyelii amli oje lɛ ni ji Babilonbii anunyam kɛ shwãanii lɛ, baatsɔ tamɔ Sodom kɛ Gomora be ni Nyɔŋmɔ butu amɛ lɛ.

²⁰ Mɔ ko mɔ ko ehiŋ jɛi kɔkɔɔkɔ dɔŋŋ, asaŋ akɛ jɛi efeŋ shihilɛhe yɛ yinɔ ko yinɔ ko nɔ dɔŋŋ. Arabnyo ko eshiŋ ebuu yɛ jɛi lɛ, tookwɛlɔ ko kɛ etoi eyaŋ niyeli yɛ jɛi.

²¹ Jɛi aaatsɔ̃ ŋaŋ kooloi ashibumɔhe, ni tsui ni yɔɔ jɛi aaayimɔ obɔ̃bɔ̃ kɛ patui. Dugumai kɛ jɛi aaafee amɛshihilɛhe, ni sasabonsami aaajo kɛnyiɛ jɛi.

²² Klãji aaabolɔ yɛ emaŋtsɛmɛi ashĩai fɛɛfɛji lɛ amli. Babilon be lɛ eshɛ etã; atsiŋ ebe lɛ kɛyaŋ sɛɛ ahaŋ lɛ.”