Yeremia 9 - ŊMALƐ KRƆŊKRƆŊ LƐ

¹ Mina ni kulɛ miyitso lɛ nubu ni; ni mihiŋmɛii hu nuhiŋmɛii ni koni mikɛfo mimaŋbii ni enyɔnyɔi lɛ shwane kɛ nyɔɔŋ fɛɛ.

² Mina ni kulɛ miyɛ gbɛnyiɛlɔi atoohe yɛ shiaŋa lɛ nɔ he ko, koni mashi mimaŋbii ateŋ maya jɛi. Ejaakɛ amɛ fɛɛ lɛ gbãlãfitelɔi ji amɛ; kutumpɔfoi asafo ji amɛ.

³ Amɛlilɛi edɔrɔ tamɔ gãitso; amale ehe shi waa yɛ shikpɔŋ lɛ nɔ fe anɔkwayeli moŋ. “Amɛjɛɔ nɔ fɔŋ kome he kɛyaa ekroko he, ni amɛleee mi po.” Yehowa kɛɛ.

⁴ Mɔ fɛɛ mɔ akwɛ ehe ni ahi yɛ enaanyo hewɔ; mɔ ko kɛ ehe akafɔ̃ enyɛmi nɔ, ejaakɛ mɔ fɛɛ mɔ etsɔ̃ ehe shishiulɔ, ni naanyo fɛɛ naanyo etsɔ̃ mɔ he oshekuyelɔ.

⁵ Mɔ fɛɛ mɔ shishiuɔ enaanyo, ni mɔ ko mɔ ko kwraa ewieee anɔkwale; amɛtsɔ̃ɔ amɛlilɛi malemɔ; amɛfeɔ efɔŋ, ni amɛmiii tsuitsakemɔ.

⁶ Yiwalɛ kɛ shishiumɔnii ni amɛfeɔ nɔtoonɔtoo hewɔ lɛ, amɛkpɛlɛ̃ɛɛ akɛ amɛaale mi. Yehowa kɛɛ.

⁷ No hewɔ lɛ, bɔ ni Yehowa, Taiatsɛ lɛ, kɛɔ nɛ, “Naa, matsuu amɛhe koni maka amɛ yɛ la mli makwɛ, ejaakɛ mɛni dɔŋŋ manyɛ mafee yɛ miwebii nɛɛ ahewɔ?

⁸ Gãimlibi ni gbeɔ mɔ ji amɛlilɛi; kutumpɔo wiemɔ pɛ ele. Mɔ kɛ enaanyo wieɔ kɛ naajɔlɛ tsɛbelɛ ewo lɛ ka yɛ etsuiŋ.

⁹ Aso mikagbala amɛtoi yɛ enɛɛmɛi ahewɔ? Mikatɔ mihe owele yɛ maŋ ni tamɔ nɛkɛ nɔ lo? Mi, Yehowa, miibi.”

¹⁰ Kɛkɛ ni mikɛɛ akɛ, “Mawo yara mafo gɔji lɛ waa, ni maye ŋkɔmɔ yɛ ŋa nɔ kooloi aniyelihei lɛ ahewɔ, ejaakɛ jɛi fɛɛ eŋãla, ni mɔ ko tsɔ̃ɔɔ jɛi kɛhooo dɔŋŋ. Anuuu tsinai agbee yɛ jɛi; ni jwɛiaŋ loofɔji kɛ kooloi tete ejo foi kɛshi jɛi amɛtee.”

¹¹ Kɛkɛ ni Yehowa kɛɛ akɛ, “Mahã Yerusalɛm atsɔ̃ maŋ koikoi, ebaatsɔ̃ ŋaŋgbei ashihilɛhe. Yuda maji lɛ baatsɔ̃ amaŋfɔ̃ ni mɔ ko mɔ ko ehiŋ jɛi.”

¹² Kɛkɛ ni mibi akɛ, “Nuŋtsɔ mɛɛ hewɔ ni shikpɔŋ lɛ hiɛ ekpãtã, ni etsɔ̃ shiaŋa ni mɔ ko mɔ ko tsɔ̃ɔɔ nɔ kɛhooo nɛɛ? Namɔ ji nilelɔ ni aaanu enɛ shishi? Namɔ ji mɔ ni bo Yehowa ojie otsɔ̃ɔ lɛ, ni egba?”

¹³ Yehowa here nɔ akɛ, “Enɛ fɛɛ hewɔ ni mimɛi lɛ ekwa mimlai ni miwo amɛ lɛ; ni amɛbooo migbee toi, ni amɛfeee bɔ ni mikɛɛ amɛ lɛ.

¹⁴ Shi moŋ amɛkɛ kuɛŋtilɛ fee nɔ ni amɛ diɛŋtsɛ amɛsumɔɔ, ni amɛyaja Baal amãgã lɛ tamɔ bɔ ni amɛtsɛmɛi tsɔ̃ɔ amɛ akɛ amɛfee lɛ.”

¹⁵ No hewɔ lɛ, nɔ ni mi, Yehowa, Taiatsɛ kɛ Israel Nyɔŋmɔ lɛ kɛɔ ji enɛ, “Naa, mibalɛ nɛkɛ maŋ nɛɛ kɛ taatso, ni mahã amɛ nu ni ebɔɔ yɔɔ mli amɛnu.

¹⁶ Mibagbɛ amɛ mashwã maji anɔ, hei ni amɛ kɛ amɛtsɛmɛi lɛ tete leee; mahã henyɛlɔi afã klante kɛnyiɛ amɛsɛɛ kɛyashi beyinɔ ni maplenee amɛ kwraa.”

Yerusalɛm maŋbii bolɔ amɛtsɛ yelikɛbuamɔ

¹⁷ Yehowa, Taiatsɛ lɛ, kɛɛ akɛ, “Nyɛjwɛŋa sane lɛ he, ni nyɛtsɛa yarayei kɛbaa; nyɛtsua koni ayaŋɔa yei ni ahe esa kɛ yara nɔ lala kɛba.”

¹⁸ Maŋbii lɛ kɛɛ akɛ, “Nyɛhãa amɛhe afea oya ni amɛla yarafeemɔ lala yɛ wɔ wɔhewɔ, koni wɔhiŋmɛii afɔse yaafonu ashwie shi, ni wɔhiŋmɛinaatsɔi atsere kɛ yaafonu.”

¹⁹ Ejaakɛ wɔnu yaafo blɔmɔ kɛjɛ Zion akɛ, “Kwɛ bɔ ni akpãtã wɔhiɛ ahã. Ashwie wɔhiɛ shi naakpa, akɛ ahã wɔshi wɔshikpɔŋ lɛ nɔ ni akumɔ wɔshĩai lɛ fɛɛ.”

²⁰ Kɛkɛ ni mikɛɛ akɛ, “Awomɛi nyɛboa nɔ ni Yehowa kɛɔ toi, ni nyɛhãa ewiemɔ lɛ abotea nyɛtoiiaŋ. Nyɛtsɔ̃a nyɛbiyei lɛ yarawoo, ni mɔ fɛɛ mɔ atsɔ̃ɔ enaanyo yaafo lala.

²¹ Ejaakɛ gbele ekwɔ kɛtsɔ̃ samfɛji amli kɛbatua wɔ, ni ebote wɔmaŋtsɛ wei amli ebaplenee gbekɛbii yɛ gbɛjegbɛi lɛ anɔ, ni ekpãtã oblahii hu ahiɛ yɛ blohui amli.”

²² Nɔ ni Yehowa kɛɛ mikɛɛ nɛ, “Gbɔmɛi agbohii baajwere shi yɛ ŋa nɔ tamɔ tumo ni ashwã awo ŋmɔ mli, loo tamɔ ŋmaa nyaŋkui jwereɔ shi yɛ ŋmaakpalɔi asɛɛ, ni mɔ ko mɔ ko bɛ ni aaabua naa.

²³ Nilelɔ akashwã kɛmiifɔ̃ enilee nɔ. Hewalɔ hu akashwã kɛmiifɔ̃ ehewalɛ nɔ, ni niiatsɛ akashwã kɛmiifɔ̃ eninamɔ nɔ;

²⁴ shi mɔ ni shwãa lɛ, eshwã efɔ̃, enɛ moŋ nɔ; akɛ ele mi, ni enuɔ mi shishi, akɛ mi ji Yehowa ni misuɔmɔ sɛɛ efooo, ni miyeɔ jalɛ sane yɛ shikpɔŋ lɛ nɔ. Enɛɛmɛi ahe moŋ minyaa. Mi, Yehowa, mikɛɛ.”

²⁵ Yehowa kɛɛ akɛ, “Naa, be miiba ni mibagbala Israelbii ni efo ketia lɛ atoi ejaakɛ amɛtamɔ mɛi ni efoko ketia lɛ nɔŋŋ.

²⁶ Mibagbala Ijipt kɛ Yuda kɛ Edombii kɛ Amonbii kɛ Moabbii kɛ shiaŋa lɛ nɔ bii ni shɛɔ amɛyitsei ahe lɛ hu atoi, ejaakɛ maji nɛɛ fɛɛ lɛ foolɔi ni, ni Israelbii lɛ hu tsuiŋ foolɔi ji amɛ.”