Yeremia 8 - ŊMALƐ KRƆŊKRƆŊ LƐ

¹ Yehowa kɛɛ, “Nakai be lɛ mli lɛ, abaaloo Yuda maŋtsɛmɛi lɛ kɛ maŋ lumɛi lɛ kɛ osɔfoi lɛ kɛ gbalɔi lɛ kɛ Yerusalɛmbii akromɔbii fɛɛ awui yɛ amɛgbonyobui lɛ amli.

² Abaagbɛ wui nɛɛ amli aka hulu kɛ nyɔɔŋtsere kɛ ŋulamii, ni ji nibii ni amɛsumɔ ni amɛsɔ̃mɔ, ni no hewɔ lɛ, amɛyanyiɛ amɛsɛɛ ni amɛja amɛ lɛ. Abuaŋ amɛwui nɛɛ anaa, ni afuŋ hu; shi moŋ amɛbaatsɔ̃ tamɔ wamɔ yɛ tumo nɔ.

³ Jaku fɔŋ nɛɛ mli bii fɛɛ ni aaashwɛ yɛ hei fɛɛ ni mishwie amɛ kɛtee lɛ, amɛaashwe akɛ amɛgboi fe nɔ ni amɛaahi wala mli. Mi, Yehowa, Taiatsɛ mikɛɛ.”

Esha kɛ ehe toigbalamɔ

⁴ Kɛkɛ ni Yehowa kɛɛ mi akɛ mikɛɛ maŋbii lɛ akɛ, “Aso kɛji agbee shi lɛ, ateee shi? Aloo kɛji adu gbɛ lɛ akuuu sɛɛ?

⁵ Mɛni hewɔ mɔ, ni gbɔmɛi nɛɛ egba afã, ni amɛka jɛi kwraa nɛɛ? Amɛhiɛ shishiumɔ mli kpɛŋŋ, ni amɛkpɛlɛ̃ɛɛ kpalemɔ.

⁶ Mikɛ tsuishitoo bo amɛ toi; shi amɛwieee anɔkwale. Mɔ ko mɔ ko kwraa bɛ ni nifɔɔjianii ni efee lɛ edɔ lɛ, ni no ehã etsake etsui. Shi moŋ ekɛɔ akɛ, ‘Mɛni mifee?’ Mɔ fɛɛ mɔ ekɔ lɛ diɛŋtsɛ egbɛ tamɔ bɔ ni okpɔŋɔ shaa foi kitikiti kɛboteɔ ta mli lɛ.

⁷ Klitso ni ji loofɔlɔ ni yɔɔ ŋwɛi tete le be ni esa akɛ eku esɛɛ eba; nakai nɔŋŋ kosɛɛ okpo hu kɛ nyɔŋmɔbitɛte kɛ kpokukpoku fɛɛ le amɛbaabe; shi mimɛi lɛ leee mi, Yehowa, mimlai lɛ.

⁸ Te feɔ tɛŋŋ ni nyɛkɛɔ akɛ, ‘Wɔ lɛ wɔle nii, ni Yehowa mla lɛ yɛ wɔdɛŋ’ lɛ? Naa, woloŋmalɔi lɛ kɛ amɛmale niŋmaa ehã mla lɛ etsɔ̃ amale mla.

⁹ Nilelɔi nɛɛ abaawo amɛ hiɛgbele, amɛbaajijaa, ni abaaŋɔ amɛ nom, ejaakɛ amɛkwa Yehowa wiemɔ lɛ. Belɛ nɛgbɛ amɛnilee lɛ yɔɔ mɔ?

¹⁰ Enɛ hewɔ lɛ, maŋɔ amɛŋamɛi lɛ mahã mɛi krokomɛi; ni mikɛ amɛŋmɔji lɛ baahã mɛi ni baaye amɛnɔ kunim lɛ. Ejaakɛ kɛjɛ amɛteŋ mɔ bibioo nɔ kɛyashi mɔ wulu nɔ lɛ, amɛteŋ mɔ fɛɛ mɔ hiɛ joɔ; ni kɛjɛ gbalɔ nɔ kɛyashi osɔfo nɔ lɛ, amɛteŋ mɔ fɛɛ mɔ shishiuɔ mɔ.

¹¹ Amɛmiitsa mimaŋbii lɛ apilamɔ lɛ jabejabe ko kɛkɛ, ni amɛkɛɔ amɛ akɛ, ‘Omanye ei! Omanye!’ Be mli ni omanye ko kwraa bɛ.

¹² Ani kɛji amɛfee musubɔɔnii lɛ, efeɔ amɛ hiɛgbele? Dabida! Efeee amɛ hiɛgbele kome folo nɛkɛ, ejaakɛ amɛhiɛgbele tɔ ejwa. Be mli ni mibagbala amɛtoi lɛ, abaabutu amɛ, ni amɛbaafata mɛi ni baanyɔnyɔi lɛ ahe. Mi, Yehowa, mikɛɛ.”

¹³ Kɛkɛ ni Yehowa kɛɛ, “Be ni miba miwebii lɛ anaabuamɔ lɛ, amɛtsɔ̃ tamɔ waintsei ni wainyibii bɛ nɔ, loo agbãmi tsei ni agbãmi bɛ nɔ, ni amɛnɔ bai tete eŋãla; ni nii ni mikɛhã amɛ lɛ hu eje amɛdɛŋ.”

¹⁴ Nyɔŋmɔ webii lɛ kɛɛ akɛ, “Mɛɛba mɔ wɔtara shi nɛkɛ lolo? Nyɛbuaa nyɛhe naa; nyɛhãa wɔbotea maji ni atswa gbogboi awo amɛhe lɛ amli koni wɔhiɛ ayakpãtã yɛ jɛi; ejaakɛ Yehowa, wɔNyɔŋmɔ lɛ, eŋmɛɛ wɔhe ehã hiɛkpãtãmɔ, ehã wɔ nu ni awo mli ebɔɔ koni wɔnu, ejaakɛ wɔtɔ̃ Yehowa nɔ.

¹⁵ Wɔkwɛ toiŋjɔlɛ gbɛ, shi nɔ kpakpa ko baaa, wɔkwɛ tsamɔ gbɛ, shi naa, tsuifãa moŋ ni pue.

¹⁶ Anuɔ henyɛlɔi lɛ akpɔŋɔi lɛ atsinemɔ kɛjɛɔ Dan shikpɔŋ lɛ nɔ. Shikpɔŋ tso muu lɛ fɛɛ kpokpoɔ kɛji amɛkpɔŋɔhii lɛ bolɔ. Amɛmiiba amɛbakpãtã shikpɔŋ lɛ kɛ enɔ nibii fɛɛ ahiɛ, wɔmaŋ lɛ kɛ mɛi fɛɛ ni yɔɔ mli.”

¹⁷ Kɛkɛ ni Yehowa kɛɛ akɛ, “Ejaakɛ, naa, miiwo onufui agbɛ kɛba nyɛteŋ, ni ji blikai, ni ŋkunyaayeli ko ŋkunyaayeli ko nyɛɛɛ amɛhe ajɔɔ koni amɛbakɔ̃mɔ nyɛ.”

Yeremia ye emaŋbii ahe ŋkɔmɔ

¹⁸ Mikɔ̃ɔmɔ lɛ anyɛŋ atsa, mitsui ekumɔ yɛ mimli.

¹⁹ Naa, kɛjɛ shikpɔŋ lɛ nɔ hei fɛɛ, minuɔ mimaŋbii abolɔmɔ akɛ, “Ani Yehowa bɛ Zion lo? Zion maŋtsɛ lɛ bɛ Zion?” Yehowa, amɛmaŋtsɛ lɛ, to he akɛ, “Mɛɛba nyɛwo mi mlifu kɛ maŋsɛɛ amãgãi ni nyɛkotoɔ ni nyɛjaa lɛ?”

²⁰ Maŋbii lɛ bolɔ akɛ, “Nikpamɔbe lɛ eho, ni atse nii agbe naa, ni ahereko wɔyiwala.”

²¹ Mitsui ekumɔ yɛ mimli, yɛ mimaŋbii ahejaramɔ lɛ hewɔ. Miiye ŋkɔmɔ; mihe ejɔ̃ mihe.

²² Ani tsofa bɛ Gilead lo? Tsofatsɛmɛi bɛ jɛi lo? Mɛni hewɔ mɔ ni atsako mimaŋbii lɛ?