Yeremia 52 - ŊMALƐ KRƆŊKRƆŊ LƐ

Aŋɔ Yerusalɛm

¹ Zedekia eye afii nyɔŋmai enyɔ kɛ ekome be ni ebabɔ̃i maŋtsɛyeli lɛ; ni eye maŋtsɛ afii nyɔŋma kɛ ekome yɛ Yerusalɛm. Enyɛ gbɛi ji Hamutal, Yeremia ni jɛ Libna lɛ biyoo lɛ.

² Zedekia fee efɔŋ eshi Yehowa tamɔ bɔ ni Maŋtsɛ Yehoiakim fee lɛ pɛpɛɛpɛ.

³ Anɔkwa, akɛni Yehowa mli efu waa hewɔ lɛ, ekpoo Yerusalɛmbii kɛ Yudabii fɛɛ, ni eshwie amɛ kɛje ehiɛ. Zedekia tse Babilon maŋtsɛ lɛ hiɛ atua,

⁴ ni no hewɔ lɛ, Zedekia maŋtsɛyeli afi ni ji nɛɛhu lɛ nɔ nyɔŋ ni ji nyɔŋma lɛ nɔ gbi ni ji nyɔŋma lɛ nɔ lɛ, Babilon Maŋtsɛ Nebukadnezar fã kɛ etabilɔi fɛɛ kɛba, ni amɛbatua Yerusalɛm. Amɛsa Yerusalɛm maŋ lɛ yi, ni amɛtswatswaa kpokui amɛkɛbɔle Yerusalɛm kɛkpe.

⁵ Asa Yerusalɛm yi aahu kɛyashi Zedekia maŋtsɛyeli afi ni ji nyɔŋma kɛ ekome lɛ nɔ.

⁶ Afi nɛɛ nɔ nyɔŋ ni ji ejwɛ lɛ nɔ gbi ni ji nɛɛhu lɛ nɔ lɛ, hɔmɔ ni eba Yerusalɛm lɛ naa bawa bɔ sɔŋŋ ni maŋbii naaa nɔ ko nɔ ko amɛye.

⁷ Kɛkɛ ni agbu gbɛ awo maŋ gbogbo lɛ mli, ni maŋ lɛ mli hii tabilɔi lɛ fɛɛ jo foi kɛje maŋ lɛ mli nyɔɔŋ. Amɛtsɔ̃ agbo ko ni enaa kã maŋ lɛ he gbogboi enyɔ ni yɔɔ maŋtsɛ trom lɛ masɛi lɛ ateŋ lɛ mli, tsɛbelɛ Babilon tabilɔi lɛ ebɔle Yerusalɛm maŋ lɛ kɛkpe nɔŋŋ. Tabilɔi foijelɔi nɛɛ tsɔ̃ Yordan Jɔɔ lɛ mli gbɛ lɛ nɔ kɛtee.

⁸ Shi Babilon tabilɔi lɛ tiu Maŋtsɛ Zedekia. Amɛyanina lɛ yɛ Yeriko ŋa kplanaa lɛ nɔ, ni Zedekia tabilɔi lɛ fɛɛ gbɛ yɛ ehe amɛshwã.

⁹ Amɔ maŋtsɛ lɛ, ni akɛ lɛ bahã Babilon Maŋtsɛ Nebukadnezar yɛ Ribla, yɛ Hamat shikpɔŋ lɛ nɔ, ni ekojo Zedekia.

¹⁰ Babilon maŋtsɛ lɛ gbe Zedekia bihii lɛ yɛ ehiɛ; asaŋ egbe Yuda lumɛi lɛ hu fɛɛ yɛ Ribla.

¹¹ Enɛ sɛɛ lɛ Nebukadnezar hã afamɔ Maŋtsɛ Zedekia hiŋmɛii, ni ewo lɛ gboklɛ, ni ekpala lɛ kɛtee Babilon, ni eyawo lɛ tsuŋ yɛ jɛi kɛyashi Zedekia gbo.

Akumɔ Yerusalɛm Sɔlemɔ we lɛ

¹² Babilon Maŋtsɛ Nebukadnezar maŋtsɛyeli afi ni ji nyɔŋma kɛ nɛɛhu lɛ nɔ nyɔŋ ni ji enumɔ lɛ nɔ gbi ni ji nyɔŋma lɛ nɔ lɛ, Nebuzaradan ni ji Nebukadnezar hebulɔi ni sɔmɔɔ lɛ lɛ asafoiatsɛ lɛ bote Yerusalɛm maŋ lɛ mli,

¹³ ni eshã Yehowa Sɔlemɔ we lɛ kɛ maŋtsɛ we lɛ kɛ Yerusalɛm shĩai fɛɛ. Eshã shĩa wulu fɛɛ shĩa wulu,

¹⁴ ni Babilon tabilɔi ni fata maŋtsɛ hebulɔi asafoiatsɛ Nebuzaradan he lɛ kumɔ gbogboi fɛɛ ni bɔle Yerusalɛm he kɛkpe lɛ amɛshwie shi.

¹⁵ Nebuzaradan ŋɔ maŋbii lɛ ekomɛi nom kɛtee Babilon: ohiafoi kposakposai lɛ ateiaŋ mɛi komɛi, kɛ maŋbii ni shwɛ yɛ maŋ lɛ mli lɛ ekomɛi, kɛ tabilɔi ni amɛ diɛŋtsɛ amɛtee amɛkɛ amɛhe yahã Babilon maŋtsɛ lɛ, kɛ maŋ lɛ mli ŋaalɔi ni eshwɛ lɛ.

¹⁶ Shi Nebuzaradan, maŋtsɛ hebulɔi asafoiatsɛ lɛ, shi maŋ lɛ mli ohiafoi kposakposai lɛ ateŋ mɛi komɛi ni amɛtsɔmɔ waintrom mlisaalɔi kɛ okwaafoi.

¹⁷ Babilonbii lɛ kumɔ akɔɔble akulashiŋi ni yɔɔ Yehowa we lɛ, kɛ amɛshishi nibii ni amɛmamɔ nɔ lɛ, kɛ akɔɔble nutoo gbudugbaŋ wulu lɛ dukuduku, ni amɛloo akɔɔble lɛ fɛɛ kɛtee Babilon.

¹⁸ Amɛŋɔ kukwɛii lɛ kɛ sofii lɛ kɛ lajee tsɛnsii lɛ kɛ okpolui lɛ kɛ tsɛnsii ni akɛshãa tsofakɛŋma lɛ kɛ akɔɔble tsɛnsii krokomɛi fɛɛ ni akɛsɔ̃mɔɔ yɛ Sɔlemɔ we lɛ kɛtee.

¹⁹ Nebuzaradan loo nibii fɛɛ hu ni akɛ shika loo jwiɛtɛi fee lɛ hu kɛtee: enɛɛmɛi ji okpolui bibii lɛ kɛ lajee tsɛnsii lɛ kɛ tsɛnsii ni akɛsɔoɔ kooloi alá lɛ, kɛ kukwɛii kɛ kanetsei lɛ kɛ tsɛnsii ni akɛshãa tsofakɛŋma lɛ kɛ okpolui ni akɛshãa daa gbi afɔle lɛ. Nɔ fɛɛ nɔ ni ji shikanii lɛ eŋɔ kɛtee akɛ shika, ni nɔ ni ji jwiɛtɛi nii lɛ eŋɔ kɛtee akɛ jwiɛtɛi.

²⁰ Shi akɔɔble ni akɛfee akulashiŋi enyɔ lɛ kɛ gbudugbaŋ wulu lɛ, kɛ akɔɔble okpɔŋɔi nyɔŋma kɛ enyɔ ni gbudugbaŋ lɛ ma amɛnɔ lɛ kɛ amɛshishi nibii ni amɛmamɔ nɔ lɛ ni Maŋtsɛ Solomon fee ewo Yehowa we lɛ lɛ, anyɛɛɛ etsiimɔ aŋmɛ.

²¹ Akulashiŋi enyɔ lɛ, amɛteŋ ekome kwɔlɛ ji ninetalɔi nyɔŋma kɛ kpaanyɔ, ni edalɛ kɛbɔle kɛkpe ji ninetalɔi nyɔŋma kɛ enyɔ, ni akɔɔble lɛ diɛŋtsɛ timɔ feɔ waobii ejwɛ timɔ.

²² Akɔɔble kpɔ ko ma akulashiŋ lɛ yiteŋ. Kpɔ nɛɛ kwɔlɛ ji ninetalɔi enumɔ, ni akɔɔble ntaŋ kɛ emli kpɔbii kokrobii ha yiteŋ kpɔ lɛ he kɛkpe. Nakai nɔŋŋ ji bɔ ni akulashiŋ kome lɛ hu yɔɔ.

²³ Kpɔbii kokrobii nyɔŋmai nɛɛhu kɛ ekpaa yɛ akulashiŋ lɛ kponɔgbɛ. Kpɔbii kokrobii fɛɛ ni yɔɔ ntaŋ lɛ he kɛkpe feɔ ohã.

Aŋɔ Yudabii nom kɛtee Babilon

²⁴ Enɛ sɛɛ lɛ maŋtsɛ hebulɔi asafoiatsɛ Nebuzaradan mɔmɔ Osɔfonukpa Seraia kɛ esɛɛmɔ Osɔfo Zefania kɛ Sɔlemɔ we lɛ agbo lɛ naabulɔi etɛ̃ lɛ.

²⁵ Mɛi komɛi hu ni emɔmɔ yɛ maŋ lɛ mli nɛ: maŋ lɛ mli tabilɔi atatsɛ lɛ, maŋtsɛ lɛ ŋaawolɔi kpawo komɛi ni nine shɛ amɛnɔ kɛ tatsɛ lɛ woloŋmalɔ ni ji esɛɛmɔ hu ni buaa shikpɔŋ lɛ nɔ tabilɔi anaa lɛ, kɛ shikpɔŋ lɛ nɔ hiɛnaanɔbii nyɔŋmai ekpaa komɛi ni ana yɛ maŋ lɛ mli.

²⁶ Nebuzaradan, maŋtsɛ hebulɔi asafoiatsɛ lɛ, kpala amɛ kɛtee, ni ekɛ amɛ yahã Babilon maŋtsɛ lɛ yɛ Ribla.

²⁷ Babilon maŋtsɛ lɛ tswia amɛ nii, ni egbe amɛ yɛ Ribla yɛ Hamat shikpɔŋ lɛ nɔ. Ni aŋɔ Yudabii lɛ nom kɛjɛ amɛ diɛŋtsɛ amɛshikpɔŋ lɛ nɔ kɛtee.

²⁸ Gbɔmɛi abɔ ni Nebukadnezar ŋɔ amɛ nom lɛ nɛ: yɛ efi ni ji kpawo lɛ nɔ lɛ, eŋɔ Yudafoi akpei etɛ̃ kɛ nyɔŋmai enyɔ kɛ etɛ̃.

²⁹ Afi ni ji nyɔŋma kɛ kpaanyɔ lɛ nɔ lɛ, ebaŋɔ mɛi ohai kpaanyɔ kɛ nyɔŋmai etɛ̃ kɛ enyɔ nom yɛ Yerusalɛm;

³⁰ ni Nebuzaradan, asafoiatsɛ lɛ, baŋɔ Yudafoi lɛ ateŋ mɛi ohai kpawo kɛ nyɔŋmai ejwɛ kɛ enumɔ nom kɛtee yɛ Nebukadnezar maŋtsɛyeli afi ni ji nyɔŋmai enyɔ kɛ etɛ̃ lɛ nɔ. Nomii lɛ fɛɛ ayikulɛ fee akpei ejwɛ kɛ ohai ekpaa.

³¹ Afi nɔ ni Ewil-merodak baye maŋtsɛ yɛ Babilon lɛ, ena Yuda Maŋtsɛ Yehoiakin mɔbɔ, ni ejie lɛ yɛ gboklɛfoi atsu lɛ mli. Sane nɛɛ ba yɛ Yuda Maŋtsɛ Yehoiakin nomŋɔɔ lɛ afi ni ji nyɔŋmai etɛ̃ kɛ kpawo lɛ nyɔŋ ni ji nyɔŋma kɛ enyɔ lɛ nɔ gbi ni ji nyɔŋmai enyɔ kɛ enumɔ lɛ nɔ.

³² Maŋtsɛ Ewil-merodak hiɛ sɔ Maŋtsɛ Yehoiakin pam, ni ehã lɛ gbɛnaa ni nɔ kwɔ fe maŋtsɛmɛi nomii krokomɛi ni amɛ hu amɛkɛ lɛ yɔɔ Babilon lɛ.

³³ No hewɔ lɛ, Yehoiakin tsake gboklɛfoi atade lɛ yɛ ehe; ni ekɛ maŋtsɛ lɛ yeɔ nii yɛ ekpɔlɔ̃ he daa gbi ewala gbii abɔ fɛɛ.

³⁴ Daa gbi lɛ, Babilon maŋtsɛ lɛ hãa lɛ shika fioo ko ni ekɛheɔ nii ni he hiaa lɛ kɛyashi egbele be.