Yeremia 47 - ŊMALƐ KRƆŊKRƆŊ LƐ

Nɔ ni Yehowa kɛɛ yɛ Filistia he

¹ Wiemɔ ni Yehowa kɛ Gbalɔ Yeremia wie yɛ Filistibii ahe dani Ijipt maŋtsɛ yatua Gaza nɛ.

² Yehowa kɛɛ akɛ, “Naa! Fai miiyimɔ yɛ kooyigbɛ, ni amɛbaaje ŋa kɛba; amɛbaaha shikpɔŋ lɛ kɛ enɔ nibii fɛɛ kɛ maji kɛ amɛmli bii fɛɛ anɔ. Gbɔmɛi baabolɔ kɛtsɛ yelikɛbuamɔ ni shikpɔŋ lɛ nɔ bii fɛɛ baawɔ lele.

³ Okpɔŋɔi ananeshi gbɛɛmɔ kɛ ta shwiilii agbɛɛmɔ kɛ shwiilii ananeshi jijemɔ hewɔ lɛ tsɛmɛi tete efoŋ amɛhe amɛkwɛŋ he ni amɛbii yɔɔ. Ejaakɛ amɛnijiaŋ eje wui

⁴ yɛ Filistibii ahiɛkpãtãmɔ ni baa lɛ hewɔ; gbi ni abaaplenee Tiro kɛ Sidon ni ji Filistibii abualɔi ni eshwɛ lɛ. Ejaakɛ Yehowa baakpãtã Filistibii ni ji Kreta ŋshɔkpɔ lɛ nɔ mɛi ni eshwɛ lɛ ahiɛ.

⁵ Ŋkɔmɔyeli ehã Gaza yiteŋ ekpa, ni akpãtã Ashkelon hiɛ. Ao! Nyɛ jɔɔŋbii ni eshwɛ, mɛɛ beyinɔ nɔŋŋ nyɛaabamɔ nyɛhe kakla kɛye awerɛhoo kɛyashi?

⁶ ‘Yehowa klante! Mɛɛ beyinɔ ohe aaajɔ? Kuu osɛɛ oyahɔ ohebo lɛ mli, ni ojɔɔ ohe, ni ofee kpoo!’

⁷ Te aaafee tɛŋŋ ni ehe aaajɔ hu, be mli ni Yehowa efã lɛ lɛ? Efã lɛ ewo Ashkelon kɛ ŋshɔnaa maji lɛ ahe.”