Yeremia 43 - ŊMALƐ KRƆŊKRƆŊ LƐ

Akɛ Yeremia tee Ijipt shikpɔŋ lɛ nɔ

¹ Be ni Yeremia kɛ maŋ muu lɛ fɛɛ ewie wiemɔi ni Yehowa, amɛNyɔŋmɔ lɛ, kɛtsu lɛ amɛŋɔɔ lɛ egbe naa lɛ,

² Azaria, Hoshaia bi lɛ, kɛ Yohanan, Karea bi lɛ, kɛ hii hewolɔi krokomɛi lɛ fɛɛ kɛɛ Yeremia akɛ, “Oomale! Yehowa, wɔNyɔŋmɔ lɛ, tsuko bo koni obakɛɛ wɔ akɛ, ‘Nyɛkayaa Ijipt shikpɔŋ lɛ nɔ nyɛyahi jɛi.’

³ Baruk, Neria bi lɛ, moŋ ji mɔ ni ehã ote shi owo wɔ nɛɛ, bɔ ni afee ni eŋɔ wɔ ewo Babilonbii lɛ adɛŋ koni amɛgbe wɔ aloo amɛŋɔ wɔ nom kɛya Babilon.”

⁴ No hewɔ lɛ, Yohanan, Karea bi lɛ, kɛ tabilɔi lɛ anɔ tatsɛmɛi lɛ fɛɛ yeee Yehowa wiemɔ akɛ amɛhi shi yɛ Yuda shikpɔŋ lɛ nɔ lɛ nɔ.

⁵ Shi Yohanan, Karea bi lɛ, kɛ tai lɛ asafoiatsɛmɛi lɛ fɛɛ ŋɔ Yudabii ni shwɛ lɛ, mɛi ni ku amɛsɛɛ kɛjɛ jeŋmaji fɛɛ ni agbɛ amɛ ashwã nɔ lɛ kɛba ni amɛbahi Yuda shikpɔŋ lɛ nɔ lɛ fɛɛ kɛtee Ijipt.

⁶ Mɛi nɛɛ ji hii kɛ yei kɛ gbekɛbii kɛ maŋtsɛ biyei kɛ mɔ fɛɛ mɔ ni Nebuzaradan tu ewo Gedalia, Shafan bi Ahikam bi lɛ, nɔkwɛmɔ shishi lɛ. Amɛkɛ Gbalɔ Yeremia kɛ Baruk, Neria bi lɛ, hu fata gbɔmɛi nɛɛ ahe,

⁷ ni amɛŋɔ amɛ kɛtee Ijipt shikpɔŋ lɛ nɔ, ejaakɛ amɛbooo Yehowa wiemɔ lɛ toi. Amɛtee, aahu kɛyashɛ Tahapanes maŋ lɛ mli.

⁸ Kɛkɛ ni Yehowa kɛ Yeremia wie yɛ Tahapanes, ni ekɛɛ lɛ akɛ,

⁹ “Holemɔ tɛi wuji koni okɛyahɔlɔ su ni akɛtsara ntayai ni akɛka Farao shinaa lɛ shi lɛ mli yɛ Tahapanes, yɛ Yuda hii lɛ ahiɛ.

¹⁰ No sɛɛ lɛ, kɛɛmɔ Yuda hii lɛ akɛ, mi Yehowa Taiatsɛ, Israel Nyɔŋmɔ lɛ, mikɛɛ akɛ mibaŋɔ mitsulɔ Nebukadnezar, Babilon maŋtsɛ lɛ, kɛba, mikɛ emaŋtsɛyeli sɛi lɛ baama nɛkɛ tɛi ni mikɛhɔlɔ shi nɛɛ anɔ, ni ebaashi ekatamanso lɛ ema amɛnɔ.

¹¹ Eeeba ekɛ Ijipt abawu, ni ebaaye nɔ. Mɛi fɛɛ ni amɛshɛɛ mli ji akɛ hela ni baagbe amɛ lɛ, hela baagbe amɛ; mɛi ni amɛshɛɛ mli ji akɛ abaaŋɔ amɛ nom lɛ, abaaŋɔ amɛ nom; ni mɛi ni amɛshɛɛ mli ji akɛ amɛbaanyɔ yɛ ta mli lɛ, amɛbaanyɔ yɛ ta lɛ mli.

¹² Mibamamɔ Ijiptbii anyɔŋmɔi lɛ awei lɛ anaa la mashã, ni abaaŋɔ amɛ nom. Mibabɛɛ muji ni yɔɔ Ijipt shikpɔŋ lɛ nɔ lɛ tamɔ tookwɛlɔ gbeɔ etade mli ŋmoŋ. Ni Nebukadnezar baashi Ijipt shikpɔŋ lɛ nɔ eku esɛɛ eya yɛ hejɔlɛ mli.

¹³ Eeekumɔ shiui ni akɛ tɛi nsuji wuji mamɔ yɛ Ijipt shikpɔŋ lɛ nɔ nyɔŋmɔi lɛ awei lɛ hu.”