Yeremia 4 - ŊMALƐ KRƆŊKRƆŊ LƐ

Tsuitsakemɔ he ehia

¹ Yehowa kɛɛ akɛ, “Ao! Israel, kɛji ooku osɛɛ kɛba miŋɔɔ lɛ, ba! Kɛji ojie omusubɔɔ nibii lɛ kɛje mihiɛ, ni oshashaooo shi,

² ni kɛji okã kitã akɛ, ‘Mina Yehowa’ kɛ onɔkwale fɛɛ, ni okojo yɛ jalɛ naa, ni ohi shi krɔŋŋ lɛ, no lɛ jeŋ maji lɛ aaayɔse amɛjɔɔmɔ yɛ Yehowa mli, ni amɛaajie mi, Yehowa, miyi.”

³ Nɔ ni Yehowa kɛɔ Yuda shikpɔŋ lɛ kɛ Yerusalɛm maŋ lɛ mli bii nɛ, “Nyɛhua nyɛshikpɔŋ ni ahuko nɔ lɛ, ni nyɛkadua nyɛwui lɛ yɛ ŋmei ateŋ.

⁴ Nyɛjiea nyɛtsuii amli muji lɛ nyɛshwiea tamɔ afoɔ ketia kɛjieɔ foo koni nyɛkɛ nyɛhe ahã Yehowa. Nyɛ Yudahii kɛ nyɛ Yerusalɛmbii, kɛjeee nakai lɛ mimlila lɛ baanina nyɛ tamɔ la yɛ nyɛnifɔɔjianii lɛ ahewɔ, ni ebaashã nii, mɔ ko bɛ ni aaanyɛ agbe.”

Aaba abatua Yuda

⁵ Akɛɛ yɛ Yuda, ni ashiɛ yɛ Yerusalɛm hu akɛ, “Akpã tɛtɛrɛmantɛrɛ yɛ shikpɔŋ lɛ nɔ fɛɛ, Abɔ oshe waa akɛ, ‘Nyɛbuaa nyɛhe naa, ni nyɛhãa wɔyaa maji ni atswa gbogbo awo amɛhe lɛ amli!’

⁶ Nyɛhãa aflaŋaa atsɔ̃a nyɛ Zion gbɛ, nyɛjoa foi, nyɛyabaa abo! Nyɛkashashaoa shi, ejaakɛ miihã sane fɔŋ ajɛ kooyigbɛ aba abakpãtã nyɛhiɛ wɛɛ.

⁷ Jata ko efã kpo kɛjɛ ekoowie mli kɛmiiba, maji ahiɛkpãtãlɔ ko efã kɛmiiba; Eshi eshihilɛhe lɛ kɛmiiba, ni ebaakpãtã nyɛshikpɔŋ lɛ hiɛ, koni nyɛmaji lɛ atsɔ̃mɔ amaŋfɔ̃i, hei ni gbɔmɛi ehiŋ dɔŋŋ.

⁸ Enɛ hewɔ lɛ, nyɛmiaa kɛ kpekpe nyɛyea ŋkɔmɔ, ni nyɛwoa yara, ejaakɛ Yehowa efoko emli ni fu wɔ waa lɛ sɛɛ.”

⁹ Kɛkɛ ni Yehowa kɛɛ akɛ, “Nakai gbi lɛ nɔ lɛ ekãafeemɔ baaŋmɛɛ maŋtsɛ kɛ lumɛi; osɔfoi lɛ ahe baajɔ̃ amɛhe, ni gbalɔi ahiɛ baafee amɛ yaa.”

¹⁰ Kɛkɛ ni mikɛɛ akɛ, “Ao, Nuŋtsɔ Yehowa, lɛɛlɛŋ akɛ lakamɔ olaka gbɔmɛi nɛɛ kɛ Yerusalɛmbii fɛɛ? Ejaakɛ okɛɛ amɛ akɛ, ‘Nyɛbaana toiŋjɔlɛ; no moŋ ji klante ni akɛnyiɛ amɛsɛɛ nɛɛ?’ ”

¹¹ Be miiba be ni abaakɛɛ gbɔmɛi nɛɛ kɛ Yerusalɛmbii fɛɛ akɛ, “Kɔɔyɔɔ ko ni mli edɔ la efã kɛjɛ shiaŋa kɛ gɔji kɛ amɛyiteiaŋ kplanai lɛ anɔ; eeba ebashwie miwebii lɛ anɔ. Eeba koni ebasha ŋmaa mli tutuu eshwie koni ŋmaa lɛ he atse.

¹² Kɔɔyɔɔ ni baaba ahã mi lɛ naa wa kwraa fe enɛ. Agbɛnɛ Yehowa diɛŋtsɛ ji mɔ ni etsɔ̃ɔ bɔ ni abaagbala amɛtoi ahã nɛɛ.”

Henyɛlɔi basa Yuda yi

¹³ Naa, henyɛlɔ lɛ efã kɛmiiba tamɔ atatu; etayaa shwiilii lɛ tamɔ lasuogbele; ni ekpɔŋɔi lɛ ahe yɛ oya fe okropɔŋ. Kpoo hã wɔ. Wɔhiɛ ekpãtã!

¹⁴ Ao! Yerusalɛm, fɔ otsuiŋ nishaianii lɛ oshwie, bɔ ni afee ni ahere oyiwala. Mɛɛ beyinɔ nɔŋŋ po susumɔ fɔ̃ji aaahi oyiŋ kɛyashi?

¹⁵ Gbee ko miigbɛɛ waa kɛjɛ Dan shikpɔŋ lɛ nɔ, ni eekɛɛ akɛ sane fɔŋ ko miijɛ Efraim gɔji lɛ anɔ aba.

¹⁶ Akɛɛ maji lɛ akɛ henyɛlɔ miiba; asaŋ akɛɛ Yerusalɛm akɛ mɛi jɛ maŋsɛɛ shɔŋŋ amɛbasa eyi. Henyɛlɔi nɛɛ baabolɔ amɛwo Yuda shikpɔŋ lɛ nɔ maji lɛ ayi.

¹⁷ Amɛbaabɔle Yerusalɛm he kɛkpe tamɔ ŋmɔ he bulɔi, ejaakɛ Yerusalɛm tse mihiɛ atua.

¹⁸ Yuda, ojeŋba kɛ onifeemɔnii ji nɔ ni kɛ nɛkɛ sane eba onɔ nɛɛ. Ohiɛkpãtãmɔ nɛ, ni eejoo pam, ni eetsu otsui mli.

Yeremia ye emaŋbii ahe ŋkɔmɔ

¹⁹ Miigbo! Miigbo! Miigbo kɛ ŋkɔmɔ! Ao! Mitsui miiwa mihe, mitsui miitswa kplakpla! Minyɛɛɛ dioo mafee, ejaakɛ miinu tɛtɛrɛmantɛrɛ gbɛɛmɔ kɛ ta oshebɔɔ.

²⁰ Amanehulu nyiɛ amanehulu sɛɛ tuuŋtu, akpãtã shikpɔŋ tso muu lɛ hiɛ; afite mibuui lɛ trukaa, ni hiŋmɛitswaa mli lɛ agbala mibuui lɛ ahe mamai lɛ.

²¹ Mɛɛ beyinɔ nɔŋŋ makã he mana ta aflaŋaa, ni manu tɛtɛrɛmantɛrɛ gbɛɛmɔ kɛyashi?

²² Ejaakɛ kwashiai ji miwebii lɛ, amɛleee nii; bii kwashiai ji amɛ, amɛbɛ jwɛŋmɔ. Amɛhe esa kɛ efɔŋfeemɔ shi ekpakpafeemɔ ebɔ amɛ.

Yeremia ninaa yɛ hiɛkpãtãmɔ lɛ he

²³ Mikwɛ shikpɔŋ lɛ, naa, ekã shi olɛŋlɛ; ni efee floŋŋ; ni mikwɛ ŋwɛi hu lɛ, la ko bɛ jɛi.

²⁴ Mikwɛ gɔji lɛ, naa, amɛmiihoso, ni gɔ̃ŋkpɔi lɛ miitsi kɛmiiya kɛmiiba.

²⁵ Mikwɛ, ni naa, gbɔmɔ kome flo nɛkɛ bɛ he ko he ko; ni loofɔji buublu efiliki kɛtee.

²⁶ Mikwɛ, ni naa, shikpɔŋ frɔ̃frɔ̃ lɛ etsɔ̃ shiaŋa, ni enɔ maji lɛ fɛɛ etsɔ̃mɔ amaŋfɔ̃i, yɛ Yehowa mlifu ni naa wa lɛ naa.

²⁷ Ejaakɛ bɔ ni Yehowa kɛɛ nɛ; “Shikpɔŋ muu lɛ fɛɛ baatsɔ̃ amaŋfɔ̃ moŋ; shi kɛ̃lɛ mifiteŋ lɛ butuu kɛgbeŋ naa.

²⁸ Ejaakɛ shikpɔŋ lɛ baaye ŋkɔmɔ, ni ŋwɛi baadi tũu, ejaakɛ mi, mina mikɛɛ, ni mito miyiŋ momo. Mishwaŋ mihe, ni mikpaleŋ miyiŋtoo lɛ hu.

²⁹ Maŋ fɛɛ maŋ joɔ foi kɛji anu okpɔŋɔnɔtalɔi kɛ gãitsɛ̃lɔi ahe; amɛboteɔ koowieiaŋ, amɛkwɔlɔɔ tɛsai, ajoɔ foi ashiɔ majiaŋ ashwieɔ shi, ni ashiii gbɔmɔ kome nɛkɛ yɛ amɛmli.

³⁰ Ao! Yerusalɛm ni oyi etɔ̃, Mɛɛba moŋ ni owula kɛ mama tsuru kɛ shika jwine ni ofolɔ ohiŋmɛii asɛɛ? Yakatswaa ofeɔ ohe fɛɛfɛo lɛ. Osuɔlɔi lɛ ekwa bo, ni amɛmiitao bo amɛgbe.

³¹ Ejaakɛ minu yoo ni miikɔmɔ he. Kɔ̃ɔmɔ lɛ tamɔ yoo ni baafɔ ekromɔbi kɔ̃ɔmɔ. Yerusalɛm ni tsui miisu lɛ gbee ni; ni ekpã enijiaŋ eebo akɛ, ‘Kpoo hã mi! Miinyɔ yɛ mɛi ni gbeɔ mi ahiɛ.’ ”