Yeremia 30 - ŊMALƐ KRƆŊKRƆŊ LƐ

Shii ni Yehowa wo ewebii

¹ Wiemɔ ni Yehowa kɛ Yeremia wie nɛ.

² Yehowa, Israel Nyɔŋmɔ lɛ, kɛɛ Yeremia akɛ, “Ŋmãa wiemɔi ni mikɛ bo ewie lɛ fɛɛ owo wolo mli.

³ Shi naa, gbii miiba ni mibahã miwebii Israelbii kɛ Yudabii anine ashɛ amɛnibii fɛɛ ni amɛlaaje lɛ anɔ. Mikɛ amɛ baaku sɛɛ kɛba shikpɔŋ ni mikɛhã amɛtsɛmɛi lɛ nɔ ekoŋŋ koni amɛbaŋɔ shikpɔŋ lɛ akɛ amɛnɔ.”

⁴ Wiemɔi ni Yehowa wie yɛ Israel kɛ Yuda he nɛ. Yehowa kɛɛ akɛ,

⁵ “Minu tsuifãa blɔmɔ he, gbeyeishemɔ blɔmɔ ni, ejeee hejɔlɛ blɔmɔ.

⁶ Nyɛbia nyɛkwɛa; Ani nuu ekɔ̃mɔ efɔ bi pɛŋ? Mɛɛba mɔ ni minaa nuu fɛɛ nuu efua emusu tamɔ yoo ni miikɔmɔ nɛɛ? Mɛɛba mɔ fɛɛ mɔ hiɛ eshale nɛkɛ?

⁷ Ao! Nakai gbi lɛ, gbi wulu ni; ehenɔ bako pɛŋ. Yakob hejaramɔ gbi ni, kɛ̃lɛ abaahere eyiwala yɛ gbele mli.”

⁸ Ni mi, Yehowa Taiatsɛ, miikɛɛ akɛ nakai gbi lɛ mibakumɔ apã lɛ yɛ amɛkuɛ, ni mibatserɛ kpãi ni fimɔ amɛ lɛ; ni mɛi kpɔji yeŋ amɛ nyɔŋ dɔŋŋ.

⁹ Shi moŋ amɛbaasɔ̃mɔ Yehowa, amɛNyɔŋmɔ lɛ kɛ David shwie ni mibato lɛ maŋtsɛ mibahã amɛ lɛ.

¹⁰ “No hewɔ lɛ, bo, mitsulɔ Yakob, kaashe gbeyei; ni Israel, otsui akafã, ejaakɛ mibahere nyɛ kɛ nyɛshwiei hu, kɛjɛ shɔŋŋ shikpɔŋ lɛ nɔ, kɛjɛ amɛnomŋɔɔ shikpɔŋ lɛ nɔ. Yakob baaku esɛɛ eba ni ebahi shi yɛ toiŋjɔlɛ kɛ hejɔlɛ mli; ni mɔ ko mɔ ko woŋ ehe gbeyei. Mi, Yehowa, mikɛɛ.

¹¹ Ejaakɛ mikɛ nyɛ yɛ koni mahere nyɛyiwala. Mibakpãtã majimaji fɛɛ ni migbɛ nyɛ mishwã amɛnɔ lɛ ahiɛ kɛmɔ shi. Shi bo lɛ, mikpãtãŋ ohiɛ kɛmɔŋ shi; shi kɛ̃lɛ mibagbala otoi bɔ ni sa kɛkɛ, ni mihaŋ oŋɔ ohe oye tswaa.”

¹² Ejaakɛ, mi Yehowa, miikɛɛ akɛ, “Nyɛpilamɔ lɛ bɛ tsabaa, ni nyɛfala lɛ ewo wu.

¹³ Mɔ ko bɛ ni baaye nyɛsane lɛ; nyɛfala lɛ he tsofa bɛ lɛ, nyɛhela lɛ bɛ tsabaa.

¹⁴ Nyɛsuɔlɔi lɛ fɛɛ ahiɛ ekpa nyɛnɔ, jeee amɛhe sane ko ji nyɛ dɔŋŋ, ejaakɛ mitswa nyɛ nɔ tamɔ bɔ nɔŋŋ ni henyɛlɔ baatswa nyɛ nɔ; ejaakɛ nyɛtɔ̃mɔ lɛ da.

¹⁵ Mɛɛba nyɛfoɔ yɛ nyɛpilamɔ hewɔ? Nyɛpiŋmɔ lɛ bɛ tsabaa. Akɛni nyɛtɔ̃mɔ lɛ da, ni nyɛhe eshai lɛ fa lɛ, no hewɔ ni mifee nyɛ enɛ nɛɛ.

¹⁶ Shi mɔ fɛɛ mɔ ni kpãtãa nyɛhiɛ lɛ, aaakpãtã ehiɛ; ni abaaŋɔ nyɛhenyɛlɔi ateŋ mɔ fɛɛ mɔ nom. Mɛi fɛɛ ni aaaha nyɛ nii lɛ aaaha amɛ nii; ni mɛi ni feɔ nyɛ niseniianii lɛ, mahã afee amɛ niseniianii.

¹⁷ Ejaakɛ mahã nyɛna hewalɛ ekoŋŋ, ni matsa nyɛfaji lɛ, ejaakɛ amɛtsɛ bo mɔ ni ashwie lɛ, ‘Zion ni jeee mɔ ko he sane ji lɛ.’ Mi, Yehowa mikɛɛ.

¹⁸ Naa, mibahã miwebii ashwere ekoŋŋ; ni mimusuŋ aaatsɔ̃ mi yɛ shĩa fɛɛ shĩa he. Abaasaa Yerusalɛm atswa ama egɔ̃ŋ lɛ nɔ ekoŋŋ. Ni mɔɔ lɛ aaama etsutsu maahe lɛ.

¹⁹ Shidaa lalai aaagbɛɛ kɛjɛ mli, mɛi ni miinya agbee aaajije kɛjɛ jɛi. Mibahã amɛyi afa, ni amɛnɔ gbɔŋ; mibawo amɛhiɛ nyam; abuŋ amɛ akɛ maŋ bibioo.

²⁰ Amɛbii ashihilɛ aaafee tamɔ sa shihilɛ, ni amɛsafo lɛ baahe shi yɛ mihiɛ, ni mibagbala mɛi fɛɛ ni waa amɛyi lɛ atoi.

²¹ Amɛteŋ mɔ ko nɔŋŋ baatsɔ̃ amɛlumɔ; amɛnɔyelɔ lɛ baajɛ amɛ nɔŋŋ amɛteŋ. Mahã etsi ebɛŋkɛ mi, ni ebaaba mimasɛi, ejaakɛ namɔ aaanyɛ ashi etsitsi, ni eba mi, mimasɛi? Mi, Yehowa, mikɛɛ.

²² Nyɛbaatsɔ̃ miwebii, ni mi hu mibatsɔ̃ nyɛNyɔŋmɔ.”

²³ Naa, Yehowa mlifu lɛ, ahum ni, ni efã kɛje kpo tamɔ lasuogbele, ni ebaalota mɛi fɔ̃ji lɛ kɛya.

²⁴ Yehowa mlifu ni naa wa lɛ sɛɛ efoŋ kɛyaashi beyinɔ ni nɔ ni eto eyiŋ akɛ ebaafee lɛ, ena efee kɛgbe naa. Wɔsɛɛ ko dani nyɛaanu sane nɛɛ shishi faŋŋ.