Yeremia 3 - ŊMALƐ KRƆŊKRƆŊ LƐ

Israel yeee anɔkwa

¹ Mi, mibi akɛ, “Kɛji nuu ko shwie eŋa, ni yoo lɛ shi nuu lɛ, ni eyatsɔ̃ nuu kroko ŋa lɛ, ani nuu lɛ kuɔ esɛɛ eyaŋɔɔ nakai yoo lɛ ekoŋŋ? Nɔ ko ni tamɔ nɛkɛ lɛ ebuleɔ shikpɔŋ, nɔ ni mimɛi lɛ yɔɔ nɔ lɛ. Israel te okɛ shieŋtsɛmɛi babaoo eyabɔ ajwamãŋ, ni ooku osɛɛ oba miŋɔɔ ekoŋŋ?

² Wo ohiɛ nɔ ni okwɛ gɔji lɛ anɔ hei ni yɔɔ kpataa lɛ. Te amɛteŋ he ni akɛ bo ebɔko ajwamãŋ yɛ lɛ? Otaa gbɛi atoii omɛɔ shieŋtsɛmɛi tamɔ Arabianyo woɔ ka yɛ shiaŋa mli kɛmɛɔ gbɛnyiɛlɔ. Okɛ ojwamaŋbɔɔ ni naa wa ebule shikpɔŋ lɛ.

³ No hewɔ ni atsi nunɛmɔ naa; ni gbo nu enɛɛɛ nɛɛ; shi ohiɛ yoo ajwamãŋ hiŋmɛi lolo, ni ohiɛ gbooo he.

⁴ “Ani otsɛko mi amrɔ nɛɛ nɔŋŋ akɛ, ‘Mitsɛ Ataa, bo ji mitsɛ kɛjɛ migbekɛbiiashi,

⁵ omli fuŋ mi kɛyaŋ naanɔ, ni obɛŋ mi owoŋ omli kɛyaŋ naanɔ?’ Israel, nɔ ni okɛɔ nɛ, shi kɛ̃lɛ ofee nɔ fɔŋ fɛɛ nɔ fɔŋ ni obaanyɛ ofee.”

Esa akɛ Israel kɛ Yuda aje amɛhe sɛɛ

⁶ Yehowa bi mi yɛ Maŋtsɛ Yosia yinɔ akɛ, “Bɛ ona nɔ ni Israel ni yeee anɔkwa lɛ fee lɛ? No ji bɔ ni etee gɔŋ fɛɛ gɔŋ ni kwɔ nɔ, kɛ tso fɛɛ tso ni ebu kusuu shishi eyabɔ ajwamãŋ yɛ jɛi lɛ?

⁷ Mi, misusu akɛ kɛji efee enɛɛmɛi fɛɛ tete sɛɛ lɛ, ebaaku esɛɛ eba miŋɔɔ; shi ebaaa; ni enyɛmiyoo Yuda hu ni yeee anɔkwa lɛ na nɔ ni Israel fee lɛ.

⁸ Ena akɛ ajwamãŋ ni Israel ni yeee anɔkwa bɔ hewɔ lɛ mishwie lɛ akɛ miŋa. Shi kɛ̃lɛ Israel nyɛmiyoo Yuda ni yeee anɔkwa lɛ, eyasheee gbeyei; shi moŋ lɛ hu etee ni eyabɔ ajwamãŋ lɛ eko.

⁹ Shi akɛni ajwamãŋbɔɔ efeee lɛ hiɛgbele hewɔ lɛ ekɛ tsei kɛ tɛi fɛɛ fite gbãlã, ni ebule shikpɔŋ lɛ.

¹⁰ Ni yɛ enɛɛmɛi fɛɛ asɛɛ lɛ Yuda, Israel nyɛmiyoo ni yeee anɔkwa lɛ, kpaleee kɛbaaa miŋɔɔ kɛ etsui fɛɛ, shi moŋ kwa ekwa eba miŋɔɔ. Mi Yehowa, mikɛɛ.”

¹¹ Kɛkɛ ni Yehowa kɛɛ mi akɛ, “Israel ni yeee ewu anɔkwa po etsɔ̃ɔ akɛ etɔ̃mɔ lɛ yɛ mlɛo fe Yuda nɔ lɛ.

¹² Yaa kooyigbɛ shikpɔŋ lɛ nɔ koni oyashiɛ yɛ jɛi, ni okɛɛ akɛ, ‘Israel ni yeee ewu anɔkwa, kpalemɔ kɛba miŋɔɔ! Mituŋ mihiɛ miwoŋ nyɛ ejaakɛ mɔbɔnalɔ ji mi. Mi, Yehowa mikɛɛ. Mibɛŋ nyɛ miwoŋ mimli kɛyaŋ naanɔ.

¹³ Kpɛlɛ̃mɔ otɔ̃mɔi lɛ anɔ kɛkɛ akɛ oyakpa shi yɛ heihei kɛnyiɛ maŋsɛɛ nyɔŋmɔi asɛɛ yɛ tso fɛɛ tso ni ebu kusuu shishi, ni asaŋ obooo mi toi. Mi, Yehowa, mikɛɛ.

¹⁴ Ao! Nyɛ bii ni yeee anɔkwa, nyɛkpalea nyɛbaa, ejaakɛ mi ji nyɛnuŋtsɔ lɛ; ni nyɛmaŋ fɛɛ maŋ mli lɛ maŋɔ gbɔmɔ kome, ni weku fɛɛ weku mli lɛ maŋɔ gbɔmɛi enyɔ, ni mikɛ amɛ baaba Yerusalɛm. Mi, Yehowa, mikɛɛ.

¹⁵ Ni mahã nyɛ mi diɛŋtsɛ mitsui naa nɔkwɛlɔi. Amɛbaalɛ nyɛ kɛ nilee kɛ jwɛŋmɔ.

¹⁶ Mi, Yehowa, miikɛɛ akɛ nakai be mli, be ni nyɛfɔfɔi, ni nyɛyi efa pii yɛ shikpɔŋ lɛ nɔ lɛ, awieŋ Yehowa Kpãŋmɔ Adeka lɛ he dɔŋŋ; ajwɛŋ ehe lɛ, akaiŋ lɛ ni ataoŋ lɛ, ni akpɛŋ ekroko dɔŋŋ.

¹⁷ Nakai be lɛ mli lɛ abaatsɛ Yerusalɛm akɛ Yehowa Maŋtsɛ Sɛi, ni majimaji bluublu aaabua amɛhe naa kɛaaba Yehowa hiɛ yɛ Yerusalɛm amɛbaja mi. Amɛkɛ kuɛŋtilɛ efeŋ nɔ ni amɛtsui fɔŋ kɛɔ amɛ lɛ dɔŋŋ.

¹⁸ Nakai be lɛ mli lɛ, Yuda akutso lɛ baaya ayafata Israel akutso lɛ he ni amɛaajɛ kooyigbɛ shikpɔŋ lɛ nɔ kutuu kɛaaba shikpɔŋ ni mikɛhã amɛtsɛmɛi lɛ akɛ amɛgboshinii lɛ nɔ.’ ”

Nyɔŋmɔ Webii lɛ amãgãjamɔ

¹⁹ “Misusu he bɔ ni maŋɔ bo mashi mibii anɔ, ni mahã bo shikpɔŋ fɛɛfɛo, gboshinii ko ni yɔɔ fɛo fe majimaji fɛɛ anɔ. Ni efee mi akɛ oootsɛ mi akɛ, “Mitsɛ Ataa,” ni okpaleŋ yɛ misɛɛ dɔŋŋ;

²⁰ shi bɔ ni yoo ni yeee ewu anɔkwa jeɔ ewu sɛɛ lɛ, Ao! Israel, nakai oyeko mi anɔkwa. Mi, Yehowa, mikɛɛ.”

²¹ Anu gbee ko gbɛɛ yɛ gɔji lɛ ayiteiaŋ kpatai lɛ anɔ. Israelbii ayaafo kɛ faikpamɔ ni, ejaakɛ amɛba amɛjeŋ gbonyo, ni amɛhiɛ ekpa Yehowa, amɛNyɔŋmɔ lɛ, nɔ.

²² “Ao! Bii ni yeee anɔkwa nyɛkpalea nyɛbaa! Matsa anɔkwa ni nyɛyeee hela lɛ.” Nyɛkɛɛ akɛ, “Naa, wɔmiiba oŋɔɔ, ejaakɛ bo ji Yehowa, wɔNyɔŋmɔ lɛ.

²³ Eji anɔkwa akɛ gɔji lɛ ayiteiaŋ jamɔ hoo lɛ lakamɔ sɔŋŋ kɛkɛ ni. Anɔkwa, Yehowa, wɔNyɔŋmɔ lɛ, lɛ edɛŋ Israel yiwalaheremɔ yɔɔ.

²⁴ Shi kɛjɛ wɔblahiiaŋ beebe lɛ nakai hiɛgbejianii, ni ji Baal jamɔ lɛ, eye wɔdɛŋnii fɛɛ ni wɔtsɛmɛi lɛ gbo he deŋme: amɛtoi kɛ amɛtsinai kɛ amɛbihii kɛ amɛbiyei lɛ.

²⁵ Nyɛhãa wɔhiɛshishwiemɔ lɛ aha wɔnɔ tamɔ mama, ejaakɛ wɔ kɛ wɔtsɛmɛi lɛ, kɛjɛ wɔblahiiaŋ aahu kɛbashi ŋmɛnɛ gbi nɛɛ nɔ lɛ, wɔfee esha wɔshi Yehowa, wɔNyɔŋmɔ lɛ, ni wɔboko Yehowa, wɔNyɔŋmɔ lɛ, gbee toi.”