Yeremia 29 - ŊMALƐ KRƆŊKRƆŊ LƐ

Yeremia ŋma wolo emaje Yudabii ni yɔɔ Babilon lɛ

¹ Gbalɔ Yeremia ŋma wolo ekɛmaje kɛjɛ Yerusalɛm ni akɛyahã Yudabii maŋ hiɛnyiɛlɔi lɛ kɛ osɔfoi lɛ kɛ gbalɔi lɛ kɛ maŋbii lɛ fɛɛ ni Babilon Maŋtsɛ Nebukadnezar baŋɔ amɛ nom kɛjɛ Yerusalɛm kɛtee Babilon lɛ.

² Aŋma wolo nɛɛ be ni amɔmɔ Maŋtsɛ Yekonia kɛ emaŋnyɛ lɛ kɛ maŋtsɛ piafoi lɛ kɛ Yuda kɛ Yerusalɛm abladei hu kɛ ŋaalɔi srɔtoi lɛ kɛ sɔ̃lɔi lɛ fɛɛ kɛtee nomŋɔɔ mli sɛɛ.

³ Mikɛ wolo nɛɛ maje Shafan bi Elasa kɛ Hilkia bi Gemaria, ni ji bɔfoi komɛi ni Yuda Maŋtsɛ Zedekia etsu amɛ Babilon Maŋtsɛ Nebukadnezar ŋɔɔ yɛ Babilon lɛ. Wolo lɛ mli wiemɔ nɛ,

⁴ “Nɔ ni Yehowa, Taiatsɛ, Israel Nyɔŋmɔ lɛ, kɛɔ nomi fɛɛ ni ehã aŋɔ amɛ nom kɛjɛ Yerusalɛm kɛtee Babilon nɛ,

⁵ ‘Nyɛmamɔa tsui, ni nyɛhi mli; nyɛfea abɔi ni nyɛye amɛmli yibii;

⁶ nyɛŋɔŋɔa yei ni nyɛfɔfɔɔ bihii kɛ biyei; nyɛŋɔa ŋamɛi hu nyɛhãa nyɛbihii; nyɛkɛ nyɛbiyei lɛ ahãa gbãlã koni amɛ hu amɛfɔfɔɔ, bɔ ni afee ni nyɛyi afa yɛ jɛi, koni nyɛnɔ akagbɔ!

⁷ Shi nyɛtaoa maŋ nɔ ni mihã aŋɔ nyɛ nom kɛtee lɛ nɔyaa kɛ eshweremɔ; ni nyɛsɔlea nyɛkpaa Yehowa fai nyɛhãa maŋ lɛ, ejaakɛ kɛji maŋ lɛ he jɔ lɛ lɛ, no dani nyɛ hu nyɛhe baajɔ nyɛ.

⁸ Ejaakɛ bɔ ni Yehowa Taiatsɛ, Israel Nyɔŋmɔ lɛ, kɛɔ ji, nyɛkaŋmɛa nyɛgbalɔi kɛ nyɛklamɔfoi ni yɔɔ nyɛteŋ lɛ gbɛ ni amɛlakaa nyɛ; asaŋ nyɛkahea lamɔi ni amɛlaa lɛ nyɛye,

⁹ ejaakɛ gbalɛi ni amɛgbaa amɛtsɔ̃ɔ nyɛ yɛ migbɛi mli lɛ amale sɔŋŋ ni. Mitsuko amɛ. Mi Yehowa, mikɛɛ.’

¹⁰ “Ejaakɛ Yehowa kɛɛ akɛ, ‘Kɛji Babilon ye afii nyɔŋmai kpawo lɛ etã lɛ, mibakwɛ nyɛsane lɛ maye mahã nyɛ, ni mibahã shiwoo jurɔ ni miwo yɛ nyɛhe, akɛ mibahã nyɛku nyɛsɛɛ kɛba biɛ nɛɛ lɛ, aba mli.’

¹¹ “Mi pɛ mile jwɛŋmɔi ni mijwɛŋɔ yɛ nyɛhe, nyɛhe jwɛŋmɔi kpakpa, shi jeee efɔŋ, nɔ ni baahã nyɛ wɔsɛɛ hiɛnɔkãmɔ lɛ aba mli ahã nyɛ.

¹² Nakai be lɛ nyɛaafo nyɛtsɛ mi, ni nyɛaaba nyɛbasɔle nyɛkpa mi fai, ni mibabo nyɛ toi.

¹³ Nyɛaatao mi, ni nyɛaana mi, kɛji nyɛtao misɛɛgbɛ kɛ nyɛtsui fɛɛ lɛ.

¹⁴ Mi Yehowa, mikɛɛ akɛ nyɛaana mi; ni nyɛnii fɛɛ ni laaje lɛ, nyɛnine baashɛ nɔ ekoŋŋ. Mibabua nyɛnaa kɛjɛ majimaji anɔ kɛ hei fɛɛ ni mishwie nyɛ kɛtee lɛ, ni mikɛ nyɛ baaku sɛɛ kɛba biɛ nɛɛ he ni mihã aŋɔ nyɛ nom kɛjɛ kɛtee lɛ ekoŋŋ.

¹⁵ “Shi kɛɛmɔ ni nyɛkɛɔ akɛ, ‘Yehowa etee gbalɔi ashi yɛ Babilon ehã wɔ, hewɔ lɛ,’

¹⁶ naa nɔ ni Yehowa kɛɛ yɛ maŋtsɛ ni ta David maŋtsɛ sɛi lɛ nɔ lɛ, kɛ maŋbii fɛɛ ni yɔɔ maŋ nɛɛ mli lɛ, ni ji nyɛwekumɛi ni aŋɔɔɔ amɛ nom afataaa nyɛhe kɛyaaa nomŋɔɔ lɛ mli lɛ ahe.

¹⁷ Yehowa Taiatsɛ lɛ, kɛɛ, ‘Naa, miihã ta kɛ hɔmɔ kɛ gbele hela abote amɛteŋ, ni mahã amɛtsɔ̃ tamɔ agbãmii gbohii ni hilɛ ni amɛhiii sɔŋŋ hewɔ lɛ amɛhiii yeli.

¹⁸ Mibahã ta kɛ hɔmɔ kɛ gbele hela anyiɛ amɛsɛɛ, ni jeŋ maŋtsɛyelihei fɛɛ ni yɔɔ shikpɔŋ lɛ nɔ lɛ ahe baajɔ̃ amɛhe yɛ nɔ ni baaba amɛnɔ lɛ hewɔ. Amɛbaatsɔ̃ gbeyei nɔ amɛhã shikpɔŋ lɛ nɔ maŋtsɛyelihei fɛɛ, ni abaaye amɛhe fɛo, ni abaabɔ amɛ ahora, ni amɛbaatsɔ̃ mɛi ni alomɔ amɛ yɛ hei fɛɛ ni mibagbɛ amɛ mashwã kɛya lɛ.

¹⁹ Ejaakɛ amɛbooo miwiemɔ lɛ toi, ni ji wiemɔi ni mikɛtsuɔ mitsuji gbalɔi lɛ amɛŋɔɔ be fɛɛ be lɛ. Amɛkwa, ni amɛbooo toi. Mi, Yehowa, mikɛɛ.’

²⁰ Nyɛboa Yehowa wiemɔ toi, nyɛ nomii fɛɛ ni mihã nyɛshi Yerusalɛm kɛtee Babilon,

²¹ “Bɔ ni Yehowa Taiatsɛ, Israel Nyɔŋmɔ lɛ kɛɔ yɛ Kolaia bi Ahab kɛ Maaseia bi Zedekia ni gbaa amale gbalɛi yɛ migbɛi mli amɛtsɔ̃ɔ nyɛ lɛ ahe nɛ, ‘Mibahã Babilon Maŋtsɛ Nebukadnezar amɔmɔ amɛ, ni ebaagbe amɛ yɛ nyɛhiɛ,’

²² koni Yuda nomii fɛɛ ni yɔɔ Babilon, kɛ amɛ alomɔ mɔ akɛ, ‘Yehowa afee bo tamɔ bɔ ni Babilon maŋtsɛ shã Zedekia kɛ Ahab lɛ,

²³ ejaakɛ amɛfee hiɛgbejianii pam yɛ Israel. Amɛkɛ amɛnanemɛi aŋamɛi fite gbãlã, ni amɛwie amale wiemɔi yɛ migbɛi mli, be mli ni mikɛ nakai wiemɔi tsuko amɛ. Mi pɛ mile nibii ni amɛfee lɛ; ni mi miiye he odase. Mi Yehowa mikɛɛ.’ ”

Shemaia wolo lɛ

²⁴ Asaŋ Yehowa kɛɛ mi akɛ, “Kɛɛmɔ Shemaia, Nehelamnyo lɛ akɛ,

²⁵ bɔ ni Yehowa Taiatsɛ, Israel Nyɔŋmɔ lɛ, kɛɛ nɛ, ‘Akɛni oŋmala woji yɛ bo diɛŋtsɛ ogbɛi mli okɛmaje abahã Yerusalɛm maŋbii blublu kɛ Maaseia bi Zefania, ni ji osɔfo lɛ, kɛ osɔfoi krokomɛi lɛ fɛɛ akɛ,

²⁶ Yehowa ewo bo osɔfo yɛ Osɔfo Yehoiada najiaŋ koni otsɔ̃ Yehowa Sɔlemɔ we lɛ nɔkwɛlɔ koni mɔ fɛɛ mɔ ni yiŋ kãa lɛ ni efeɔ ehe gbalɔ lɛ, obɔ lɛ apã ni owo lɛ gboklɛ lɛ,

²⁷ mɛɛba ni okãaa Yeremia, Anatotnyo lɛ, ni egbaa etsɔ̃ɔ nyɛ lɛ?

²⁸ Ejaakɛ ekɛ wiemɔ emaje akɛbahã wɔ yɛ Babilon nɛɛ akɛ, nyɛnomŋɔɔ lɛ sɛɛ baatsɛ; nyɛmamɔa tsui ni nyɛhia mli; ni nyɛfea abɔi koni nyɛye amɛmli yibii.’ ”

²⁹ Osɔfo Zefania kane nɛkɛ wolo nɛɛ yɛ Gbalɔ Yeremia toiŋ.

³⁰ Kɛkɛ ni Yehowa kɛ Yeremia wie, ni ekɛɛ lɛ akɛ,

³¹ “Tsu kɛya ni ayakɛɛ nomii lɛ akɛ, ‘Nɔ ni Yehowa kɛɔ yɛ Shemaia, Nehelamnyo lɛ he ji enɛ: Shemaia egba gbalɛi etsɔ̃ɔ nyɛ be mli ni mitsuko lɛ, ni ehã nyɛkɛ nyɛhiɛ efɔ amale nɔ.’

³² Enɛ hewɔ lɛ, mi, Yehowa, miikɛɛ akɛ, ‘Naa, mibagbala Shemaia, Nehelamnyo lɛ, kɛ eshwiei fɛɛ atoi. Eshwiei ateŋ mɔ ko mɔ ko ehiŋ maŋbii lɛ ateŋ ni ehiŋmɛii baana ejurɔ ni mibafee miwebii lɛ. Mi Yehowa, mikɛɛ, ejaakɛ ewie wiemɔ ni baahã maŋbii lɛ atse atua awo mi Yehowa.’ ”