Yeremia 27 - ŊMALƐ KRƆŊKRƆŊ LƐ

Yeremia kɛ kɔŋtso fɔ̃ ekuɛ

¹ Yuda Maŋtsɛ Zedekia, ni ji Yosia bi lɛ, maŋtsɛyeli lɛ shishijee mli lɛ, Yehowa kɛ mi wie.

² Bɔ ni Yehowa kɛɛ mi ji akɛ, “Okɛ kooloo wolo ni afolɔ lɛ blawai blawai kɛ tso afee kɔŋtso koni okɛfɔ̃ okuɛ.

³ No sɛɛ lɛ, okɛ wiemɔ amaje Maŋtsɛmɛi abɔfoi ni eba Yuda Maŋtsɛ Zedekia ŋɔɔ yɛ Yerusalɛm lɛ koni amɛkɛyahã Edom maŋtsɛ lɛ kɛ Moab maŋtsɛ lɛ kɛ Amonbii amaŋtsɛ lɛ kɛ Tiro maŋtsɛ lɛ kɛ Sidon maŋtsɛ lɛ.”

⁴ Okɛɛ amɛ akɛ amɛyakɛɛ amɛnuŋtsɔmɛi lɛ akɛ Yehowa Taiatsɛ Israel Nyɔŋmɔ lɛ kɛɛ akɛ,

⁵ “Mi, Yehowa, mi mibɔ je lɛ kɛ gbɔmɛi kɛ kooloi bluublu ni yɔɔ shikpɔŋ lɛ nɔ yɛ mihewalɛ kpeteŋkple kɛ minineshiwalɛ naa; ni mikɛhãa mɔ ni misumɔɔ.

⁶ Amrɔ nɛɛ miŋɔ shikpɔji nɛɛ fɛɛ miwo Babilon Maŋtsɛ Nebukadnezar mitsulɔ lɛ dɛŋ; ni mikɛ jwɛiiaŋ kooloi tete ewo eshishi koni amɛsɔ̃mɔ lɛ.

⁷ Majimaji fɛɛ aaasɔ̃mɔ lɛ kɛ ebinuu kɛ enabi nuu tete kɛyaashi beyinɔ ni lɛ Babilon Maŋtsɛ lɛ diɛŋtsɛ hu, eshikpɔŋ lɛ be aaashɛ; kɛkɛ lɛ maji babaoo kɛ maŋtsɛmɛi wuji baaye lɛ nyɔŋ.

⁸ “Naa, kɛji maŋ ko loo maŋtsɛyeli shikpɔŋ ko emiii akɛ esɔ̃mɔ Babilon Maŋtsɛ Nebukadnezar nɛɛ koni ekɛ ehe awo enɔyeli shishi lɛ, no lɛ, mikɛ ta kɛ hɔmɔ kɛ gbele hela baagbala nakai maŋ lɛ toi, kɛyashi mahã Nebukadnezar akpãtã nakai maŋ lɛ hiɛ butuu. Mi, Yehowa, mikɛɛ.

⁹ No hewɔ lɛ, nyɛkaboa nyɛgbalɔi lɛ kɛ nyɛklalɔi lɛ kɛ nyɛlalɔi lɛ kɛ nyɛkɔmfoi lɛ kɛ nyɛkunyaayelɔi lɛ ni kɛɔ nyɛ akɛ, ‘Nyɛsɔ̃mɔŋ Babilon maŋtsɛ lɛ toi.’

¹⁰ “Ejaakɛ gbalɛi ni amɛgbaa amɛtsɔ̃ɔ nyɛ lɛ, amale sɔŋŋ ni. Nɔ ni no kɛbaaba ji akɛ abaaloo nyɛ kɛje nyɛshikpɔŋ nɛɛ nɔ kɛya maŋsɛɛ shɔŋŋ. Mibashwie nyɛ yɛ shikpɔŋ lɛ nɔ ni nyɛhiɛ baakpãtã.

¹¹ Shi maŋ fɛɛ maŋ ni aaaŋɔ ehe ewo Babilon maŋtsɛ lɛ nɔyeli shishi, ni eeesɔ̃mɔ lɛ lɛ, mahã ehi lɛ diɛŋtsɛ eshikpɔŋ nɔ, ni ehu nɔ, ni ehi nɔ. Mi, Yehowa, mikɛɛ.”

¹² Mikɛ nɛkɛ wiemɔi nɛɛ pɛpɛɛpɛ shwie Yuda Maŋtsɛ Zedekia hiɛ, ni mikɛɛ lɛ akɛ, “Nii, nyɛŋɔa nyɛhe nyɛwoa Babilon maŋtsɛ lɛ nɔyeli shishi, koni nyɛsɔ̃mɔ lɛ kɛ ewebii lɛ; ni nyɛyi aaana wala!

¹³ Mɛni hewɔ ta kɛ hɔmɔ kɛ gbele hela aaakpãtã bo kɛ omaŋbii ahiɛ tamɔ bɔ ni Yehowa ewie yɛ maŋ ni sɔ̃mɔŋ Babilon maŋtsɛ lɛ he lɛ?

¹⁴ Kaabo gbalɔi lɛ ni kɛɔ bo akɛ, ‘Nyɛsɔ̃mɔŋ Babilon maŋtsɛ lɛ’ awiemɔi lɛ toi, ejaakɛ gbalɛi ni amɛgbaa lɛ amale sɔŋŋ ni.

¹⁵ Mi, Yehowa, miikɛɛ akɛ mitsuko amɛ. Amɛ diɛŋtsɛ amɛmiigba amale gbalɛi yɛ migbɛiŋ. Nɔ ni baaba ji akɛ mibashwie nyɛ yɛ shikpɔŋ lɛ nɔ, ni nyɛhiɛ aaakpatã, nyɛ kɛ nyɛgbalɔi lɛ ni gbaa tsɔ̃ɔ nyɛ lɛ fɛɛ.”

¹⁶ Kɛkɛ ni mikɛɛ osɔfoi lɛ kɛ maŋ muu lɛ fɛɛ akɛ, “Bɔ ni Yehowa kɛɛ nɛ nyɛkaboa nyɛgbalɔi ni gbaa ni amɛkɛɔ nyɛ akɛ, ‘etsɛŋ ni akɛ Yehowa Sɔlemɔ we lɛ mli nibii ni aloo kɛtee Babilon lɛ baaku sɛɛ kɛba,’ lɛ awiemɔi lɛ toi, ejaakɛ amale gbalɛ amɛgbaa amɛtsɔ̃ɔ nyɛ lɛ.

¹⁷ Nyɛkaboa amɛ toi; nyɛsɔ̃mɔa Babilon maŋtsɛ lɛ, ni nyɛyi aaana wala. Mɛɛba aaahã maŋ nɛɛ atsɔ̃ amaŋfɔ̃?

¹⁸ Kɛji gbalɔi ji amɛ yɛ anɔkwale mli, ni mi Yehowa, mikɛ miwiemɔi ewo amɛnaa lɛ, no lɛ amɛkpa mi Yehowa, Taiatsɛ lɛ, fai koni nibii ni eshwɛ yɛ Yehowa Sɔlemɔ we lɛ mli kɛ Yuda maŋtsɛ we lɛ mli kɛ Yerusalɛm maŋ lɛ mli hu lɛ akaŋɔ kɛmiiya Babilon.”

^19-20 Be ni Babilon maŋtsɛ Nebukadnezar baŋɔ Yehoiakim bi Yekonia lɛ, ni ji Yuda maŋtsɛ lɛ, kɛ Yuda kɛ Yerusalɛm abladei lɛ hu nom lɛ, eshi akulashiŋ lɛ kɛ nutoo akɔɔble gbudugbaŋ agbo lɛ kɛ nibii anɔ ni ema lɛ kɛ tsɛnsii krokomɛi ni eshwɛ yɛ maŋ lɛ mli lɛ.

²¹ Bɔ ni Yehowa Taiatsɛ, Israel Nyɔŋmɔ lɛ, kɛɛ yɛ nibii ni eshwɛ yɛ Yehowa Sɔlemɔ we lɛ mli kɛ Yuda maŋtsɛ we lɛ mli kɛ Yerusalɛm maŋ lɛ mli hu he nɛ,

²² “Abaaloo amɛ kɛya Babilon, ni amɛbaahi jɛi kɛyaashi beyinɔ ni makai amɛ, ni mikɛ nibii nɛɛ baaku sɛɛ kɛba amɛtsuutsu toohe lɛ mli yɛ biɛ ekoŋŋ.” Yehowa kɛɛ.