Yeremia 24 - ŊMALƐ KRƆŊKRƆŊ LƐ

Agbãmi kɛ kɛntɛŋi enyɔ lɛ

¹ Be ni Babilon Maŋtsɛ Nebukadnezar ebaŋɔ Yehoiakim bi Yuda Maŋtsɛ Yehoiakin kɛ Yuda lumɛi lɛ kɛ ŋaalɔi lɛ kɛ sɔ̃lɔi lɛ nom kɛjɛ Yerusalɛm kɛtee Babilon sɛɛ lɛ, Yehowa jie ninaa nɛɛ etsɔ̃ɔ mi: Mina agbãmi kɛ kɛntɛŋi enyɔ mamɔ Yehowa Sɔlemɔ we lɛ hiɛ.

² Kɛntɛŋi lɛ ateŋ ekome lɛ agbãmii kpakpai ni tamɔ agbãmi ni tsu klɛŋklɛŋ sɔŋŋ yɔɔ mli. Shi kɛntɛŋ kroko lɛ agbãmii gbohii yɔɔ mli, ni hilɛ ni amɛhiii sɔŋŋ hewɔ lɛ amɛhiii yeli tete.

³ Yehowa bi mi akɛ, “Yeremia, mɛni onaa nɛɛ?” Mihere nɔ akɛ, “Agbãmii; ni amɛteŋ agbãmii kpakpai lɛ, amɛhi jogbaŋŋ diɛŋtsɛ; shi amɛteŋ gbohii lɛ, amɛhiii, ni hilɛ ni amɛhiii sɔŋŋ hewɔ lɛ amɛhiii yeli tete.”

⁴ Kɛkɛ ni Yehowa kɛɛ mi akɛ,

⁵ “Nɔ ni mi, Yehowa, Israel Nyɔŋmɔ lɛ mikɛɔ ji akɛ bɔ ni agbãmii kpakpai lɛ hi lɛ, nakai nomi ni jɛ Yuda, mɛi ni mijie kɛjɛ biɛ nɛɛ kɛtee Babilon shikpɔŋ lɛ nɔ lɛ yɔɔ yɛ mihiɛ; majie mlijɔlɛ kpo matsɔ̃ɔ amɛ.

⁶ Mahã mihiŋmɛi akã amɛhe ni mafee amɛ ekpakpa; ni mikɛ amɛ baaku sɛɛ kɛba nɛkɛ shikpɔŋ nɛɛ nɔ ekoŋŋ. Matswa amɛ mamã shi tamɔ amãa tsu, ni mikumɔŋ amɛ; matɛo amɛ tamɔ atɛoɔ tso, ni mifamɔŋ amɛ mishwieŋ.

⁷ Mibahã amɛ tsui ni baahã amɛle mi akɛ mi ji Yehowa; ni amɛbaatsɔ̃ miwebii, ni mibatsɔ̃ amɛNyɔŋmɔ, ejaakɛ amɛbaaku amɛsɛɛ kɛba miŋɔɔ kɛ amɛtsui fɛɛ.

⁸ “Shi nɔ ni mi, Yehowa, mikɛɔ nɛ, bɔ ni mibafee agbãmii gbohii nɛɛ ni hilɛ ni amɛhiii sɔŋŋ hewɔ lɛ amɛhiii yeli tete lɛ, nakai mibafee Yuda Maŋtsɛ Zedekia kɛ elumɛi lɛ kɛ mɛi fɛɛ ni shwɛ yɛ Yerusalɛm maŋ lɛ mli ni yɔɔ nɛkɛ shikpɔŋ nɛɛ nɔ, kɛ mɛi ni yɔɔ Ijipt shikpɔŋ lɛ nɔ lɛ fɛɛ.

⁹ Mibahã amɛtsɔ̃ gbeyei nɔ amɛhã shikpɔŋ lɛ nɔ maŋtsɛyelihei fɛɛ; ni abaaye amɛhe fɛo, ni abaabɔ amɛ ahora, ni amɛbaatsɔ̃mɔ mɛi ni alomɔ amɛ yɛ hei fɛɛ ni mibagbɛ amɛ mashwã kɛya lɛ.

¹⁰ Mibahã ta kɛ hɔmɔ kɛ gbele hela abote amɛteŋ kɛyashi abaakpãtã amɛ fɛɛ amɛhiɛ yɛ shikpɔŋ ni mikɛhã amɛ kɛ amɛtsɛmɛi lɛ nɔ.”