Yeremia 21 - ŊMALƐ KRƆŊKRƆŊ LƐAgba akɛ henyɛlɔi baaŋɔ Yerusalɛm 1 Wiemɔ ni Yehowa kɛ Yeremia wie nɛ, be ni Yuda Maŋtsɛ Zedekia tsu Malkia bi Pashur kɛ Maaseia bi Osɔfo Zefania kɛtee Yeremia ŋɔɔ ni amɛyakɛɛ lɛ akɛ, 2 “Ofainɛ, bi Yehowa nii ohã wɔ, ejaakɛ Nebukadnezar, Babilon maŋtsɛ lɛ efã ta ebatua wɔ. Eko lɛ aleenɔ Yehowa aaafee enaakpɛɛnii lɛ eko yɛ wɔhewɔ koni no ahã Nebukadnezar kɛ eta lɛ aku esɛɛ kɛya.” 3 Kɛkɛ ni Yeremia kɛɛ amɛ akɛ, 4 “Nyɛyakɛa Maŋtsɛ Zedekia akɛ bɔ ni Yehowa, Israel Nyɔŋmɔ lɛ, kɛɛ nɛ, ‘Naa, mibakpãtã tawuunii ni nyɛhiɛ yɛ nyɛdɛŋ lɛ ahiɛ, tawuunii ni nyɛhiɛ ni nyɛkɛ Babilon maŋtsɛ lɛ kɛ etabilɔi Kaldeabii ni esa nyɛyi yɛ Yerusalɛm gbogboi lɛ asɛɛ lɛ wuɔ lɛ; mibabua fɛɛ naa kɛba maŋ lɛ teŋ. 5 Mibagri, ni mi diɛŋtsɛ moŋ mikɛ nyɛ baawu kɛ nineshiwalɛ yɛ mlifu kɛ mlila naa. 6 Ni mibatswia maŋ nɛɛ mli gbɔmɛi kɛ kooloi fɛɛ nii, ni gbele hela ni yɔɔ gbeyei baagbegbee amɛ. 7 Yuda Maŋtsɛ Zedekia kɛ etsuji kɛ maŋbii fɛɛ ni ahe baaje gbele hela lɛ loo klante naa gbele lɛ loo hɔmɔ naa gbele lɛ mli lɛ, majɔɔ amɛnɔ mahã Babilon maŋtsɛ Nebukadnezar kɛ maŋbii ahenyɛlɔi ni taoɔ maŋbii ahiɛkpãtãmɔ lɛ, ni Nebukadnezar baagbe amɛ yɛ klante naa. Enaŋ mɔbɔ lɛ, emusuŋ eshaŋ lɛ, ni ehaŋ mɔ ko aye ehe hu.’ 8 “Agbɛnɛ Yehowa kɛɛ mi akɛ mikɛɛ Yerusalɛmbii lɛ akɛ, nɔ ni Yehowa kɛɛ nɛ, ‘Naa, mikɛ wala gbɛ kɛ gbele gbɛ fɛɛ miishwie nyɛhiɛ. 9 Mɔ fɛɛ mɔ ni aaahi maŋ nɛɛ mli lɛ, ebaagbo yɛ ta mli loo kɛtsɔ̃ hɔmɔ nɔ loo kɛtsɔ̃ gbele hela nɔ. Shi mɔ ni baaje kpo eya koni ekɛ ehe ayahã Babilonbii ni ebasa nyɛyi yɛ nyɛmaŋ lɛ mli lɛ, ehiɛ aaakã ni ewala aaatsɔ̃ tamɔ ahuutoonii ni ena yɛ ta lɛ mli. 10 Ejaakɛ mijie mihiɛ mika maŋ nɛɛ akɛ efɔŋ ji nɔ ni mibafee amɛ; shi jeee ekpakpa. Aaatu maŋ lɛ awo Babilon maŋtsɛ lɛ dɛŋ, ni eeema enaa lá, ni eeeshã lɛ wɛɛ. Mi Yehowa, mikɛɛ.’ ” Yuda Maŋtsɛwe lɛ toigbalamɔ 11 Kɛkɛ ni Yehowa kɛɛ mi koni mikɛɛ Yuda maŋtsɛ lɛ we lɛ akɛ, “Nyɛboa nɔ ni Yehowa kɛɛ toi, 12 Nyɛ David shwiei! Nyɛyea jalɛ sane be fɛɛ be. Mɔ ni ayeɔ lɛ amim lɛ nyɛhea lɛ yɛ mɔ ni yeɔ lɛ amim lɛ dɛŋ, kɛjeee nakai lɛ no lɛ nyɛnifeemɔnii fɔ̃ji lɛ ahewɔ lɛ, mimlila aaatso yɛ nyɛnɔ tamɔ la, ni ebaatso, ni mɔ ko mɔ ko nyɛŋ agbe.” 13 Naa, nyɛ mɛi fɛɛ ni nyɛyɔɔ jɔɔ shikpɔŋ lɛ nɔ kɛ nyɛ mɛi hu ni yɔɔ ŋa kplanaa lɛ nɔ tɛsaa lɛ nɔ, mikɛ nyɛ ena. Nyɛkɛɔ akɛ, “Namɔ baanyɛ wɔ ebatua, ni namɔ baanyɛ egbu kɛbabote wɔmaŋ lɛ mli?” 14 Yehowa kɛɛ, “Shi naa, mibagbala nyɛtoi yɛ yibii ni nyɛjeŋba ewo lɛ naa. Mibama nyɛkoo lɛ naa la, ni la nɛɛ baashã nɔ fɛɛ nɔ ni bɔle lɛ. Mi Yehowa, mikɛɛ.” |
Bible in Ga Language © Bible Society of Ghana, 2020.
Bible Society of Ghana