Yeremia 20 - ŊMALƐ KRƆŊKRƆŊ LƐ

Osɔfo Pashur mli fu Yeremia

¹ Be ni Yeremia gba nɛkɛ gbalɛi nɛɛ lɛ, Osɔfo Pashur, Imer bi lɛ, ni lɛ ji Yehowa Sɔlemɔ we lɛ mli tsulɔnukpa fe fɛɛ lɛ, nu nɔ ni Yeremia kɛɛ lɛ.

² Kɛkɛ ni Pashur hã agwao Gbalɔ Yeremia, ni no sɛɛ lɛ abɔ lɛ apã yɛ Benyamin Agbo lɛ ni yɔɔ Sɔlemɔ we lɛ yiteŋgbɛ lɛ naa.

³ Enɔ jetsɛremɔ be ni Pashur fɛne Yeremia yɛ apã lɛ mli sɛɛ lɛ, Yeremia kɛɛ lɛ akɛ, “Yehowa tsɛŋ ogbɛi akɛ Pashur dɔŋŋ; shi moŋ abaatsɛ bo ‘Gbeyeinɔ,’ yɛ he fɛɛ he;

⁴ ni Yehowa diɛŋtsɛ ekɛɛ akɛ, ‘Naa, mahã otsɔ̃ gbeyeinɔ ohã bo diɛŋtsɛ ohe kɛ onanemɛi fɛɛ, ni ohiŋmɛi jwere nɔ nɛkɛ nɔŋŋ ni amɛaanyɔnyɔi yɛ amɛhenyɛlɔi aklante naa. Majɔɔ Yuda fɛɛ nɔ mawo Babilon maŋtsɛ lɛ dɛŋ, ni ebaaŋɔ maŋbii lɛ kɛaatee Babilon ni ebaaya eyagbe amɛ kɛ klante.

⁵ Asaŋ maŋ nɛɛ nii ni eyɔɔ kɛ nii ni egbo he deŋme kɛna kɛ enibii ni jara wa hã lɛ kɛ Yuda maŋtsɛmɛi ajwetrii lɛ fɛɛ lɛ majɔɔ nɔ mahã maŋbii lɛ ahenyɛlɔi lɛ, ni amɛbaaha ni amɛbaashɔ̃ yɛ maŋbii lɛ adɛŋ ni amɛbaaloo kɛya Babilon.

⁶ Ni bo Pashur tuuŋtu lɛ, abaaŋɔ bo kɛ oshĩa mli bii fɛɛ nom kɛaatee Babilon. Jɛi oooyagbo yɛ, ni jɛi nɔŋŋ aaafu bo kɛ onanemɛi fɛɛ ni ogba amale gbalɛ otsɔ̃ɔ amɛ lɛ yɛ.

Yeremia ye ŋkɔmɔ etsɔ̃ɔ Yehowa

⁷ Ao! Yehowa, olaka mi, ni mitsɔ̃ mɔ ni alaka lɛ. Oyɛ hewalɛ fe mi, ni oye minɔ. Mitsɔ̃ mɔ ni aŋmɔɔ lɛ daa jenamɔ; mɔ fɛɛ mɔ po yeɔ mihe fɛo.

⁸ Be fɛɛ be ni miwieɔ lɛ, ja mibolɔ; mibolɔɔ akɛ, “Yiwalɛ sɔŋŋ!” Kɛ “niiahiɛkpãtãmɔ.” Ejaakɛ Yehowa wiemɔ lɛ hewɔ lɛ abɔɔ mi ahora, ni ayeɔ mihe fɛo daa jenamɔ.

⁹ Kɛji mikɛɛ akɛ, “Mitsiŋ Yehowa tã, ni miwieŋ yɛ egbɛi mli dɔŋŋ lɛ,” minuɔ he yɛ mitsuiŋ akɛ nɔ ko miitso tamɔ la ni atsi naa awo miwui amli. La nɛɛ naatsii etɔ mi, ni minyɛɛɛ dɔŋŋ.

¹⁰ Minuɔ akɛ aawie ablɛbi akɛ, “He fɛɛ he efee gbeyei. Nyɛfolɔa enaa, nyɛhãa wɔfolɔ enaa!” Minanemɛi tete ni kɛɔ enɛ nɛɛ, ni amɛmiikwɛ akɛ minane aaatɔ̃tɔ̃ lo. Amɛkɛɛ akɛ, “Eko lɛ aaalaka lɛ ni wɔnine aaashɛ enɔ, ni wɔɔtɔ wɔhe owele yɛ enɔ.”

¹¹ Shi Yehowa kɛ mi yɛ eji kãkãlɔ ni asheɔ lɛ gbeyei. No hewɔ lɛ, miyiwalɔi lɛ baatɛrɛ; amɛhiɛ baagbo kpɔtɔkpɔtɔɔ, ejaakɛ amɛyeŋ minɔ kunim. Amɛhiɛgbele lɛ, hiɛ kpaŋ nɔ kɛmiiya naanɔ tɔ̃ɔ.

¹² Ao, Yehowa, Taiatsɛ ni okaa jalɔ okwɛɔ, ni onaa etsuiŋ kɛ eyitsoŋ saji fɛɛ, hã mana amɛnɔ owele ni obaatɔ lɛ, ejaakɛ mitu misane lɛ miwo odɛ̃ŋ.

¹³ Nyɛlaa nyɛhãa Yehowa. Nyɛjiea Yehowa yi. Ehereɔ ohiafo yiwala yɛ yiwalɔi adɛŋ.

¹⁴ Alomɔ gbi ni afɔ mi lɛ, gbi nɔ ni minyɛ fɔ mi lɛ akajɔɔ nakai gbi lɛ kɔkɔɔkɔ.

¹⁵ Alomɔ nuu ni bakɛɛ mitsɛ akɛ, “Afɔ binuu ahã bo,” ni no hã emii shɛ ehe lɛ.

¹⁶ Nakai nuu lɛ atsɔ̃ tamɔ maji ni Yehowa kpãtã amɛhiɛ, ni amɛnii efeee lɛ mɔbɔ lɛ. Hã enu blɔmɔ he leebi kɛ tayaa oshebɔɔ he shwane,

¹⁷ ejaakɛ egbeee mi ewooo minyɛ musuŋ koni minyɛ musuŋ atsɔ̃ migbonyobu koni musu lɛ ahi ehe kɛya naanɔ.

¹⁸ Mɛɛba kwraa mijɛ musuŋ mije kpo koni mibagbo deŋme ni maye awerɛhoo ni mijeŋshihilɛ naagbee afee hiɛgbele nɛkɛ?