Yeremia 16 - ŊMALƐ KRƆŊKRƆŊ LƐ

Yehowa yiŋtoo yɛ Yeremia wala he

¹ Yehowa kɛɛ mi akɛ,

² “Kaakpee yoo yɛ nɛkɛ shikpɔŋ nɛɛ nɔ, ni okafɔ bihii loo biyei yɛ biɛ nɛɛ,

³ ejaakɛ nɔ ni baaba bihii kɛ biyei ni afɔ yɛ biɛ kɛ amɛtsɛmɛi lɛ kɛ amɛnyɛmɛi lɛ ni fɔfɔɔ amɛ yɛ biɛ lɛ fɛɛ anɔ nɛ.

⁴ Gbele helai baagbegbee amɛ; ayeŋ amɛhe ŋkɔmɔ, ni afuŋ amɛgbohii lɛ tete; ni amɛbaajwere shikpɔŋ lɛ nɔ tamɔ wamɔ. Amɛbaanyɔnyɔi yɛ klante kɛ hɔmɔ naa, ni amɛgbohii lɛ baatsɔ̃ niyenii ahã loofɔji kɛ jwɛiiaŋ kooloi.

⁵ “Kaaya shĩa ko ni afeɔ yara yɛ mli mli, ni kaaye ŋkɔmɔ, ni kaaye amɛ ŋkɔmɔ hu, ejaakɛ hejɔlɛ ni mihã amɛ kɛ mimlihilɛ kɛ mimusuŋtsɔlɛ ni miyɔɔ hã amɛ lɛ mifo fɛɛ sɛɛ.

⁶ Amɛteŋ mɛi wuji kɛ mɛi bibii lɛ fɛɛ baagboi yɛ shikpɔŋ nɛɛ nɔ. Afuŋ amɛ, ni afeŋ amɛyara hu. Mɔ ko mɔ ko bãmɔŋ ehe kɛ kakla aloo eshɛŋ eyiteŋ kɛyeŋ amɛgbohii lɛ ahe ŋkɔmɔ.

⁷ Mɔ ko mɔ ko eyaŋ ekɛ ŋkɔmɔyelɔ ko ayaye nii koni ekɛshɛje emii yɛ mɔ ko ni egbo hewɔ. Nakai nɔŋŋ mɔ ko mɔ ko haŋ mɔ ko ni etsɛ loo enyɛ egbo nɔ ko ni enu ekɛsheje mɔ lɛ mii.

⁸ “Kaaya shĩa ko ni aŋmɛ okplɔ̃ yɛ mli mli ni okɛ mɛi yata shi oye nii ni ayeɔ lɛ eko, ni onu nɔ ni anuɔ lɛ hu eko.

⁹ Ejaakɛ nɔ ni mi, Yehowa Taiatsɛ, Israel Nyɔŋmɔ lɛ, kɛɔ nɛ, ‘Naa, mibahã nyamɔ kɛ miishɛɛ gbee kɛ ayɛmforowu kɛ ayɛmforo gbee fɛɛ sɛɛ afo yɛ shikpɔŋ nɛɛ nɔ yɛ nyɛhiɛ, kɛ nyɛyinɔ nɛɛ.’

¹⁰ “Kɛji okɛ maŋbii lɛ wie wiemɔi nɛɛ fɛɛ ni amɛbi bo akɛ, ‘Mɛni hewɔ ni Yehowa to eyiŋ ni egbala wɔtoi waa nɛkɛ? Mɛni tɔ̃mɔ wɔtɔ̃? Mɛɛ esha po ji nɔ ni wɔfee wɔshi Yehowa, wɔNyɔŋmɔ lɛ?’ lɛ,

¹¹ no lɛ okɛɛ amɛ akɛ, mi Yehowa, mikɛɛ akɛ, ‘Nyɛtsɛmɛi lɛ kwa mi, ni amɛtee amɛyanyiɛ nyɔŋmɔi krokomɛi asɛɛ, ni amɛsɔ̃mɔ amɛ, ni amɛja amɛ; amɛkwa mi ni amɛyeee mimla lɛ nɔ.

¹² Ni nyɛ lɛ nyɛfee efɔŋ fe nyɛtsɛmɛi lɛ tete, ejaakɛ naa nyɛteŋ mɔ fɛɛ mɔ nyiɛɔ nɔ ni etsui fɔŋ lɛ kɛɔ lɛ lɛ sɛɛ, ni ekpɛlɛ̃ɛɛ akɛ eboɔ mi toi.

¹³ No hewɔ lɛ, mashɛrɛ nyɛ kɛje shikpɔŋ nɛɛ nɔ mashwie shikpɔŋ ko nɔ, he ni nyɛ kɛ nyɛtsɛmɛi lɛ tete leee koni nyɛyasɔ̃mɔ nyɔŋmɔi krokomɛi shwaneshwane kɛ nyɔɔŋnyɔɔŋ fɛɛ yɛ jɛi, ejaakɛ minaŋ nyɛ mɔbɔ.’ ”

Abaajɛ Nomŋɔɔ mli aba

¹⁴ Yehowa kɛɛ akɛ, “Naa, be miiba ni akɛ Yehowa gbɛi kãŋ kitã lɛ, akɛŋ hu dɔŋŋ akɛ, ‘Mina Yehowa, mɔ ni jie Israelbii kɛje Ijipt shikpɔŋ lɛ nɔ lɛ,’

¹⁵ shi moŋ abaakɛɛ akɛ, ‘Mina Yehowa, mɔ ni jie Israelbii kɛjɛ kooyigbɛ shikpɔŋ lɛ nɔ kɛ shikpɔji fɛɛ ni eshwie amɛ kɛtee nɔ lɛ anɔ kɛba ekoŋŋ lɛ.’ Ejaakɛ mibakpala amɛ kɛba amɛ diɛŋtsɛ amɛshikpɔŋ lɛ nɔ ekoŋŋ, ni ji shikpɔŋ ni mikɛhã amɛtsɛmɛi lɛ.”

Toigbalamɔ ni baa lɛ

¹⁶ “Naa, miitsu koni ayaŋɔ wolɛimɛi pii abahã mi koni amɛbahɛ amɛ. No sɛɛ lɛ, mibatsu koni ayaŋɔ gbɔbilɔi abahã mi ni amɛbagbɔbi amɛ yɛ gɔji kɛ gɔ̃ŋkpɔi kɛ tɛkploi afɔji blublu amli.

¹⁷ Ejaakɛ nɔ fɛɛ nɔ ni amɛfeɔ lɛ mihiŋmɛii jwere nɔ, eko eko bɛ ni minaaa.

¹⁸ Mibawo tɔ̃mɔi ni amɛtɔ̃ kɛ eshai ni amɛfee lɛ ahe nyɔmɔ toi enyɔ, ejaakɛ amɛkɛ amɛyakayaka amãgãi foji lɛ ebule mishikpɔŋ lɛ; amɛhã enɔ eyi tɔ kɛ amɛmusubɔɔ nii lɛ.”

Yeremia sɔle kɛ hiɛnɔkãmɔ

¹⁹ “Yehowa, bo ji mihewalɛ kɛ mimɔɔ ni wa kɛ mibobaahe yɛ fimɔ be mli. Bo oŋɔɔ maji aaajɛ je lɛ naagbeehei aba, ni amɛaakɛɛ akɛ, Wɔtsɛmɛi lɛ ebanaaa gboshinii ko akɛ ja lakamɔ kɛ yaka nibii ni ahe bɛ sɛɛnamɔ ko.

²⁰ Aso gbɔmɔ adesa aaanyɛ nyɔŋmɔi efee ehã lɛ diɛŋtsɛ ehe? Nɔ ni eeefee lɛ jeee nyɔŋmɔ ni.”

²¹ Kɛkɛ ni Yehowa kɛɛ akɛ, “Enɛ hewɔ lɛ, naa, mibahã amɛna amɛle shi kome nɛɛ kɛwula shi nɔ hewalɛ kɛ nyɛmɔ ni miyɔɔ koni amɛna amɛle akɛ mi ji Yehowa.”