Yeremia 11 - ŊMALƐ KRƆŊKRƆŊ LƐ

Yeremia kɛ Kpãŋmɔ lɛ

¹ Yehowa kɛɛ Yeremia akɛ,

² “Bo kpãŋmɔ nɛɛ mli wiemɔi lɛ toi koni okɛ Yudabii kɛ Yerusalɛmbii lɛ awie.

³ Okɛɛ amɛ akɛ bɔ ni Yehowa, Israel Nyɔŋmɔ lɛ, kɛɛ nɛ. Mɔ ni yeee kpãŋmɔ nɛɛ nɔ lɛ alomɔ lɛ.

⁴ Kpãŋmɔ nɛɛ ji kpãŋmɔ ni mi kɛ nyɛtsɛmɛi lɛ kpãŋ, asaŋ ni miwo amɛ kitã yɛ he be ni mijie amɛ kɛjɛ Ijipt shikpɔŋ lɛ nɔ, he ni amɛhe dɔ la yɛ, tamɔ dade flɔnɔɔŋ lɛ. Mifã nyɛ akɛ nyɛbo migbee toi, ni nyɛye nibii ni mikɛɛ nyɛ lɛ fɛɛ nɔ, koni nyɛtsɔ̃ mimaŋ, ni mi hu matsɔ̃ nyɛNyɔŋmɔ,

⁵ bɔ ni afee ni matsu kitã ni mikã nyɛtsɛmɛi lɛ he nii, no ji akɛ mahã amɛ shikpɔŋ kpakpa ni baa nii koni amɛhi nɔ tamɔ bɔ ni eyɔɔ ŋmɛnɛ nɛɛ lɛ.” Kɛkɛ ni mihere nɔ akɛ, “Yehowa, aba mli nakai.”

⁶ Ni Yehowa kɛɛ mi akɛ, “Yaashiɛ wiemɔi nɛɛ fɛɛ yɛ Yuda maji kɛ Yerusalɛm blohuiaŋ ni okɛɛ akɛ, ‘Nyɛboa nɛkɛ kpãŋmɔ nɛɛ mli wiemɔi lɛ toi, ni nyɛyea nɔ.

⁷ Ejaakɛ mikpã miwo nyɛtsɛmɛi lɛ atoiŋ gbi nɔ ni mijie amɛ kɛje Ijipt shikpɔŋ lɛ nɔ lɛ, ni mikã he miikpã miiwo amɛtoiŋ lolo kɛbashi ŋmɛnɛ gbi nɛɛ akɛ, nyɛboa migbee toi.

⁸ Shi amɛbuuu, ni amɛbooo toi hu, ni mɔ fɛɛ mɔ kɛ tsuiwalɛ fee nɔ ni lɛ esumɔɔ. No hewɔ lɛ, mikɛ kpãŋmɔ kome too nɛɛ nɔŋŋ ni miwo amɛ kitã yɛ he akɛ amɛye nɔ, shi amɛyeee nɔ lɛ mli wiemɔi lɛ nɔŋŋ gbala amɛtoi.’ ”

⁹ Yehowa kɛɛ mi ekoŋŋ akɛ, “Yudabii kɛ Yerusalɛmbii lɛ etse mihiɛ atua.

¹⁰ Amɛku amɛsɛɛ amɛmiifee nibii fɔ̃ji ni amɛblematsɛmɛi ni booo miwiemɔ toi lɛ fee lɛ nɔŋŋ. Amɛtee amɛmiija nyɔŋmɔi krokomɛi. Israelbii kɛ Yudabii lɛ fɛɛ ekũ mikpãŋmɔ ni mi kɛ amɛtsɛmɛi lɛ kpãŋ lɛ mli.

¹¹ No hewɔ lɛ, naa, nɔ ni mi, Yehowa, mikɛɔ ji akɛ mibahã sane fɔŋ aye amɛ, ni amɛhe ejeŋ mli. Amɛbaablɔ amɛtsɛ mi nɛ, shi miboŋ amɛ toi.

¹² Kɛkɛ lɛ Yuda maji lɛ amli bii lɛ kɛ Yerusalɛm maŋbii lɛ hu baaya amɛyabolɔ amɛtsɛ nyɔŋmɔi ni amɛshãa tsofakɛŋma amɛhãa lɛ, shi nyɔŋmɔi nɛɛ nyɛŋ amɛyiwala amɛhere kwraa yɛ amɛfimɔ be lɛ mli.

¹³ Ao! Yuda, onyɔŋmɔi lɛ ayi efa tamɔ omaji lɛ ayifalɛ, ni bɔ ni gbɛjegbɛi ni yɔɔ Yerusalɛm maŋ lɛ mli lɛ fa lɛ, nakai nyɛmamɔ afɔleshãa latɛi nyɛkɛfeɔ hiɛgbejianii, no ji nyɛkɛshãa tsofakɛŋma nyɛhãa Baal.

¹⁴ No hewɔ lɛ, bo, Yeremia, kaakpa mi fai ohã gbɔmɛi nɛɛ; asaŋ kaabolɔ osɔle ohã amɛ, ejaakɛ miboŋ toi be mli ni amɛaatsɛ mi yɛ amɛfimɔ mli lɛ.”

¹⁵ Etee nɔ ekɛɛ akɛ, “Mɛɛ gbɛnaa misuɔlɔ yɔɔ yɛ miSɔlemɔ we be mli ni eyafee nifɔɔjianii ni mihiɔ lɛ? Ani naashiwoo kɛ kooloo afɔleshãa baanyɛ atsi hiɛkpãtãmɔ ni baa lɛ naa lo? Ani omii aaashɛ ohe lo?

¹⁶ Nyɛsɛɛ ko lɛ Yehowa wo bo gbɛi, ‘Mutso ni ebu fɛɛfɛo ni woɔ yibii kpakpai.’ Shi agbɛnɛ Yehowa baahã ahum kpeteŋkple ko agba ni ebaasɔo tso nɛɛ naa la, ni ebaashã kɛ ehe niji fɛɛ.

¹⁷ “Naa, Yehowa, Taiatsɛ, mɔ ni batɛo bo yɛ biɛ lɛ ewie efɔŋ eshi bo, ejaakɛ Israelbii kɛ Yudabii efee nɔ fɔŋ, no ji akɛ amɛshã tsofakɛŋma amɛhã Baal amɛkɛwo mimli la.”

Akpãŋ Yeremia yinɔ

¹⁸ Yehowa hã mile, ni esaa eka nɔ ehã mi ekoŋŋ akɛ atee miyinɔ apam, ni miyoo yiŋtoo lɛ.

¹⁹ Mitamɔ too gwantɛŋ ni he jɔ, ni akpala lɛ kɛtee koni ayagbe lɛ. Shi mileee kwraa akɛ mi mihe ŋaa fɔŋ amɛto be ni akɛɛ akɛ, “Nyɛhãa wɔkpatãa tso lɛ kɛ eyibii lɛ fɛɛ hiɛ; nyɛhãa wɔjiea lɛ yɛ hiɛkãalɔi aje lɛ mli koni akakai lɛ kwrakwra dɔŋŋ lɛ.”

²⁰ Kɛkɛ ni misɔle nɛkɛ, “Ao! Yehowa, Taiatsɛ, bo ni okojoɔ yɛ jalɛ naa, bo ni okaa gbɔmɔ susumɔ kɛ etsui fɛɛ okwɛɔ, hã mana owele ni obaatɔ yɛ gbɔmɛi nɛɛ anɔ lɛ; ejaakɛ bo odɛ̃ŋ mitu misane lɛ fɛɛ miwo.”

²¹ No hewɔ lɛ, Anatotbii lɛ ni tao mi amɛgbe, ni no hewɔ lɛ, amɛkɛɛ akɛ, “Kaagba yɛ Yehowa gbɛi mli dɔŋŋ, no lɛ wɔbaagbe bo” lɛ,

²² nɔ ni Yehowa kɛɛ yɛ amɛhe nɛ, “Naa, mibagbala amɛtoi, amɛblahii lɛ baagboi yɛ ta mli, ni amɛbihii lɛ kɛ amɛbiyei lɛ baagboi kɛ hɔmɔ,

²³ bɔ ni eshwɛŋ mɔ ko ehaŋ amɛ, ejaakɛ afi nɔ ni mibagbala Anatotbii lɛ atoi lɛ, mibahã sane fɔŋ aye amɛ pam.”