Yakobo 5 - ŊMALƐ KRƆŊKRƆŊ LƐ

Niiatsɛmɛi shishiulɔi anaagbee

¹ Agbɛnɛ, nyɛ niiatsɛmɛi, nyɛfoa ni nyɛwɔa lele yɛ awerɛhoianii ni baaba nyɛnɔ lɛ ahewɔ!

² Nyɛnii ni nyɛna lɛ eshara, ni nyɛtaadei lɛ hu omlɛgɛi eye.

³ Nyɛshika kɛ nyɛjwiɛtɛi lɛ edɔ ŋkanale, ni amɛhe ŋkanale lɛ aaaye odase ashi nyɛ, ni eeeye nyɛhewojiaŋ tamɔ lá. Nyɛbɔ jwetri yɛ naagbee gbii lɛ amli.

⁴ Naa, nitsulɔi ni kpa nyɛŋmɔjiaŋnii lɛ anyɔmɔwoo ni nyɛkɛhãaa amɛ lɛ miibolɔ, ni nikpalɔi lɛ abolɔmɔi lɛ ebabote tai aNuŋtsɔ lɛ toiiaŋ.

⁵ Nyɛye nyɛnaanii yɛ shikpɔŋ lɛ nɔ, ni nyɛbɔ ahoshwi. Nyɛ lɛ, nyɛtsuii ni ewo fɔ kɛhã gbee gbi lɛ.

⁶ Nyɛbu jalɔ lɛ fɔ, ni nyɛgbe lɛ, etsĩii nyɛ gbɛ.

Tsuishiŋmɛɛ kɛ Sɔlemɔ

⁷ No hewɔ lɛ, anyɛmimɛi, nyɛŋmɛa nyɛtsui shi kɛyashia Nuŋtsɔ lɛ baa be lɛ. Naa, okwaafonyo lɛ mɛɔ shikpɔŋ nɔ nibaanii ni jara wa lɛ, ni eŋmɛɔ etsui shi yɛ he kɛyashiɔ beyinɔ ni enaa Agbiɛnaa kɛ Gbo nunɛmɔ lɛ.

⁸ Nyɛ hu nyɛŋmɛa nyɛtsui shi, ni nyɛnaa hiɛnɔkãmɔ ni nyɛdamɔa shi shiŋŋ, ejaakɛ Nuŋtsɔ lɛ baa be lɛ eshɛ etã.

⁹ Nyɛkadɔmɔa ŋtsɔi nyɛwowoa nyɛhe, anyɛmimɛi, koni akakojo nyɛ. Naa, kojolɔ lɛ damɔ shinaa lɛ naa.

¹⁰ Minyɛmimɛi, nyɛkɛ gbalɔi ni wie yɛ Nuŋtsɔ lɛ gbɛi mli lɛ afea amanehulu kɛ tsuishiŋmɛɛ nɔkwɛmɔnɔ.

¹¹ Naa, wɔbuɔ mɛi ni mĩaa amɛhiɛ lɛ akɛ mɛi ni ajɔɔ amɛ. Nyɛnu Hiob hiɛmiamɔ lɛ he, kɛ bɔ ni Nuŋtsɔ lɛ hã enaagbee fee hã; ejaakɛ Nuŋtsɔ lɛ mli tsɔ̃ɔ lɛ babaoo, ni enaa mɔbɔ.

¹² Shi titri lɛ, minyɛmimɛi, nyɛkakãa kitã, nyɛkakɛa akɛ “mina ŋwɛi”, aloo “mina shikpɔŋ”, aloo nyɛkã kitã kroko; shi nyɛ—“hɛɛ” lɛ afee “hɛɛ”, ni “dabi” lɛ afee “dabi”, koni nyɛkagbee kojomɔ mli.

¹³ Nyɛteŋ mɔ ko miina amanehulu lo? Esɔle. Mɔ ko ena tsuijurɔ? Ela yijiemɔ lalai.

¹⁴ Nyɛteŋ mɔ ko nãaa hewalɛ? Etsɛ asafo lɛ mli onukpai lɛ kɛba eŋɔɔ, ni amɛfɔ lɛ mu yɛ Nuŋtsɔ lɛ gbɛi mli ni amɛsɔle amɛhã lɛ.

¹⁵ Ni sɔlemɔ ni jɛ hemɔkɛyeli mli lɛ aaahere helatsɛ lɛ yiwala, ni Nuŋtsɔ lɛ aaatee lɛ shi, ni kɛji efee esha lɛ, akɛaafa lɛ.

¹⁶ No hewɔ lɛ, nyɛjajea nyɛnɔtɔ̃mɔi lɛ nyɛtsɔ̃ɔtsɔ̃a nyɛhe, ni nyɛsɔlea nyɛhãa nyɛhe ni nyɛhe atã. Jalɔ sɔlemɔ ni mli wa lɛ nyɛɔ nii babaoo etsuɔ.

¹⁷ Elia ji gbɔmɔ adesa tamɔ wɔ nɔŋŋ, ni esɔle sɔlemɔ ko koni nu akanɛ, ni nu enɛɛɛ yɛ shikpɔŋ lɛ nɔ afii etɛ̃ kɛ nyɔji ekpaa sɔŋŋ.

¹⁸ Ni esaa esɔle, ni nu jɛ ŋwɛi shwie shi, ni shikpɔŋ lɛ ba enii.

¹⁹ Anyɛmimɛi, kɛji nyɛteŋ mɔ ko du gbɛ kɛjɛ anɔkwale lɛ mli ni mɔ ko miikpale lɛ ekoŋŋ lɛ,

²⁰ ele akɛ mɔ ni kpaleɔ eshafeelɔ kɛjɛɔ egbɛduu mli lɛ eehere gbɛdulɔ lɛ susuma yiwala kɛjɛ gbele mli, ni eeha eshai pii anɔ.