Yakobo 3 - ŊMALƐ KRƆŊKRƆŊ LƐ

Wiemɔ fɔŋ fiteɔ nii

¹ Tsɔɔlɔi akafa yɛ nyɛteŋ, minyɛmimɛi, ejaakɛ nyɛle akɛ wɔbaana kojomɔ ni mli wa fe mɛi krokomɛi anɔ.

² Ejaakɛ wɔ fɛɛ wɔtɔ̃ɔ babaoo. Kɛji mɔ ko tɔ̃ɔɔ yɛ wiemɔ mli lɛ, lɛ lɛ gbɔmɔ ni hi kɛwula shi ji lɛ, ni eyɛ hewalɛ akɛ ekɛaawo gbɔmɔtso muu lɛ fɛɛ manyoflɛ.

³ Shi kɛji wɔkɛ okpɔŋɔi amanyoflɛi wo amɛdaaŋ ni amɛbo wɔ toi lɛ wɔkɛkpalaa amɛgbɔmɔtso muu lɛ fɛɛ.

⁴ Naa, lɛji hu tsɛ amɛdara aahu, ni kɔɔyɔɔ ni naa wa kpalaa amɛ, shi kudɔɔ bibioo ko kɛkɛ akɛkudɔɔ amɛ kɛyaa he fɛɛ he ni kudɔɔtsɛ lɛ sumɔɔ.

⁵ Nakai nɔŋŋ lilɛi hu henɔ bibioo ni, shi eshwãa nii wuji. Naa, la bibioo hu, nyɛkwɛa koo bɔ sɔŋŋ ni eshãa!

⁶ Ni lilɛi lɛ hu, la ni; wɔhenii lɛ ateŋ lɛ, lilɛi ji nishaianii ajeŋ muu; ni ebuleɔ gbɔmɔtso muu lɛ fɛɛ ni emaa fɔmɔŋ tsakpãa lɛ naa la, ni abonsamiiaje enaa ela lɛ kɛjɛɔ.

⁷ Ejaakɛ kooloi kɛ loofɔji kɛ nii ni wamɔɔ kɛ nii ni yɔɔ ŋshɔ mli lɛ ahenɔ fɛɛ henɔ lɛ gbɔmɔ nyɛɔ jɔɔ amɛhe, ni ejɔɔ amɛhe.

⁸ Shi lilɛi lɛ, gbɔmɔ ko gbɔmɔ ko nyɛɛɛ ehe ajɔɔ; nɔ fɔŋ ni eflegeje ní eyi obɔ̃ kɛ ebɔɔ ní gbeɔ mɔ ni.

⁹ No nɔŋŋ wɔkɛjieɔ Nuŋtsɔ kɛ Tsɛ lɛ yi, ni no nɔŋŋ hu wɔkɛlomɔɔ gbɔmɛi ni abɔ yɛ Nyɔŋmɔ subaŋ nɔ lɛ.

¹⁰ Daa kome lɛ nɔŋŋ mli jɔɔmɔ kɛ loomɔ jɛɔ. Minyɛmimɛi, enɛɛmɛi nɛɛ, esaaa akɛ eba lɛ nakai.

¹¹ Aso nubu yɔɔ nɛɛ, ebaa nuŋma kɛ nu ni joɔ kɛjɛɔ hiŋmɛi kome lɛ nɔŋŋ mli?

¹² Minyɛmimɛi, aso agbãmi tso aaanyɛ mutso yibii awo? Aloo waintso aaawo agbãmi? Nakai nɔŋŋ kɛ̃ ŋoobu nyɛŋ nu ŋma aba.

Nilee ni jɛ ŋwɛi lɛ

¹³ Namɔ ji nilelɔ kɛ sanesɛɛkɔlɔ yɛ nyɛteŋ? Ekɛ jeŋba kpakpa atsɔ̃ɔ lɛ diɛŋtsɛ enitsumɔi lɛ yɛ nilee kpoofeemɔ mli.

¹⁴ Shi kɛ awuŋayeli fɔŋ kɛ bei yɛ nyɛtsui mli lɛ, nyɛkashwãa ni nyɛmalea nyɛshia anɔkwale lɛ.

¹⁵ Nɛkɛ nilee nɛɛ, jeee ŋwɛi ejɛ, shi moŋ shikpɔŋ nɔ nɔ ni, heloo naa nɔ ni, mumɔi fɔ̃ji anɔ ni.

¹⁶ Ejaakɛ he ni awuŋayeli kɛ bei yɔɔ lɛ, jɛi sakasakafeemɔ kɛ nishaianii fɛɛ yɔɔ.

¹⁷ Shi nilee ni jɛ ŋwɛi lɛ, klɛŋklɛŋ lɛ ehe tse, no sɛɛ lɛ ehe jɔ, ehiɛ kã shi, eboɔ toi, eyi obɔ̃ kɛ mɔbɔnalɛ kɛ yibii kpakpai, ejieee niiaŋ, efeee osato.

¹⁸ Shi jalɛ yibii lɛ, hejɔlɛ mli aduɔ yɛ ahãa mɛi ni feɔ hejɔlɛnii lɛ.