Yāfó 4 - ŊMALƐ KRƆŊKRƆŊ LƐ

Yerusalɛm fitemɔ lɛ sɛɛ sane

¹ Kwɛ bɔ ni shika edĩ tuŋŋ; bɔ ni shika ŋmiiŋmi etsake ehã! Agbɛ Sɔlemɔ we lɛ tɛi krɔŋkrɔŋi lɛ ashwã gbɛjegbɛ fɛɛ gbɛjegbɛ koŋ.

² Zion, oblahii ni ajara wa tamɔ shika ŋmiiŋmi lɛ, kwɛ bɔ ni amɛtsɔ̃ tamɔ gbɛshɔ̃lɔ ninenaa nitsumɔ.

³ Ŋaŋgbei tete hãa amɛbii fufɔ amɛkɛlɛɔ amɛ; shi mimaŋbii lɛ ayitsoŋ wa; amɛwaa amɛbii ayi, amɛtsɔ̃ tamɔ shiaŋa nɔ okpɔŋɔloofɔlɔ̃.

⁴ Gbekɛ fufɔoo sɛŋ gbiɔ kɛ kumai; gbekɛbii baa niyenii, shi mɔ ko mɔ ko hãaa amɛ.

⁵ Mɛi ni ye amɛnaa nii lɛ, ahiɛ ekpãtã yɛ blohuiaŋ; mɛi ni alɛ amɛ fɔfɔɔle lɛ jwere tumo nɔ lamlu mli.

⁶ Ejaakɛ mimaŋbii ahe esha lɛ da fe Sodom he esha lɛ, Sodom ni abutu lɛ hiŋmɛitswaa mli ni gbɔmɔ adesa nine bɛ mli lɛ.

⁷ Ebladei lɛ ahe tse keŋkeŋ, amɛyɛɔ fe ayilɔ, amɛgbɔmɔtsei yɛ hewalɛ fe teŋɛ̃lɛo, amɛhe fɛo tamɔ safiro.

⁸ Shi agbɛnɛ amɛhiɛiaŋ miidi fe ŋai, ni ayooo amɛ yɛ blohuiaŋ; amɛheloo egbi ekpɛtɛ amɛwui ahe, heloo lɛ egbi keketee tamɔ tso.

⁹ Mɛi ni nyɔnyɔi yɛ ta lɛ mli lɛ anɔ hi kwraa fe mɛi ni gboɔ yɛ hɔmɔ naa lɛ, fe mɛi ni ŋmɔshi nibaanii ni amɛnaaa amɛye ni no hã amɛtã loo ni amɛpiŋ lɛ.

¹⁰ Be ni akpãtãa mimaŋbii ahiɛ lɛ, yeifɔyei ni yɔɔ musuŋtsɔlɛ tete hoo amɛ diɛŋtsɛ amɛmusuŋbii amɛye.

¹¹ Yehowa gri kɛ mlila ni naa wa ni efã emlifu lɛ kɛ eshishi fɛɛ eshwie Zion nɔ; ni eshã maŋ lɛ kɛmɔ eshishitoo lɛ diɛŋtsɛ.

¹² Je lɛ mli maŋtsɛmɛi heee yeee, ni gbɔmɛi ni yɔɔ jeŋ hu heee yeee, akɛ henyɛlɔ ko aaanyɛ Yerusalɛm agboi amli ebote.

¹³ Shi eba mli, ejaakɛ Yerusalɛm gbalɔi lɛ fee esha, ni esɔfoi lɛ fee nɔ fɔŋ; amɛshwie jalɔi ala shi yɛ maŋ lɛ mli.

¹⁴ Amɛfo shi kɛnyiɛ blohui lɛ amli tamɔ shwilafoi. Lá ewu amɛhe kpɔtɔɔ bɔ sɔŋŋ ni mɔ ko kwraa nyɛɛɛ amɛtadei ahe eta.

¹⁵ Mɛi bolɔɔ woɔ amɛ akɛ, “Nyɛjea jɛi! Nyɛmɛi ni he tseee! Nyɛjea jɛi! Nyɛjea jɛi! Nyɛkataa nɔ ko he!” No hewɔ lɛ, amɛtsɔ̃mɔ kobɔfoi, ni majimajianɔbii kɛɛkɛɛ yɛ amɛteiaŋ akɛ, “Amɛkahi wɔteŋ dɔŋŋ!”

¹⁶ Yehowa diɛŋtsɛ egbɛ amɛ eshwã, ni ebuuu amɛhe akɔntaa dɔŋŋ; ebuuu osɔfoi lɛ dɔŋŋ, ni ehiɛ esɔɔɔ onukpai lɛ hu dɔŋŋ.

¹⁷ Wɔhiŋmɛi shiu kɛ yaka yelikɛbuamɔ gbɛ ni wɔkwɛɔ lɛ; wɔbu, ni wɔkwɛ jaku ko ni nyɛɛɛ wɔ ehere gbɛ.

¹⁸ Henyɛlɔi wɔɔ wɔ, ni no hewɔ lɛ, wɔnyɛɛɛ wɔblohuiaŋ tete wɔnyiɛ. Wɔnaagbee lɛ eshɛ, gbii lɛ etã; ejaakɛ wɔnaagbee lɛ eshɛ.

¹⁹ Mɛi ni nyiɛ wɔsɛɛ lɛ ahe yɛ oya fe okropɔŋ; amɛnyiɛ wɔsɛɛ yɛ gɔji lɛ anɔ, ni amɛwo wɔ ka yɛ shiaŋa lɛ nɔ.

²⁰ Mɔ dɛŋ ni wɔwala yɔɔ, ni ji maŋtsɛ ni Yehowa efɔ lɛ mu lɛ; amɛtsɔ̃ lɛ, ni amɛmɔ lɛ ŋaa mli. Lɛ ji mɔ ni wɔkɛɛ yɛ ehe akɛ, “Yɛ lɛ eshishi lɛ, wɔɔhi shi shweshweeshwe yɛ majimaji lɛ ateŋ” lɛ.

²¹ Edombii kɛ Uzbii ni yɔɔ shikpɔŋ lɛ nɔ, nyɛmli afilia nyɛ, ni nyɛnyaa, shi moŋ nyɛ hu amanehulu miiba. Nyɛaatɔ dãa, ni nyɛaajie nyɛyayaiaŋ nyɛfɔ̃ shi.

²² Ao! Zion, agbe otoigbalamɔ yɛ onishaianii lɛ ahewɔ lɛ naa. Nuŋtsɔ lɛ haŋ ohi nomŋɔɔ mli dɔŋŋ; shi moŋ bo Edom, ebaagbala otoi yɛ onishaianii lɛ ahewɔ; ebaahã ohe eshai lɛ abakã kpo nɔ.