Tito 2 - ŊMALƐ KRƆŊKRƆŊ LƐ

Jeŋba he nitsɔɔmɔi titrii komɛi

¹ Shi bo lɛ, wiemɔ nibii ni sa tsɔ̃ɔmɔ kpakpa lɛ.

² Hiimeji lɛ, amɛhiɛ akã shi, amɛfee mɛi ni hiɛ tsii, amɛjwɛŋmɔ akã shi, amɛfee mɛi ni yɔɔ hemɔkɛyeli kpakpa kɛ suɔmɔ kɛ hiɛmiamɔ.

³ Yeimeji hu nakai nɔŋŋ, amɛba amɛjeŋ bɔ ni sa mɛi krɔŋkrɔŋi lɛ. Amɛkafee amɛhe oshekuyelɔi, amɛkafee amɛhe mɛi ni dãa eŋɔ amɛ nom, amɛfee mɛi ni tsɔ̃ɔ nii kpakpai.

⁴ Koni amɛtsɔ̃ɔ oblayei lɛ ni amɛsumɔ amɛwumɛi, amɛsumɔ amɛbii,

⁵ amɛjwɛŋmɔ akã shi, amɛhe atse, amɛtsu amɛshĩa nii jogbaŋŋ, amɛmli ahi, amɛba amɛhe shi amɛhã amɛ diɛŋtsɛ amɛwumɛi, koni akawie Nyɔŋmɔ wiemɔ lɛ he musubɔɔ wiemɔ.

⁶ Oblahii hu nakai nɔŋŋ, wiemɔ otsɔ̃ɔ amɛ koni amɛjwɛŋmɔ akã shi.

⁷ Ni nɔ fɛɛ nɔ mli lɛ, ŋɔɔ bo diɛŋtsɛ ohe ofee nɔkwɛmɔnɔ ohã amɛ yɛ nitsumɔi kpakpai agbɛfaŋ. Nitsɔɔmɔ mli lɛ hã ana bo akɛ mɔ ni miifee kɛ tsui krɔŋŋ kɛ hiɛdɔɔ.

⁸ Owiemɔ ahi bɔ ni anaŋ he sane ko atã, bɔ ni afee ni mɔ ni kɛ wɔ yeee lɛ hiɛ agbo, yɛ na ni enaaa nɔsha ko ekɛɛ yɛ wɔhe lɛ hewɔ.

⁹ Tsuji lɛ, amɛba amɛhe shi amɛhã amɛ diɛŋtsɛ amɛnuŋtsɔmɛi lɛ, amɛsa amɛhiɛ yɛ nibii fɛɛ mli. Amɛkajie sane naa,

¹⁰ amɛkashara nii, shi moŋ amɛhã ana amɛ akɛ mɛi ni yeɔ anɔkwa kɛmɔ shi, koni amɛkɛwula Nyɔŋmɔ ni ji wɔyiwalaherelɔ lɛ tsɔ̃ɔmɔ lɛ yɛ nibii fɛɛ mli.

Nɔ nɔ ni Kristofoi ajeŋba damɔ

¹¹ Ejaakɛ Nyɔŋmɔ dromɔ ni akɛhereɔ gbɔmɛi fɛɛ ayiwala lɛ epue.

¹² Ni etsɔseɔ wɔ koni wɔkwa she ni asheee Nyɔŋmɔ gbeyei kɛ je nɛɛŋ akɔnɔi lɛ ni wɔkɛ hiɛshikãmɔ kɛ jalɛ nifeemɔ kɛ Nyɔŋmɔ gbeyeishemɔ ahi shi yɛ je nɛɛŋ,

¹³ be mli ni wɔmiikwɛ jɔɔmɔ ni wɔhiɛ kã nɔ kɛ wɔNyɔŋmɔ kpeteŋkple kɛ wɔyiwalaherelɔ Yesu Krito anunyam lɛ puemɔ lɛ gbɛ lɛ.

¹⁴ Lɛ ekɛ lɛ diɛŋtsɛ ehe hã yɛ wɔnajiaŋ, koni ekpɔ̃ wɔ kɛjɛ nɔtɔmɔ fɛɛ mli, ni etsuu wɔhe ehã ehe akɛ lɛ diɛŋtsɛ enɔ, maŋ ni hiɛ dɔɔ yɛ nitsumɔi kpakpai ahe lɛ.

¹⁵ Wiemɔ nii nɛɛ, ni owo amɛ ŋaa yɛ he, ni okã amɛhiɛ yɛ he kɛ hewalɛ fɛɛ. Kaahã mɔ ko miigbe ohe guɔ.