Romabii 5 - ŊMALƐ KRƆŊKRƆŊ LƐ

Nɔ ni jɛɔ bembuu mli kɛbaa

¹ Agbɛnɛ akɛni adamɔ hemɔkɛyeli nɔ abu wɔ bem hewɔ lɛ, wɔ kɛ Nyɔŋmɔ teŋ yɛ hejɔlɛ kɛtsɔ̃ wɔNuŋtsɔ Yesu Kristo nɔ.

² Lɛ enɔ wɔtsɔ̃ ni wɔkɛ hemɔkɛyeli lɛ ena gbɛ hu kɛba dromɔ ni wɔyɔɔ mli nɛɛ mli, ni wɔnyaa yɛ Nyɔŋmɔ anunyam lɛ ni wɔhiɛ kã nɔ lɛ hewɔ.

³ Shi jeee enɛ kɛkɛ, shi moŋ wɔnyaa yɛ amanehului amli hu, ejaakɛ wɔle akɛ amanehulu lɛ tsɛɔ hiɛmiamɔ kɛbaa,

⁴ ni hiɛmiamɔ tsɛɔ su ni sa Nyɔŋmɔ hiɛ kɛbaa; ni su nɛɛ tsɛɔ hiɛnɔkãmɔ kɛbaa;

⁵ ni hiɛnɔkãmɔ lɛ efeee efolo; ejaakɛ atsɔ̃ Mumɔ Krɔŋkrɔŋ ni akɛhã wɔ lɛ nɔ afɔse Nyɔŋmɔ suɔmɔ awo wɔtsuii amli.

⁶ Ejaakɛ be mli ni wɔhe waaa lɛ beebe Kristo bagbo yɛ be ni sa mli ehã mɛi ni efeee Nyɔŋmɔ suɔmɔnaa nii lɛ.

⁷ Ejaakɛ ekpakpa ko dani mɔ ko aaagbo ahã jalɔ ko; ni mɔ kpakpa ko hewɔ lɛ, ekolɛ mɔ ko aaashi etsitsi akɛ eeegbo.

⁸ Shi Nyɔŋmɔ jieɔ lɛ diɛŋtsɛ esuɔmɔ ni ekɛsumɔ wɔ lɛ shi etsɔ̃ɔ, akɛ be mli ni wɔji eshafeelɔi lɛ beebe ni Kristo bagbo yɛ wɔnajiaŋ.

⁹ No hewɔ lɛ, agbɛnɛ ni abu wɔ bem yɛ elá lɛ hewɔ lɛ, aaatsɔ̃ enɔ ahere wɔyiwala kɛjɛ mlifu lɛ mli aahu.

¹⁰ Ejaakɛ kɛ be mli ni wɔji henyɛlɔi lɛ ni akɛ Nyɔŋmɔ Bi lɛ gbele lɛ bakpãtã wɔ kɛ Nyɔŋmɔ teŋ lɛ, agbɛnɛ ni akpãtã wɔteŋ nɛɛ, aaahere wɔyiwala yɛ ewala lɛ mli aahu.

¹¹ Shi jeee no kɛkɛ, shi asaŋ wɔshwãa wɔfɔ̃ɔ Nyɔŋmɔ nɔ hu yɛ wɔNuŋtsɔ Yesu Kristo, mɔ nɔ ni tsɔ̃ ni agbɛnɛ wɔna kpãtãmɔ lɛ hewɔ.

Adam kɛ Kristo

¹² Agbɛnɛ, gbɔmɔ kome nɔ esha tsɔ̃ kɛba je lɛ mli, ni gbele tsɔ̃ esha nɔ kɛba. Bɔ ni fee nɛ ni gbele lɛ tsɛŋe gbɔmɛi fɛɛ, ejaakɛ amɛ fɛɛ amɛfee esha lɛ.

¹³ Esha yɛ jeŋ dani ahã Mla lɛ; shi akɛni mla bɛ hewɔ lɛ, abuuu esha lɛ he akɔntaa.

¹⁴ Kɛ̃lɛ gbele lɛ ye maŋtsɛ kɛjɛ Adam yinɔ kɛbashi Mose yinɔ yɛ mɛi po ni efeko esha ni tamɔ Adam nɔtɔmɔ lɛ anɔ, Adam ni ji mɔ ni baaba lɛ mfoniri lɛ.

¹⁵ Shi Nyɔŋmɔ dromɔ nɔkeenɔ lɛ tamɔɔɔ shigbeemɔnɔ lɛ. Ejaakɛ, kɛ mɔ kome lɛ shigbeemɔ lɛ hewɔ ni mɛi pii lɛ gboi lɛ, Nyɔŋmɔ dromɔ lɛ kɛ nɔkeenɔ ni tsɔ̃ gbɔmɔ kome ni ji Yesu Kristo lɛ dromɔ nɔ ba lɛ fa kɛteke nɔ hã mɛi pii lɛ aahu.

¹⁶ Ni srɔto yɛ Nyɔŋmɔ nɔkeenɔ lɛ kɛ esha ni tsɔ̃ mɔ kome nɔ kɛba lɛ mli; ejaakɛ mɔ kome he esha ni akojo lɛ, ehebuamɔ lɛ fee fɔbuu; shi dromɔ ni jɛ mɛi pii anɔtɔ̃mɔ mli lɛ tsɔ̃ bembuu.

¹⁷ Ejaakɛ kɛ mɔ kome shigbeemɔ lɛ hewɔ jɛ ni gbele tsɔ̃ nakai mɔ kome lɛ nɔ ye maŋtsɛ lɛ, belɛ mɛi ni ena dromɔ kɛ jalɛ nɔkeenɔ ni fa kɛteke nɔ lɛ aaatsɔ̃ mɔ kome ni ji Yesu Kristo lɛ nɔ aye maŋtsɛ yɛ wala mli aahu.

¹⁸ No hewɔ lɛ, agbɛnɛ, tamɔ bɔ ni atsɔ̃ mɔ kome shigbeemɔ nɔ abu gbɔmɛi fɛɛ fɔ lɛ, nakai nɔŋŋ kɛ̃ atsɔ̃ mɔ kome jalɛ nɔ abu gbɔmɛi fɛɛ awala bem.

¹⁹ Ejaakɛ tamɔ bɔ ni atsɔ̃ gbɔmɔ kome lɛ toigbele lɛ nɔ ahã mɛi pii tsɔ̃mɔ eshafeelɔi lɛ, nakai nɔŋŋ aaatsɔ̃ mɔ kome lɛ toiboo lɛ nɔ ahã mɛi pii hu atsɔ̃mɔ jalɔi.

²⁰ Shi Mla lɛ babote mli koni nɔtɔmɔ lɛ afa kɛteke nɔ. Shi he ni esha fa yɛ lɛ, dromɔ lɛ fa kɛteke nɔ yɛ jɛi,

²¹ koni bɔ nɔŋŋ ni esha lɛ ye maŋtsɛ yɛ gbele mli lɛ, nakai nɔŋŋ dromɔ lɛ atsɔ̃ jalɛ nɔ aye maŋtsɛ kɛya naanɔ wala mli yɛ Yesu Kristo, wɔNuŋtsɔ lɛ, hewɔ.