Romabii 1 - ŊMALƐ KRƆŊKRƆŊ LƐ

Ŋamɔ

¹ Wolo nɛɛ jɛ mi Paulo, Yesu Kristo tsulɔ kɛ bɔfo ni atsɛ lɛ ni ajie lɛ ato ahã Nyɔŋmɔ Sanekpakpa lɛ, dɛŋ.

² Sanekpakpa nɛɛ Nyɔŋmɔ ewo he shi eto momo yɛ egbalɔi lɛ anaa yɛ Ŋmalɛi Krɔŋkrɔŋi lɛ amli,

³ Sanekpakpa nɛɛ kɔɔ eBi lɛ, mɔ ni yɛ heloo gbɛfaŋ lɛ ajɛ David shwiei lɛ mli afɔ lɛ lɛ, he.

⁴ EBi nɛɛ, hetsemɔ Mumɔ lɛ naa lɛ, atsɔ̃ gbohiiashitee lɛ nɔ ajie lɛ atsɔ̃ɔ yɛ hewalɛ mli akɛ Nyɔŋmɔ Bi ni ji Yesu Kristo wɔNuŋtsɔ lɛ.

⁵ Enɔ mitsɔ̃ mina dromɔ kɛ bɔfo nitsumɔ koni mihã jeŋmaji lɛ fɛɛ abo hemɔkɛyeli lɛ toi, yɛ egbɛi lɛ hewɔ.

⁶ Jeŋmaji nɛɛ ateŋ nyɛ Romabii hu nyɛyɔɔ. Nyɛ mɛi ni atsɛ akɛ nyɛbafee Yesu Kristo mɛi lɛ.

⁷ Miiŋma nyɛ mɛi ni Nyɔŋmɔ sumɔɔ ni etsɛ nyɛ ni nyɛ ji mɛi krɔŋkrɔŋi ni yɔɔ Roma lɛ fɛɛ, dromɔ kɛ hejɔlɛ ni jɛ wɔTsɛ Nyɔŋmɔ lɛ kɛ Nuŋtsɔ Yesu Kristo dɛŋ lɛ ahã nyɛ!

Faikpamɔ kɛ shidaa

⁸ Klɛŋklɛŋ lɛ, miitsɔ̃ Yesu Kristo nɔ miida miNyɔŋmɔ lɛ shi yɛ nyɛ fɛɛ nyɛhewɔ, akɛ agbaa nyɛhemɔkɛyeli lɛ he sane yɛ je lɛ mli fɛɛ.

⁹ Ejaakɛ midasefonyo ji Nyɔŋmɔ, mɔ ni misɔmɔɔ yɛ mimumɔ mli yɛ eBi lɛ Sanekpakpa lɛ shiɛmɔ mli lɛ, akɛ mifɔ̃ko nyɛ kaimɔ dã,

¹⁰ ni mikpaa fai daa yɛ misɔlemɔi amli, akɛ aleenɔ, Nyɔŋmɔ suɔmɔ naa lɛ wɔsɛɛ ko lɛ gbɛ aaaja ahã mi ni maba nyɛŋɔɔ lo.

¹¹ Ejaakɛ miishwe akɛ mana nyɛ, koni mikɛ mumɔŋ dromɔ keenii lɛ eko abahã nyɛ, bɔ ni afee ni akɛwaje nyɛ,

¹² no ji akɛ, atsɔ̃ nyɛhemɔkɛyeli nɔ ashɛje mimii, ni atsɔ̃ mi hu minɔ lɛ nɔ ashɛje nyɛmii.

¹³ Shi anyɛmimɛi, miisumɔ akɛ nyɛle akɛ mifɔɔ miyiŋtoo akɛ maba nyɛŋɔɔ, koni mibana yibii komɛi yɛ nyɛ hu nyɛteŋ, tamɔ mina yɛ jeŋmaji krokomɛi lɛ ateŋ lɛ.

¹⁴ Mihiɛ Helabii kɛ jekɔ̃ji, nilelɔi kɛ mɛi ni leee nii fɛɛ anyɔmɔ.

¹⁵ No hewɔ lɛ, miishwe akɛ nyɛ mɛi ni nyɛyɔɔ Roma lɛ hu, mabajaje Sanekpakpa lɛ matsɔ̃ɔ nyɛ.

Sanekpakpa lɛ ji Nyɔŋmɔ hewalɛ

¹⁶ Ejaakɛ mihiɛ gbooo Kristo Sanekpakpa lɛ he, ejaakɛ eji Nyɔŋmɔ hewalɛ ni akɛhereɔ mɔ fɛɛ mɔ ni heɔ yeɔ lɛ yiwala, Yudanyo lɛ tsutsu kɛ Helanyo hu.

¹⁷ Ejaakɛ no mli ajieɔ Nyɔŋmɔ jalɛ kpo yɛ, kɛjɛɔ hemɔkɛyeli mli kɛyaa hemɔkɛyeli mli, tamɔ bɔ ni aŋma lɛ akɛ, “Shi jalɔ ni tsɔ̃ hemɔkɛyeli nɔ lɛ yi aaana wala.”

Fɔ ni gbɔmɛi eye

¹⁸ Ejaakɛ ajieɔ Nyɔŋmɔ mlifu kpo kɛjɛɔ ŋwɛi kɛbaa gbɔmɛi ni kɛ nishaianii tsĩɔ anɔkwale lɛ gbɛ lɛ amusubɔɔ kɛ nishaianii lɛ fɛɛ nɔ,

¹⁹ akɛni Nyɔŋmɔ he nii ni aaanyɛ ale lɛ yɛ faŋŋ hã amɛ, ejaakɛ Nyɔŋmɔ ejie etsɔ̃ɔ amɛ faŋŋ.

²⁰ Ejaakɛ ehenii ni anaaa ni ji enaanɔ hewalɛ kɛ nyɔŋmɔ ni eji lɛ fɛɛ lɛ, kɛjɛ jeŋbɔɔ mli beebe lɛ atsɔ̃ɔ enii ni efee lɛ anɔ ayɔseɔ ni anaa faŋŋ, no hewɔ lɛ, amɛbɛ naajiemɔ ko;

²¹ ejaakɛ amɛle Nyɔŋmɔ moŋ, shi amɛwooo ehiɛ nyam akɛ Nyɔŋmɔ, ni amɛdaaa lɛ shi hu, shi amɛfee shwɛm yɛ amɛjwɛŋmɔi amli, ni amɛtsui ni kɔɔɔ sane sɛɛ lɛ ewo duŋ.

²² Amɛtsɛ amɛhe nilelɔi, shi amɛtsɔ̃mɔ kwashiai,

²³ ni Nyɔŋmɔ ni gbooo lɛ anunyam lɛ amɛtsake amɛhã gbɔmɔ ni gboɔ lɛ subaŋ henɔ ko kɛ loofɔji kɛ kooloi naji ejwɛjwɛɛjwɛtsɛmɛi kɛ waamɔnii anɔ.

²⁴ No hewɔ hu ni Nyɔŋmɔ ŋmɛɛ amɛhe ehã muji nitsumɔi yɛ amɛtsuiiaŋ akɔnɔi lɛ anaa, bɔ ni afee ni amɛshwie amɛ diɛŋtsɛ amɛgbɔmɔtsei lɛ ahiɛ shi yɛ amɛteaŋ.

²⁵ Amɛŋɔɔ Nyɔŋmɔ anɔkwale lɛ amɛtsakeɔ amale, ni amɛjaa ni amɛsɔ̃mɔɔ bɔɔnɔ lɛ yɛ bɔlɔ lɛ najiaŋ, bɔlɔ ni ajɔɔ lɛ kɛyaa naanɔ lɛ! Amen.

²⁶ Enɛ hewɔ Nyɔŋmɔ ŋmɛɛ amɛhe ehã hiɛgbejianii ahe hiɛdɔɔ lɛ; ejaakɛ adebɔɔ naanyobɔɔ ni ato lɛ, amɛyei lɛ etsake hiɛ ehã nɔ ni kɛ adebɔɔ gbɛjianɔtoo eyaaa;

²⁷ ni nakai nɔŋŋ amɛhii lɛ hu eshi amɛyei lɛ asɛɛ, ni amɛkɛ akɔnɔ ni naa wa nyiɛɔ amɛ diɛŋtsɛ amɛhe sɛɛ, ni hii kɛ hii tsuɔ hiɛgbejianii, ni amɛna amɛtɔ̃mɔ lɛ he nyɔmɔwoo ni sa yɛ amɛ diɛŋtsɛ amɛmli.

²⁸ Ni akɛni amɛbuuu akɛ esa akɛ amɛleɔ Nyɔŋmɔ lɛ, Nyɔŋmɔ hu ŋmɛɛ amɛhe ehã jwɛŋmɔ ni esaaa koni amɛfee nibii ni esaaa;

²⁹ mɛi ni eyimɔ obɔ̃bɔ̃ kɛ nii ni ejaaa gbɛ fɛɛ, efɔŋfeemɔ, hiɛjoomɔ, nifɔɔjianii; amɛyimɔ tɔ kɛ hetsɛ̃, awuyeli, bei, shishiumɔ, nyɛɛ;

³⁰ amɛyeɔ amɛhe osheku, Nyɔŋmɔnyɛlɔi, mɛi ni hiɛ esɔɔɔ mɔ, hetsɔ̃ɔlɔi, shwãlɔi, nɔfɔŋ he ŋaatsɔlɔi, fɔlɔi anɔtoigbolɔi,

³¹ mɛi ni bɛ henilee, kpãŋmɔ mli kulɔi, mɛi ni edɔɔɔ mɔ he, mɛi ni enaaa mɔbɔ.

³² Amɛle Nyɔŋmɔ mla lɛ krɛdɛɛ nɛ, akɛ mɛi ni tsuɔ nakai nii lɛ sa gbele, shi kɛ̃lɛ jeee feemɔ kɛkɛ amɛfeɔ, shi moŋ amɛnaa mɛi ni tsuɔ nakai nii lɛ ahe miishɛɛ hu.