Nehemia 3 - ŊMALƐ KRƆŊKRƆŊ LƐ

Atswa Yerusalɛm gbogbo lɛ ekoŋŋ

¹ Kɛkɛ ni osɔfonukpa Eliashib, kɛ enyɛmimɛi osɔfoi lɛ tswa Toi Agboi lɛ agbogbo lɛ; amɛtara enaa shinai lɛ, ni amɛjɔɔ nɔ kɛfee lɛ krɔŋkrɔŋ amɛhã Nyɔŋmɔ. Amɛfee gbogbo lɛ krɔŋkrɔŋ aahu kɛyashi Hamea mɔɔ gojoo lɛ kɛ Hananel mɔɔ gojoo lɛ he.

² Yeriko hii lɛ tswa gbogbo kɛtsa nɔ; ni Zakur, Imri bi lɛ, hu tswa kɛtsa Yeriko hii lɛ anɔ lɛ nɔ.

³ Hasenabii lɛ tswa Loi Agboi lɛ agbogbo lɛ. Amɛsɛŋ nɔ, ni amɛtara enaa shinai kɛ sai kɛ adabaŋi lɛ.

⁴ Meremot, Hakoz bi ni ji Uria nabi lɛ, saa gbogbo ni tsa nɔ lɛ. Amɛnɔtsamɔ lɛ Meshulam ni ji Meshezabel bi Berekia bi lɛ basaa. Nɔ ni tsa enɛ hu nɔ lɛ, Bana bi Zadok tswa.

⁵ Enɛ nɔtsamɔ lɛ Tekoa hii lɛ ji mɛi ni tswa, shi abladei ni yɔɔ amɛteŋ lɛ, amɛkɛ amɛhe wooo amɛNuŋtsɔ lɛ nitsumɔ lɛ mli.

⁶ Agbo Momo lɛ, Yoiada, Pasea bi lɛ, kɛ Meshulam, Besodeia bi lɛ, basaa. Amɛ nɔŋŋ amɛsɛŋ nɔ, ni amɛtara enaa shinai lɛ kɛ amɛhe sai lɛ kɛ amɛsɛɛ adabaŋi lɛ.

⁷ Nɔ ni tsa enɛ nɔ kɛyashi faa lɛ anaiagbɛ, he ni amralo lɛ shihilɛhe lɛ yɔɔ lɛ, Melatia, Gibeonnyo lɛ, kɛ Yadon, Meronotnyo lɛ, kɛ Gibeon kɛ Mizpabii lɛ ji mɛi ni basaa.

⁸ Enɔtsamɔ lɛ, Harhaia bi Uziel ni jɛ shika ŋaalɔi lɛ ateŋ lɛ ji mɔ ni basaa. Nɔ ni tsa enɛ nɔ lɛ, Hanania, ojeŋmafeelɔ lɛ ji mɔ ni batswa. Amɛsaa Yerusalɛm gbogbo lɛ kɛyashi Agbo Lɛkɛtɛɛ lɛ he.

⁹ Nɔ ni tsa nɔ lɛ, Refaia, Hur bi lɛ ni ji Yerusalɛm mlijaa fã lumɔ lɛ, ji mɔ ni basaa.

¹⁰ Enɛ nɔtsamɔ lɛ, Yedaia, Harumaf bi lɛ, basaa; eyɛ eshĩa lɛ ŋlɛnɔ. Nɔ ni tsa nɔ lɛ, Hashabneia bi Hatush ji mɔ ni basaa.

¹¹ Malkia, Harim bi lɛ, kɛ Hashub, Pahat-Moab bi lɛ, basaa nɔ ni tsa nɔ lɛ kɛ Flɔnɔi Amɔɔ lɛ hu.

¹² Enɔtsamɔ lɛ Shalum, Halohesh bi lɛ, ni ji Yerusalɛm mlija fã lumɔ lɛ basaa; ebiyei lɛ ye bua lɛ kɛsaa.

¹³ Hanun kɛ Zanoa maŋ lɛ mli bii basaa Jɔɔ Agbo lɛ. Amɛma ni amɛtara enaa shinai lɛ kɛ amɛhe sai lɛ kɛ amɛsɛɛ adabaŋi lɛ. Amɛtswa gbogbo ninetalɔi akpe kɛyashi Tumo Agbo lɛ naa.

¹⁴ Tumo Agbo lɛ diɛŋtsɛ lɛ mɔ ni saa ji Malkia, Rekab bi lɛ ni ji Bet-Hakerem mlijaa fã lumɔ lɛ. Lɛ ema ni etara enaa shinai lɛ kɛ amɛhe sai kɛ amɛsɛɛ adabaŋi lɛ.

¹⁵ Nubu Agbo lɛ Shallum, Kol-Hoze bi lɛ ni ji Mizpa mlijaa fã lumɔ lɛ, ji mɔ ni basaa. Lɛ ema, ni eha nɔ, ni etara enaa shinai lɛ kɛ amɛhe sai kɛ amɛsɛɛ adabaŋi lɛ. Lɛ nɔŋŋ etswa Shela Kpaakpo lɛ he gbogbo lɛ ni yɔɔ maŋtsɛ trom lɛ masɛi lɛ, aahu kɛyashi atrakpoi ni kpelekeɔ shi kɛjɛɔ David maŋ lɛ mli lɛ he.

¹⁶ Nɔ ni tsa enɛ nɔ lɛ, Nehemia, Azbuk bi lɛ ni ji Bet-Zur mlijaa fã lumɔ lɛ, basaa. Esaa kɛyashi David saŋi lɛ kɛ kpaakpo ni aje gbɛ afee lɛ kɛ tabilɔi ashihilɛhe lɛ ŋlɛnɔ.

Levibii ni tswa gbogbo lɛ eko lɛ

¹⁷ Enɛ sɛɛ lɛ, Levibii ni abaatsi amɛgbɛii atã nɛɛ batswa gbogbo lɛ hei komɛi: Rehum, Bani bi lɛ, batswa fã ko; Hashabia, Keila kpokpai anɔ mlijaa fã lumɔ lɛ, batswa he ni yɔɔ enɔ mli.

¹⁸ Esɛɛ lɛ amɛnyɛmimɛi lɛ batswa eko: Bawai, Henadad bi lɛ, ni ji Keila mlijaa fã kome lɛ lumɔ lɛ, basaa fã,

¹⁹ ni Ezer, Yeshua bi lɛ ni ji Mizpa lumɔ lɛ, basaa fã hu yɛ he ni atsɔ̃ɔ akwɔɔ kɛyaa tawuunii toohe lɛ yɛ gbogbo lɛ koŋ lɛ.

²⁰ Esɛɛ lɛ, Baruk, Zabai bi lɛ, basaa gbogbo lɛ fã kroko kɛjɛ gbogbo lɛ koŋ kɛyashi osɔfonukpa Eliashib shĩa lɛ shinaa lɛ naa.

²¹ Baruk sɛɛ lɛ, Meremot, ni ji Hakoz bi Uria bi lɛ, basaa fã kroko kɛjɛ Eliashib we lɛ shinaa lɛ naa kɛyashi Eliashib we lɛ naagbeehe lɛ tɔ̃ɔ.

Levi Osɔfoi ni tswa gbogbo lɛ eko lɛ

²² Enɛ sɛɛ lɛ, osɔfoi ni yɔɔ Yerusalɛm kpokpai anɔ lɛ basaa gbogbo lɛ fã ni tsa nɔ lɛ.

²³ Enɛ sɛɛ lɛ Benyamin kɛ Hashub basaa fã ni yɔɔ amɛshĩai lɛ ahiɛ lɛ. Maaseia bi Azaria ni enii ji Anania basaa fã ni tsa nɔ ni yɔɔ eshĩa lɛ hiɛ lɛ.

²⁴ Azaria sɛɛ lɛ Binui, Hanadad bi lɛ, basaa fã kroko kɛjɛ Azaria shĩa lɛ he kɛyashi gbogbo lɛ koŋ kɛ he ni gbogbo lɛ dɔ eyi yɛ lɛ.

²⁵ Palal, Uzai bi lɛ, batswa gbogbo lɛ fã ni kwɛɔ koŋ lɛ kɛ mɔɔ ni etsɛ̃ kɛje kpo yɛ maŋtsɛ lɛ shĩa lɛ sɔɔdo ni ji enyɔ lɛ he yɛ bulɔi akpo lɛ masɛi lɛ.

²⁶ Palal sɛɛ lɛ, Pedaia, Parosh bi lɛ, kɛ Sɔlemɔ we sɔ̃ɔlɔi ni hiɔ Ofel lɛ basaa gbogbo lɛ fã kroko kɛyashi he ko ni yɔɔ Nu Agbo lɛ bokãgbɛ kɛ mɔɔ ni etsɛ̃ kɛje kpo lɛ masɛi.

Gbogbotswalɔi krokomɛi

²⁷ Pedaia sɛɛ lɛ, Tekoabii lɛ basaa gbogbo lɛ fã ni kwɛɔ mɔɔ wulu somromoo ni etsɛ̃ kɛje kpo lɛ. Amɛsaa gbogbo lɛ aahu kɛyashi Ofel gbogbo lɛ he.

²⁸ Enɛ sɛɛ lɛ, osɔfoi lɛ basaa fã kroko. Amɛsaa kɛjɛ Okpɔŋɔi Agbo lɛ sɛɛ kɛtee kooyigbɛ, amɛteŋ mɔ fɛɛ mɔ tswa gbogbo lɛ fã ni yɔɔ eshĩa hiɛ lɛ.

²⁹ Osɔfoi lɛ asɛɛ lɛ, Zadok, Imer bi lɛ, basaa fã ni yɔɔ eshĩa lɛ hiɛ lɛ. Esɛɛ lɛ, Shemaia, Shekania bi lɛ ni kwɛɔ Bokãgbɛ Agbo lɛ nɔ lɛ, basaa gbogbo lɛ fã kroko lɛ.

³⁰ Shemaia sɛɛ lɛ, Hanania, Shelemia bi lɛ, kɛ Hanun, Zalaf bi ni ji ekpaa lɛ, basaa fã kroko. Amɛsɛɛ lɛ, Meshulam, Berekia bi lɛ, basaa fã ni yɔɔ esɛɛtsu lɛ ŋlɛnɔ lɛ.

³¹ Esɛɛ lɛ Malkia ni ji shika ŋaalɔi lɛ ateŋ mɔ kome lɛ batswa gbogbo lɛ fã kroko lɛ. Etswa kɛyashi Sɔlemɔ we sɔ̃ɔlɔi lɛ kɛ jarayelɔi lɛ awe lɛ he, yɛ Henaabuamɔ Agbo lɛ ŋlɛnɔ. Malkiya nɛɛ nɔŋŋ saa gbogbo lɛ kɛyashi ŋwɛitsu ni ma gbogbo lɛ koŋ lɛ nɔ lɛ he.

³² Gbogbo lɛ naagbee fã ni kã ŋwɛitsu lɛ kɛ Toi Agboi lɛ teŋ lɛ, mɛi ni saa no ji shika ŋaalɔi lɛ kɛ jarayelɔi lɛ.