Nahum 2 - ŊMALƐ KRƆŊKRƆŊ LƐ

Nineve Hiɛkpãtãmɔ lɛ

¹ Nineve, nifitelɔ lɛ eba ebaatua bo! Mɔ ni baakpãtã ohiɛ lɛ eshɛ shi. Abu maŋ lɛ he gbogbo lɛ he! Nyɛmiaa; buamɔ otabilɔi blublu anaa!

² (Yehowa miihã Israel hiɛ aba nyam ekoŋŋ, ejaakɛ ehenyɛlɔi lɛ baye enɔ, ni amɛkpãtã eblema nyam lɛ hiɛ.)

³ Henyɛlɔi tabilɔi kãkãlɔi lɛ hiɛ tsɛŋi tsuji, ni amɛwowoo atadei tsuji. Amɛmiisaa amɛhe kɛhã maŋ lɛ tuamɔ. Kɛji amɛtayaa shwiilii lɛ to kɛdamɔ shi lɛ, amɛhe kpɛlɛɔ tamɔ la ni miitso; amɛkpɔŋɔi lɛ miitumɔtumɔɔ.

⁴ Tayaa shwiilii lɛ gbaa shi yɛ gbɛjegbɛi lɛ anɔ; amɛyaa amɛbaa kɛ foi yɛ maŋ lɛ mli blohui lɛ amli. Amɛhe kpɛlɛɔ tamɔ kɔtii, ni amɛfoɔ hiŋmɛi naa tamɔ srawa.

⁵ Atsɛɔ tabilɔi asafoiatsɛmɛi lɛ; shi amɛnaji tɛrɛɔ shi kɛyaa, be mli ni henyɛlɔi lɛ tsɛ̃ɔ kɛbaninaa maŋ gbogbo lɛ; ni amɛmamɔɔ nibii kɛtsĩɔ amɛhiɛ.

⁶ Agbele faa lɛ naagbɛ agboi lɛ, maŋtsɛ we lɛ mli yiɔ kɛ hejaramɔ.

⁷ Aŋɔ maŋnyɛ lɛ nom kɛtee, ni eweyei lɛ miiye ŋkɔmɔ; amɛgbei etsɔ̃ tamɔ okpoi agbee; amɛmiiyi amɛtsitsii anɔ mã.

⁸ Ninevebii eke kɛ foi tamɔ faa ni etue, amɛke kɛ blɔmɔ akɛ, “Nyɛdamɔa shi! Nyɛdamɔa shi!” Shi mɔ ko mɔ ko ekuuu esɛɛ.

⁹ Nyɛhaa jwiɛtɛi! Nyɛhaa shika! Jwinei srɔtoi ni abua naa ato yɛ maŋ lɛ mli lɛ, jeee hiɛ nɛ.

¹⁰ Akpãtã Nineve hiɛ, afee lɛ butuu etsɔ̃ amaŋfɔ̃! Gbeyei emɔmɔ tsuii, nakutsei miikpokpo hewalɛ etã yɛ mɛi amli, ni hiɛiaŋ fɛɛ eshale.

¹¹ Nɛgbɛ maŋ lɛ ni tsɔ̃ tamɔ jata oblahii ashihilɛhe lɛ yɔɔ, he ni jata shãtã eniyenii kɛtee ebii aŋɔɔ yɛ, ni mɔ ko gbaaa enaa lɛ?

¹² Jata nuu lɛ gbe loo bɔ ni baashɛ jata yoo kɛ ebii anaa; ewo etɛkplo lɛ mli obɔ̃, kɛ ebui lɛ amli kɛ loo ni egbe.

¹³ Yehowa kɛɛ akɛ, “Naa, mikɛ nyɛ ena. Mibama nyɛtayaa shwiilii lɛ anaa la mashã. Nyɛtabilɔi ni tamɔ jata lɛ baanyɔnyɔɔ yɛ ta mli. Mashɔ̃ nibii fɛɛ ni nyɛshɔ̃shɔ̃ɔ yɛ mɛi adɛŋ lɛ yɛ nyɛdɛŋ, asaŋ anuŋ ohewalɛ he yɛ je lɛ mli dɔŋŋ.