Mika 6 - ŊMALƐ KRƆŊKRƆŊ LƐ

Sane ni Yehowa kɛ Israel yɔɔ

¹ Nyɛboa nɔ ni Yehowa kɛɔ toi, “Tee shi ni okɔlɔ ogbee! Hã gɔji kɛ gɔ̃ŋkpɔi lɛ anu osane lɛ.

² “Nyɛ gɔji, nyɛ shikpɔŋ lɛ shishitoo ni yɔɔ daa, nyɛboa Yehowa sane lɛ toi! Yehowa kɛ emaŋ Israel ena; ekɛ sane ni eyɔɔ yɛ amɛhe lɛ baashi lɛ.”

³ Yehowa miibi emaŋ lɛ akɛ, “Mimaŋ, mɛni mifee bo? Mɛni mli mihã etɔ bo yɛ? Hã mi hetoo.

⁴ Ejaakɛ mi mijie bo kɛjɛ Ijipt shikpɔŋ lɛ nɔ, ni mikpɔ̃ bo yɛ nyɔŋyeli mli. Mitsu Mose kɛ Aaron kɛ Miriam kɛba akɛ ohiɛnyiɛlɔi.

⁵ Mimaŋbii, nyɛkaia nɔ yiŋ ni Moab maŋtsɛ Balak to yɛ nyɛhe, kɛ nɔ hetoo ni Bileam, Beor bi lɛ, hã lɛ. Nyɛkaia nibii ni ba yɛ gbɛ lɛ nɔ kɛjɛ Akasia shitoohe lɛ kɛtee Gilgal tɔ̃ɔ lɛ. Nyɛkaia nibii nɛɛ bɔ ni afee ni nyɛna nibii ni mi, Yehowa, mitsu ni mikɛhere nyɛyiwala lɛ.”

Nɔ ni Yehowa taoɔ

⁶ Mɛni mikɛaaba Yehowa hiɛ, ni mɛni mikɛaabakoto Nyɔŋmɔ ni yɔɔ ŋwɛi shɔŋŋ lɛ hiɛ? Miba ehiɛ kɛ shãa afɔlei? Mikɛ tsinabii ni eye afifi abashã shãa afɔlei ahã lɛ?

⁷ Ani toi agboi akpekpei aloo mu tsɛnsii akpei nyɔŋmai abɔ aaasa Yehowa hiɛ? Aso mikɛ mikromɔbi, mimusuŋbi lɛ ahã yɛ mihe esha hewɔ?

⁸ Dabida! Ao Adesa, Yehowa etsɔ̃ɔ bo nɔ ni hi. Nɔ ni ebiɔ yɛ odɛ̃ŋ nɛ, akɛ ofee nɔ ni ja gbɛ, osumɔ onyɛmimɛi, okɛ oNyɔŋmɔ lɛ anyiɛ yɛ heshibaa mli.

⁹ Ehi akɛ ashe Yehowa gbeyei. Eeetsɛ maŋ lɛ ekɛɛ, “Nyɛboa toi, nyɛ mɛi ni nyɛbuaa nyɛhe naa kɛkpeɔ yɛ maŋ lɛ mli!

¹⁰ Nɔ ni yɔɔ efɔŋfeelɔi ashĩai amli ni ji jwetri ni atsɔ̃ shishiumɔ gbɛi anɔ ana, kɛ susumɔnii kɛ nsɛnitɛi ni shɛɛɛ ni akɛŋmɛɔ nii lɛ, ani mihiɛ aaakpa nɔ? Dabida, miihi!

¹¹ Ani mikɛ mɛi ni kɛ susumɔnii kɛ nsɛnitɛi ni shɛɛɛ ŋmɛɔ nii lɛ ahe esha aaafa amɛ lo?

¹² Niiatsɛmɛi ni yɔɔ nyɛteŋ lɛ shishiuɔ ohiafoi lɛ; ni nyɛ fɛɛ lɛ amalelɔi ji nyɛ.

¹³ No hewɔ lɛ, mije nyɛ nitswiamɔ kɛ hiɛkpãtãmɔ shishi momo yɛ nyɛhe eshai lɛ ahewɔ.

¹⁴ Nyɛaaye nii, shi nyɛtɔrɔŋ; ni hɔmɔ aaakã he aye nyɛ. Nyɛaaloo nii nyɛto, shi efeŋ shweshweeshwe, ni nɔ ni nyɛaabaa yi tete lɛ, makpãtã hiɛ yɛ ta mli.

¹⁵ Nyɛaadu nii, shi nyɛkpaŋ eko. Nyɛaaŋa mu, shi nyɛnaŋ mu nyɛkpa, ni nyɛaaŋa wain hu, shi nyɛnuŋ wain.

¹⁶ Enɛ baaba mli, ejaakɛ Maŋtsɛ Omri nibii gbohii lɛ kɛ ebi Ahab nibii fɔ̃ji lɛ, nomɛi anɔ nyɛtsa. No hewɔ lɛ, mahã nyɛmaji lɛ atsɔ̃ amaŋfɔ̃, ni abuŋ nyɛ, ni aaabo nyɛ ‘tsia’!”