Mateo 8 - ŊMALƐ KRƆŊKRƆŊ LƐ

Kpitiyelɔ ko tsamɔ

¹ Shi be ni Yesu jɛ gɔŋ lɛ nɔ ekpeleke shi lɛ, asafoi pii nyiɛ esɛɛ.

² Ni naa, kpitiyelɔ ko ba ebakoto lɛ ekɛɛ, “Nuŋtsɔ, kɛji oosumɔ lɛ, ooonyɛ ohã mihe atse!”

³ Ni Yesu kpã enine mli eta ehe ni ekɛɛ, “Miisumɔ, ohe atse!” Ni amrɔ lɛ ekpiti lɛ tã.

⁴ Ni Yesu kɛɛ lɛ akɛ, “Kwɛmɔ ni okakɛɛ mɔ ko; shi moŋ yaa ni okɛ ohe ayatsɔ̃ɔ osɔfo lɛ, ni ohã keenii ni Mose to lɛ, ni no aaafee odase ahã amɛ.”

Asraafoiohaatsɛ ko wenuu tsamɔ

⁵ Shi be ni Yesu bote Kapernaum lɛ, asraafoiohaatsɛ ko ba eŋɔɔ ebakpa lɛ fai,

⁶ ni ekɛɛ, “Nuŋtsɔ, miwenuu kã shi yɛ shĩa kɛ kuumɔhela, eena nɔ naakpa.”

⁷ Ni Yesu kɛɛ lɛ akɛ, “Miiba ni mabatsa lɛ.”

⁸ Ni asraafoiohaatsɛ lɛ here nɔ ekɛɛ, “Nuŋtsɔ, esaaa mi akɛ obaa mikoi lɛ shi; shi moŋ wiemɔ wiemɔ lɛ kɛkɛ, ni aaatsa miwenuu lɛ.

⁹ Ejaakɛ mi po ni mi ji gbɔmɔ ni yɔɔ nɔyeli shishi lɛ, miyɛ asraafoi yɛ mishishi, ni mikɛɔ mɔ kome akɛ, ‘Yaa!’ Ni eyaa; kɛ mɔ kroko hu akɛ, ‘Ba!’ Ni ebaa; ni mikɛɔ mitsulɔ akɛ, ‘Feemɔ enɛ!’ Ni efeɔ.”

¹⁰ Shi be ni Yesu nu enɛ lɛ, ehiɛ fee lɛ yaa, ni ekɛɛ mɛi ni nyiɛ esɛɛ lɛ akɛ, “Anɔkwale mikɛɔ nyɛ akɛ minako hemɔkɛyeli ni da tamɔ enɛ yɛ Israel!

¹¹ Shi miikɛɛ nyɛ akɛ mɛi pii aaajɛ bokã kɛ anai aba, ni amɛkɛ Abraham kɛ Isak kɛ Yakob aaabatara okplɔ̃ he yɛ ŋwɛi maŋtsɛyeli lɛ mli.

¹² Shi maŋtsɛyeli lɛ mli bii lɛ, aaashwie amɛ awo gbɛsɛɛ duŋ lɛ mli; jɛi yaafo kɛ nyanyɔji ashishikpemɔ aaahi.”

¹³ Ni Yesu kɛɛ asraafoiohaatsɛ lɛ akɛ, “Yaa, bɔ ni ohe oye lɛ, afee nakai ahã bo.” Ni atsa ewenuu lɛ yɛ nakai ŋmɛlɛtswaa lɛ nɔŋŋ nɔ.

Petro shaayoo tsamɔ

¹⁴ Ni be ni Yesu ba Petro we lɛ, ena eshaayoo lɛ kã shi kɛ atridii.

¹⁵ Ni emɔ enineshi, ni atridii lɛ tse yɛ enɔ, ni ete shi ni esɔmɔ amɛ.

Helatsɛmɛi pii atsamɔ

¹⁶ Shi be ni shɛ gbɛkɛnaashi lɛ, akɛ mɛi pii ni mumɔi fɔ̃ji yɔɔ amɛmli ba eŋɔɔ. Ni ekɛ ewiemɔ fãmɔ mumɔi lɛ, ni etsa mɛi ni he yeɔ fɛɛ.

¹⁷ Koni nɔ ni gbalɔ Yesaia wie lɛ aba mli akɛ, “Lɛ diɛŋtsɛ ewo wɔhejaramɔi lɛ, ni etere wɔhelai lɛ.”

Mɛi ni taoɔ Yesu sɛɛ anyiɛ

¹⁸ Shi be ni Yesu na mɛi pii yɛ ehewɔ lɛ, efã akɛ afo ŋshɔ lɛ kɛya esɛɛgbɛ.

¹⁹ Ni mlatsɔɔlɔ ko ba eŋɔɔ ebakɛɛ lɛ akɛ, “Tsɔɔlɔ, manyiɛ osɛɛ kɛya he fɛɛ he ni oyaa.”

²⁰ Ni Yesu kɛɛ lɛ akɛ, “Osɔi yɛ bui, ni ŋwɛi loofɔji yɛ tsui; shi Gbɔmɔ Bi lɛ bɛ he ni ekɛ eyitso ŋmɛɔ.”

²¹ Ekaselɔi lɛ ateŋ mɔ kroko hu kɛɛ lɛ akɛ, “Nuŋtsɔ; ŋmɛɛ mi gbɛ ni mayafu mitsɛ dã.”

²² Shi Yesu kɛɛ lɛ akɛ, “Nyiɛmɔ misɛɛ, ni ohã gbohii afu amɛ diɛŋtsɛ amɛgbohii.”

Yesu fã ahum yi ni efɔ̃ɔ tswaa

²³ Ni ebote lɛlɛ ko mli ni ekaselɔi lɛ nyiɛ esɛɛ.

²⁴ Ni naa; ŋshɔ lɛ fee hamahama aahu ni ŋshɔkei miikumɔ miiwo lɛlɛ lɛ mli; shi Yesu, ewɔ.

²⁵ Ni ekaselɔi lɛ ba eŋɔɔ ni amɛbatsiɛ̃ lɛ amɛkɛɛ, “Nuŋtsɔ, heremɔ wɔyiwala, wɔhiɛ miikpãtã!”

²⁶ Ni ekɛɛ amɛ akɛ, “Mɛɛba nyɛsheɔ gbeyei nɛkɛ, nyɛ ni nyɛhemɔkɛyeli faaa?” Kɛkɛ ni ete shi ni efã kɔɔyɔɔ lɛ kɛ ŋshɔ lɛ yi, ni eŋmɛ dɛmm.

²⁷ Shi gbɔmɛi lɛ ahiɛ fee amɛ yaa amɛkɛɛ, “Mɛɛ gbɔmɔ srɔto nɛ, ni kɔɔyɔɔ kɛ ŋshɔ tete boɔ lɛ toi nɛɛ?”

Yesu tsa hii enyɔ ni mumɔi fɔ̃ji yɔɔ amɛmli

²⁸ Be ni eyashɛ sɛɛ lɛ gbɛ yɛ Gadarabii ashikpɔŋ lɛ nɔ lɛ mɛi enyɔ ni mumɔi fɔ̃ji yɔɔ amɛmli ni amɛjɛ gbohii afũuhe lɛ kɛ lɛ bakpe; amɛhiɛ ewo la tsɔ̃ bɔ ni mɔ ko nyɛɛɛ nakai gbɛ lɛ nɔ atsɔ̃.

²⁹ Ni naa, amɛbolɔ amɛkɛɛ, “Mɛɛ sane wɔkɛ bo yɔɔ, bo Yesu Nyɔŋmɔ Bi lɛ? Ani oba biɛ ni obawo wɔ hejaramɔ dani be lɛ ashɛ?”

³⁰ Ni kplotoi akuu kpele ko miiye nii yɛ shɔŋŋ.

³¹ Ni mumɔi fɔ̃ji lɛ kpa lɛ fai amɛkɛɛ, “Kɛji ofã wɔ lɛ hã wɔyabote kplotoi akuu lɛ mli.”

³² Ni ekɛɛ amɛ akɛ, “Nyɛyaa!” Ni amɛje kpo amɛyabote kplotoi akuu lɛ mli; ni naa, kuu muu lɛ fɛɛ wo foi kɛjɛ gɔŋ lɛ nɔ kɛyashwie ŋshɔ lɛ mli, ni amɛgboi yɛ nu lɛ mli.

³³ Ni mɛi ni kwɛɔ amɛ lɛ jo foi, amɛtee maŋ lɛ mli ni amɛyagba saji lɛ fɛɛ, kɛ mɛi ni mumɔi fɔ̃ji yɔɔ amɛmli lɛ anɔ lɛ hu.

³⁴ Ni naa, maŋ muu lɛ fɛɛ je kpo ni amɛkɛ Yesu ayakpe; ni be ni amɛna lɛ lɛ, amɛkpa lɛ fai akɛ eje amɛkpokpai lɛ anɔ eya.