Mateo 21 - ŊMALƐ KRƆŊKRƆŊ LƐ

Yesu Yerusalɛm botemɔ

¹ Be ni amɛbɛŋkɛ Yerusalɛm ni amɛshɛ Betfage yɛ Mugɔŋ lɛ he lɛ, Yesu tsu ekaselɔi lɛ ateŋ mɛi enyɔ,

² ni ekɛɛ amɛ akɛ, “Nyɛyaa akrowa ni tua nyɛhiɛ nɛɛ mli, ni amrɔ lɛ nyɛaana teji yoo ni aŋmɔ lɛ shi kɛ ebi; nyɛfɛnea amɛ nyɛbahãa mi.

³ Ni kɛ mɔ ko bi nyɛ sane ko lɛ, nyɛkɛa lɛ akɛ, ‘Amɛhe miihia Nuŋtsɔ lɛ;’ ni amrɔ lɛ eeehã nyɛkɛ amɛ aba.”

⁴ Shi afee enɛ fɛɛ koni nɔ ni gbalɔ lɛ wie lɛ aba mli akɛ,

⁵ “Nyɛkɛa Zion biyoo lɛ akɛ, naa, omaŋtsɛ lɛ miiba oŋɔɔ. Ehe jɔ, ni eta teji nɔ kɛ teji ni ji nitsumɔ kooloo lɛ bi nɔ.”

⁶ Ni kaselɔi lɛ tee amɛyafee bɔ ni Yesu fã amɛ lɛ.

⁷ Ni amɛkɛ teji lɛ kɛ ebi lɛ ba, ni amɛkɛ amɛtadei lɛ shwie amɛnɔ, ni eho eta nɔ.

⁸ Ni mɛi pii kɛ amɛtadei ha gbɛ lɛ nɔ, ni mɛi krokomɛi hu folɔ tsei aniji amɛkɛshwie gbɛ lɛ nɔ;

⁹ ni asafoi ni nyiɛ ehiɛ kɛ mɛi ni nyiɛ esɛɛ lɛ fɛɛ bolɔ amɛkɛɛ, “Hosiana David Bi lɛ! Ajɔɔ mɔ ni baa yɛ Nuŋtsɔ lɛ gbɛi mli lɛ! Hosiana yɛ ŋwɛi flooflo!”

¹⁰ Ni be ni ebote Yerusalɛm lɛ, maŋ muu lɛ fɛɛ bu hoo amɛkɛɛ, “Namɔ nɛ?”

¹¹ Shi asafoi lɛ kɛɛ, “Mɔ nɛ ji Yesu, gbalɔ lɛ ni jɛ Nazaret yɛ Galilea lɛ.”

Yesu tsuu Sɔlemɔ we lɛ he

¹² Ni Yesu tee Sɔlemɔ we lɛ ni eyashwie mɛi ni hɔ̃ɔ nii kɛ mɛi ni heɔ nii yɛ Sɔlemɔ we lɛ, ni etsirɛ shikatsakelɔi lɛ akplɔ̃i lɛ kɛ mɛi ni hɔ̃ɔ okpoi lɛ asɛii lɛ etswiatswia shi.

¹³ Ni ekɛɛ amɛ akɛ, “Aŋma akɛ, ‘Aaatsɛ miwe lɛ Sɔlemɔ we,’ shi nyɛ lɛ, nyɛkɛfee ojotswalɔi abu.”

¹⁴ Ni shwilafoi kɛ obubuafoi ba eŋɔɔ yɛ Sɔlemɔ we lɛ, ni etsa amɛ.

¹⁵ Shi be ni osɔfonukpai lɛ kɛ mlatsɔɔlɔi lɛ na naakpɛɛnii ni efee kɛ gbekɛbii lɛ ni bolɔɔ yɛ Sɔlemɔ we lɛ akɛ, “Hosiana David Bi!” lɛ, amɛmli wo la,

¹⁶ ni amɛkɛɛ lɛ akɛ, “Oonu nɔ ni mɛnɛɛmɛi kɛɔ nɛɛ lo?” Ni Yesu kɛɛ amɛ akɛ, “Hɛɛ, ani nyɛkaneko dã akɛ, ‘Abifabii kɛ fufɔbii anaa osaa yijiemɔ oto yɛ?’ ”

¹⁷ Ni eshi amɛ eje maŋ lɛ mli etee Betania, ni eyawɔ jɛi.

Yesu lomɔ agbãmitso lɛ

¹⁸ Shi leebi be ni eku esɛɛ eyaa maŋ lɛ mli lɛ, hɔ̃mɔ ye lɛ.

¹⁹ Ni ena agbãmitso ko yɛ gbɛ lɛ he, ni etsi eshɛ he, shi enaaa nɔ ko yɛ nɔ akɛ ja bai kɛkɛ; ni ekɛɛ tso lɛ akɛ, “Owoŋ yibii ko dɔŋŋ gbi ko gbi ko!” Ni agbãmitso lɛ ŋlã amrɔ lɛ nɔŋŋ.

²⁰ Ni be ni ekaselɔi lɛ na lɛ, amɛnaa kpɛ amɛhe ni amɛkɛɛ, “Te fee tɛŋŋ ni agbãmitso lɛ ŋlã amrɔ nɛɛŋ?”

²¹ Shi Yesu here nɔ ni ekɛɛ amɛ akɛ, “Anɔkwale mikɛɔ nyɛ akɛ, kɛji nyɛyɛ hemɔkɛyeli ni nyɛjeee ŋwane lɛ, jeee nɔ ni afee agbãmitso nɛɛ kɛkɛ nyɛaafee; shi kɛji nyɛkɛɛ gɔŋ nɛɛ tete akɛ, ‘Fãa ni oyagbee ŋshɔŋ lɛ’, eeeba mli nakai.

²² Ni nɔ fɛɛ nɔ ni nyɛaasɔle nyɛbi kɛ hemɔkɛyeli lɛ, nyɛnine aaashɛ nɔ.”

Hegbɛ ni Yesu yɔɔ

²³ Ni be ni eba Sɔlemɔ we lɛ ni etsɔ̃ɔ amɛ nii lɛ, osɔfonukpai lɛ kɛ maŋ onukpai lɛ ba eŋɔɔ amɛbabi lɛ akɛ, “Mɛɛ hegbɛ oyɔɔ hewɔ ofeɔ nɛkɛ nibii nɛɛ, ni namɔ hã bo nɛkɛ hegbɛ nɛɛ?”

²⁴ Shi Yesu here nɔ ni ekɛɛ amɛ akɛ, “Mi hu mibabi nyɛ sane kome, ni kɛji nyɛtsɔ̃ɔ mi lɛ, mi hu matsɔ̃ɔ nyɛ nɔ hegbɛ ni mikɛfeɔ nibii nɛɛ.

²⁵ Yohane Baptisimɔ lɛ, nɛgbɛ ejɛ? Ŋwɛi ejɛ, loo gbɔmɛi adɛŋ?” Ni amɛtao mli yɛ amɛteŋ akɛ, “Kɛji wɔkɛɛ ejɛ ŋwɛi lɛ, eeekɛɛ wɔ akɛ, ‘Mɛɛ hewɔ nyɛheee Yohane nyɛyeee mɔ?’

²⁶ Ni kɛji wɔkɛɛ ejɛ gbɔmɛi adɛŋ lɛ, no hu wɔmiishe asafo lɛ gbeyei; ejaakɛ mɛi fɛɛ buɔ Yohane gbalɔ.”

²⁷ Kɛkɛ ni amɛhere Yesu nɔ amɛkɛɛ, “Wɔleee.” Lɛ hu ekɛɛ amɛ akɛ, “Belɛ mi hu mitsɔ̃ɔɔ nyɛ nɔ hegbɛ ni miyɔɔ hewɔ ni mifeɔ nibii nɛɛ mɔ.”

Bihii enyɔ lɛ he abɛ lɛ

²⁸ “Shi agbɛnɛ te nyɛsusuɔ tɛŋŋ? Nuu ko yɛ bii enyɔ; ni etee mɔ kome ŋɔɔ ni ekɛɛ, ‘Mibi; ŋmɛnɛ yaatsu nii yɛ miwaintrom lɛ mli.’

²⁹ Ni ehere nɔ ekɛɛ, ‘Miyaaa.’ Shi fee sɛɛ lɛ eshwa ehe, ni etee.

³⁰ Ni etee mɔ kroko lɛ hu ŋɔɔ, ni ekɛɛ lɛ nakai nɔŋŋ. Shi lɛ lɛ, ehere nɔ ekɛɛ, ‘Ataa, matee!’ Shi eyaaa.

³¹ Te mɛi enyɔ nɛɛ ateŋ mɔ ni fee nɔ ni amɛtsɛ lɛ sumɔɔŋ?” Amɛkɛɛ lɛ akɛ, “Tsutsumɔ lɛ ni.” Yesu kɛɛ amɛ akɛ, “Anɔkwale mikɛɔ nyɛ akɛ toohelɔi lɛ kɛ ajwamãŋi lɛ miitsɔ̃ nyɛhiɛ kɛmiiya Nyɔŋmɔ Maŋtsɛyeli lɛ mli.

³² Ejaakɛ Yohane ba nyɛŋɔɔ yɛ jalɛ gbɛ lɛ nɔ, ni nyɛ lɛ nyɛheee lɛ nyɛyeee; shi tóohelɔi kɛ ajwamãŋi lɛ he lɛ amɛye. Ni fee sɛɛ, be ni nyɛyoo hu lɛ, nyɛshwaaa nyɛhe tete, koni nyɛhe lɛ nyɛye.”

Waintrom mli apaafoi fɔ̃ji lɛ

³³ “Nyɛboa abɛ kroko hu toi,” Yesu kɛɛ, “Shĩatsɛ ko yɛ, ni efee waintrom, ni efo afabaŋ ewo he, ni etsa wainbu yɛ mli, ni emã mɔɔ yɛ mli; ni ekɛhã hulɔi apaayeli; ni edom.

³⁴ Ni be ni wainyibii kpamɔ be lɛ shɛ lɛ, etsu etsuji kɛtee hulɔi lɛ aŋɔɔ, akɛ amɛyaŋɔ eyibii lɛ eko amɛbahã lɛ.

³⁵ Ni hulɔi lɛ mɔmɔ etsuji lɛ, ni amɛyi mɔ kome, ni amɛgbe mɔ kome, ni amɛtswia mɔ kome hu tɛi.

³⁶ Asaŋ etsu tsuji krokomɛi ni fa fe tsutsu bii lɛ, ni amɛfee amɛ hu nakai nɔŋŋ.

³⁷ Shi fee sɛɛ lɛ etsu ebinuu kɛtee amɛŋɔɔ ekɛɛ, ‘Mibi lɛ, lɛ lɛ amɛhiɛ aaasɔ lɛ.’

³⁸ Shi hulɔi lɛ, be ni amɛna binuu lɛ moŋ lɛ, amɛkɛɛkɛɛ amɛhe akɛ, ‘Niyelɔ lɛ nɛ! Nyɛbaa, nyɛhãa wɔgbea lɛ, koni wɔŋɔ egboshinii lɛ.’

³⁹ Ni amɛmɔ lɛ amɛtsirɛ eyisɛɛ kɛjɛ waintrom lɛ mli, ni amɛyagbe lɛ.

⁴⁰ Agbɛnɛ, kɛji waintromtsɛ lɛ ba lɛ, mɛni eeefee hulɔi nɛɛ?”

⁴¹ Amɛkɛɛ lɛ akɛ, “Eeekpãtã gbɔmɛi fɔ̃ji nɛɛ ahiɛ butuu, ni ekɛ waintrom lɛ aaahã hulɔi krokomɛi apaayeli, mɛi ni kɛ yibii aaabahã lɛ yɛ be ni sa mli.”

⁴² Yesu kɛɛ amɛ akɛ, “Ani nyɛkaneko yɛ Ŋmalɛi lɛ amli dã akɛ, ‘Tɛ lɛ ni tsutswalɔi lɛ shɛ fɔ̃ lɛ, no nɔŋŋ etsɔ̃ koŋtɛ. Nuŋtsɔ lɛ dɛŋ enɛ jɛ, ni eyɛ naakpɛɛ yɛ wɔhiŋmɛiiaŋ?’

⁴³ No hewɔ lɛ, miikɛɛ nyɛ akɛ abaashɔ̃ Nyɔŋmɔ Maŋtsɛyeli lɛ yɛ nyɛdɛŋ, ni akɛaahã jeŋmaŋ ko ni woɔ yibii. [

⁴⁴ Ni mɔ fɛɛ mɔ ni aaagbee tɛ nɛɛ nɔ lɛ emli aaatsɛrɛ; shi mɔ ni tɛ lɛ aaagbee enɔ lɛ, eeegbɛlɛ lɛ mɔnyɔmɔnyɔ.”]

⁴⁵ Ni be ni osɔfonukpai lɛ kɛ Farisifoi lɛ nu ebɛi lɛ, amɛkɔ sɛɛ akɛ amɛ amɛhe ewieɔ lɛ.

⁴⁶ Ni kulɛ amɛmiitao akɛ amɛmɔɔ lɛ, shi amɛyashe asafoi lɛ agbeyei, ejaakɛ asafoi lɛ buɔ lɛ gbalɔ.