Marko 8 - ŊMALƐ KRƆŊKRƆŊ LƐ

Yesu hã mɛi akpei ejwɛ niyenii

¹ Nakai bei lɛ amli, be ni mɛi pii ebabua amɛhe naa ekoŋŋ ni amɛnaaa nɔ ko amɛye lɛ, Yesu tsɛ ekaselɔi lɛ kɛba eŋɔɔ, ni ekɛɛ amɛ akɛ,

² “Mimusuŋ miitsɔ̃ mi yɛ asafo lɛ he, ejaakɛ amɛkɛ mi ehi shi gbii etɛ̃ sɔŋŋ, ni amɛbɛ nɔ ko ni amɛbaaye.

³ Ni kɛji mihã amɛkɛ amɛmusuŋ hɔmɔ yiŋ kɛmiiya amɛwe lɛ, amɛaayatɔ biti yɛ gbɛteŋ ejaakɛ amɛteŋ mɛi komɛi ajɛɛhe jɛkɛ.”

⁴ Ni ekaselɔi lɛ here lɛ nɔ akɛ, “Nɛgbɛ aaanyɛ ana aboloo yɛ yɛ ŋa nɛɛ nɔ ni aaashɛ mɛnɛɛmɛi anaa?”

⁵ Ebi amɛ akɛ, “Aboloi enyiɛ nyɛyɔɔ?” Ni amɛkɛɛ, “Kpawo.”

⁶ Ni efa asafo lɛ akɛ amɛtara shikpɔŋ. Kɛkɛ ni ekɔlɔ aboloi kpawo lɛ, ni eda shi, ni ekumɔ mli ekɛhã kaselɔi lɛ koni amɛkɛmamɔ asafo lɛ hiɛ; ni amɛkɛmamɔ amɛhiɛ.

⁷ Amɛyɛ loi bibii fioo hu, ni ejɔɔ nɔ, ni efã akɛ akɛ no hu amãmɔ amɛhiɛ.

⁸ Ni amɛye ni amɛtɔrɔ, ni amɛhala fufuji ni shwɛ lɛ flɔtɔi kpawo obɔ̃bɔ̃.

⁹ Shi mɛi ni ye lɛ aaafee mɛi akpei ejwɛ. Ni ewo amɛ gbɛ.

¹⁰ Ni amrɔ lɛ ekɛ ekaselɔi lɛ bote lɛlɛ mli, ni eba Dalmanuta niiaŋ.

Farisifoi lɛ bi Yesu okadi

¹¹ Kɛkɛ ni Farisifoi lɛ ba ni amɛkɛ lɛ babɔ̃i ŋwanejee. Amɛmiitao ŋwɛi okadi yɛ edɛŋ, kɛmiika lɛ.

¹² Ni edɔmɔ ŋtsɔi yɛ emumɔ mli ekɛɛ, “Mɛni hewɔ nɛkɛ yinɔbii nɛɛ taoɔ okadi? Miikɛɛ nyɛ yɛ anɔkwale mli akɛ, kɛ aaahã yinɔbii nɛɛ okadi ko fii!”

¹³ Ni eshi amɛ, ni eyabote lɛlɛ mli ekoŋŋ ni etee faa lɛ sɛɛ.

Farisifoi lɛ amasha kɛ Herode masha lɛ

¹⁴ Shi amɛhiɛ ekpa nɔ ni amɛŋɔ aboloo akwaabɔi amɛkɛhiɛ amɛdɛŋ, amɛhiɛɛɛ eko yɛ lɛlɛ lɛ mli, akɛ ja ekome pɛ kɛkɛ.

¹⁵ Yesu bɔ amɛ kɔkɔ ekɛɛ, “Nyɛkwɛa jogbaŋŋ, ni nyɛhiɛ ahia nyɛhe nɔ yɛ Farisifoi lɛ amasha kɛ Herode masha lɛ he!”

¹⁶ Ni amɛtao naa yɛ amɛteŋ amɛkɛɛ, “Benɛ aboloo ni wɔhiɛɛɛ lɛ hewɔŋ.”

¹⁷ Ni be ni Yesu na le lɛ, ebi amɛ akɛ, “Mɛɛba nyɛsusuɔ akɛ aboloo ni nyɛhiɛɛɛ lɛ hewɔŋ? Ani nyɛyooko sɛɛ ni asaŋ nyɛnako nii anaa lolo? Ani nɛkɛ nyɛjwɛŋmɔ naa eŋa?

¹⁸ Nyɛyɛ hiŋmɛii, ni nyɛnaaa nii? Nyɛyɛ toii hu, ni nyɛnuuu nii? Ni nyɛkaiii?

¹⁹ Be ni mikumɔ aboloi enumɔ lɛ amli miha mɛi akpei enumɔ lɛ, fufuji kafui enyiɛ nyɛhole?” Amɛkɛɛ, “Nyɔŋma kɛ enyɔ.”

²⁰ “Ni be ni mikumɔ kpawo lɛ mli mihã mɛi akpei ejwɛ lɛ, fufuji flɔtɔi enyiɛ nyɛhole?” Amɛkɛɛ, “Kpawo.”

²¹ Ni ebi amɛ akɛ, “Te feɔ tɛŋŋ ni nyɛnaaa nii anaa lolo nɛɛ?”

Yesu tsa shwilafo ko yɛ Betsaida

²² Amɛba Betsaida, ni mɛi komɛi kɛ shwilafo ko ba eŋɔɔ ni amɛkpa lɛ fai koni eta ehe.

²³ Ni emɔ shwilafo lɛ nineshi ni ekɛ lɛ je akrowa lɛ, ni etsɛ̃ lajɔ̃ eshwie ehiŋmɛii lɛ anɔ, ni ekɛ eniji shwie enɔ ni ebi lɛ akɛ, “Ani oona nii lo?”

²⁴ Nuu lɛ wo ehiɛ nɔ ni ekɛɛ, “Miina gbɔmɛi, shi amɛtamɔ tsei ni miinyiɛ.”

²⁵ No sɛɛ lɛ, esaa ekɛ eniji shwie shwilafo lɛ hiŋmɛii lɛ anɔ ekoŋŋ; agbɛnɛ shwilafo lɛ kwɛ nii hãa, ni atsa lɛ, ni ena nii fɛɛ faŋŋ.

²⁶ Kɛkɛ ni Yesu jie lɛ gbɛ ni eya eshĩa, ni ekɛɛ lɛ akɛ, “Kaaya akrowa lɛ mli tete!”

Petro odase ni eye yɛ Yesu he

²⁷ Ni Yesu kɛ ekaselɔi lɛ yiŋ amɛtee maji ni yɔɔ Kaisarea Filipi lɛ amli. Ebi amɛ yɛ gbɛ lɛ nɔ akɛ, “Namɔ mɛi kɛɔ akɛ mi ji?”

²⁸ Amɛto he akɛ, “Yohane Baptisilɔ lɛ; ni mɛi komɛi kɛɔ akɛ Elia; ni mɛi krokomɛi hu kɛɔ akɛ gbalɔi lɛ ateŋ mɔ kome ji bo.”

²⁹ Ni ebi amɛ akɛ, “Shi nyɛ lɛ, namɔ nyɛkɛɔ akɛ mi ji?” Petro here nɔ ekɛɛ lɛ akɛ, “Bo ji Kristo lɛ!”

³⁰ Ni Yesu tswa amɛnaa ma akɛ amɛkakɛɛ mɔ ko ehe sane.

Yesu wie egbele kɛ eshitee he

³¹ Ni ebɔ̃i amɛ tsɔ̃ɔmɔ akɛ, “Ja Gbɔmɔ Bi lɛ na amanehulu pii, ni onukpai lɛ kɛ osɔfonukpai lɛ kɛ mlatsɔɔlɔi lɛ ekwa lɛ, ni agbe lɛ ni gbii etɛ̃ sɛɛ lɛ ete shi ekoŋŋ.”

³² Ewie wiemɔ nɛɛ faŋŋ. Enɛ hã Petro kɛ lɛ tee afã, ni ebɔ̃i ehiɛ kãmɔ.

³³ Shi etsɔ̃ ehe, ni be ni ekwɛ ekaselɔi lɛ, ekã Petro hiɛ ekɛɛ, “Jee mihiɛ, Satan, ejaakɛ osusuuu Nyɔŋmɔ nii ahe, shi gbɔmɛi anibii ahe moŋ ojwɛŋɔ!”

Hekwamɔ

³⁴ Agbɛnɛ etsɛ asafo lɛ kɛ ekaselɔi lɛ hu kɛba eŋɔɔ, ni ekɛɛ amɛ akɛ, “Kɛji mɔ ko miisumɔ akɛ enyiɛ misɛɛ lɛ, ekwa ehe ni ewo esɛŋmɔtso lɛ ni enyiɛ misɛɛ.

³⁵ Ejaakɛ mɔ fɛɛ mɔ ni sumɔɔ akɛ ebaa esusuma yi lɛ, eeelaaje lɛ; shi mɔ ni laajeɔ esusuma yɛ mi kɛ Sanekpakpa lɛ hewɔ lɛ, eeehere eyiwala.

³⁶ Ejaakɛ mɛɛ sɛɛ gbɔmɔ naa, kɛji enine shɛ jeŋ muu lɛ fɛɛ nɔ ni elaaje lɛ diɛŋtsɛ esusuma lɛ?

³⁷ Aloo mɛni gbɔmɔ aaahã ni ekɛkpɔ̃ esusuma?

³⁸ Ejaakɛ mɔ fɛɛ mɔ ni mi kɛ miwiemɔi lɛ ahe feɔ lɛ hiɛgbele yɛ yinɔbii gbãlãfitelɔi kɛ eshafeelɔi nɛɛ ateŋ lɛ, lɛ hu ehe aaafee Gbɔmɔ Bi lɛ hiɛgbele be ni eeeba yɛ eTsɛ anunyam lɛ mli kɛ bɔfoi krɔŋkrɔŋi lɛ.”