Marko 7 - ŊMALƐ KRƆŊKRƆŊ LƐ

Blematsɛmɛi lɛ atsɔ̃ɔmɔi

¹ Agbɛnɛ Farisifoi lɛ kɛ mlatsɔɔlɔi lɛ ateŋ mɛi komɛi ni jɛ Yerusalɛm ba lɛ bua amɛhe naa kɛba Yesu ŋɔɔ.

² Amɛna akɛ ekaselɔi lɛ ateŋ mɛi komɛi yeɔ nii kɛ dɛ̃ ni abule, ni ji dɛ̃ ni afɔko.

³ Ejaakɛ Farisifoi lɛ kɛ Yudafoi lɛ fɛɛ lɛ, ja amɛkɛ nu efɔ amɛdɛ̃ jogbaŋŋ dani amɛyeɔ nii; amɛfeɔ enɛ amɛkɛyeɔ onukpai lɛ ablema tsɔ̃ɔmɔi lɛ anɔ.

⁴ Ni kɛ amɛjɛ jara nɔ amɛba lɛ, ja amɛju amɛhe dani amɛyeɔ nii. Ni nibii krokomɛi pii hu yɛ ni ato ahã amɛ ni amɛfeɔ yɛ kpuji kɛ gbɛi kɛ ayawai amlifɔmɔ kɛ saatsei ahefɔmɔ he.

⁵ Ni Farisifoi lɛ kɛ mlatsɔɔlɔi lɛ bi Yesu akɛ, “Mɛni hewɔ okaselɔi lɛ yeee onukpai lɛ ablema tsɔ̃ɔmɔi lɛ anɔ ni amɛfɔɔɔ amɛdɛ dani amɛyeɔ nii nɛɛ?”

⁶ Shi ehere nɔ ekɛɛ amɛ akɛ, “Lɛɛlɛŋ Yesaia gba yɛ nyɛ osatofoi nɛɛ ahe tamɔ bɔ ni aŋma lɛ akɛ, ‘Maŋ nɛɛ, amɛnaabui amɛkɛwoɔ mi; shi amɛtsui etsi ehe kɛje mihe kɛtee shɔŋŋ.

⁷ Shi yakatswaa amɛjaa mi lɛ, ejaakɛ amɛtsɔ̃ɔ tsɔ̃ɔmɔi ni ji gbɔmɛi akitãi.’

⁸ “Nyɔŋmɔ kitã lɛ, nyɛshi, ni gbɔmɛi ablema tsɔ̃ɔmɔi anɔ nyɛyeɔ.”

⁹ Ni ekɛɛ amɛ akɛ, “Nyɛfee jogbaŋŋ akɛ nyɛkwa Nyɔŋmɔ kitã lɛ koni nyɛye nyɛblema tsɔ̃ɔmɔi lɛ anɔ!

¹⁰ Ejaakɛ Mose kɛɛ, ‘Wo otsɛ kɛ onyɛ’, kɛ ‘Mɔ ni lomɔɔ etsɛ loo enyɛ lɛ, gbe aaagbe lɛ!’

¹¹ Shi nyɛ lɛ nyɛkɛɛ kɛ mɔ ko kɛɛ etsɛ loo enyɛ akɛ, ‘Nɔ ni kulɛ ooona yɛ midɛŋ lɛ, “Korban” (nɔ ni akɛke Nyɔŋmɔ) ni’ lɛ,

¹² belɛ nyɛhãaa efee nɔ ko ehã etsɛ loo enyɛ dɔŋŋ;

¹³ ni nyɛkɛ nyɛblema tsɔ̃ɔmɔi ni nyɛtsɔ̃ɔ lɛ egu Nyɔŋmɔ wiemɔ lɛ. Ni nyɛfeɔ nibii pii ni tamɔ enɛɛmɛi.”

Nibii ni buleɔ gbɔmɔ

¹⁴ Ni Yesu tsɛ asafo lɛ fɛɛ kɛba eŋɔɔ ekoŋŋ ni ekɛɛ amɛ akɛ, “Nyɛ fɛɛ nyɛboa mi toi ni nyɛnua shishi!

¹⁵ Nɔ ko bɛ ni jɛɔ kpo nɔ gbɛ boteɔ gbɔmɔ mli ni aaanyɛ lɛ abule, shi nɔ ni buleɔ gbɔmɔ ji nɔ ni jɛɔ emli lɛ. [

¹⁶ Kɛ mɔ ko yɛ toi ni akɛnuɔ nii lɛ, enu.”]

¹⁷ Ni be ni eje asafo lɛ ŋɔɔ eba shĩa lɛ, ekaselɔi lɛ bi lɛ abɛ lɛ shishi.

¹⁸ Ekɛɛ amɛ akɛ, “Ani nɛkɛ nyɛ hu nyɛnaaa nii ashishi? Nyɛnaaa akɛ nɔ fɛɛ nɔ ni jɛɔ kpo nɔ gbɛ boteɔ gbɔmɔ mli lɛ nyɛɛɛ lɛ abule,

¹⁹ ejaakɛ jeee etsui mli eboteɔ shi emusuŋ eyaa, ni eyajeɔ kpo yɛ tiafi mli?” (Yesu kɛɛ enɛ kɛtsɔ̃ɔ akɛ ŋmaa fɛɛ ŋmaa he tse.)

²⁰ Ni ekɛɛ akɛ, “Nɔ ni jɛɔ gbɔmɔ mli lɛ, no nɔŋŋ buleɔ lɛ.

²¹ Ejaakɛ mligbɛ ni ji gbɔmɛi atsuii amli lɛ, jɛi jwɛŋmɔi fɔ̃ji jɛɔ: ajwamãŋbɔɔ, juu, awuyeli,

²² gbãlãfitemɔ, hiɛjoomɔ, yiŋsha, shishiumɔ, nyɛnyɛŋtswibɔɔ, hiŋmɛisha, oshekuyeli, hewoo, kwashiai asaneyeli.

²³ Nii fɔ̃ji nɛɛ fɛɛ lɛ, mligbɛ amɛjɛɔ ni amɛbuleɔ gbɔmɔ.”

Siro Foinikeyoo lɛ hemɔkɛyeli

²⁴ Ni Yesu je jɛi, ni eyiŋ etee Tiro kɛ Sidon niiaŋ. Eyabote shĩa ko, ni esumɔɔɔ akɛ aleɔ, shi enyɛɛɛ ehe etee.

²⁵ Ejaakɛ ejɛishɛɛ nɔŋŋ ni yoo ko ni mumɔ fɔŋ yɔɔ ebiyoo fioo mli nu ehe ni eba ebakula shi yɛ enaji anaa.

²⁶ Shi yoo lɛ jeŋmajiaŋ yoo ji lɛ, ni he ni ejɛ ji Foinike ni yɔɔ Siria lɛ. Ebakpa Yesu fai ni efã mumɔ fɔŋ lɛ yɛ ebiyoo lɛ mli.

²⁷ Shi Yesu kɛɛ lɛ akɛ, “Hã bii lɛ fɛɛ atɔrɔ dã; ejaaa akɛ aŋɔɔ bii aboloo lɛ ashɛrɛɔ ashwieɔ gbeebii.”

²⁸ Shi yoo lɛ here nɔ ekɛɛ, “Nuŋtsɔ, eyɛ mli moŋ, shi bɛ gbeebii ni yɔɔ okplɔ̃ lɛ shishi lɛ hu yeɔ bii lɛ afufuji lɛ eko!”

²⁹ Yesu kɛɛ lɛ akɛ, “Owiemɔ nɛɛ hewɔ lɛ, yaa! Mumɔ fɔŋ lɛ eje obi lɛ mli.”

³⁰ Yoo lɛ yiŋ etee eshĩa ni eyana ebiyoo lɛ kã saa nɔ ni mumɔ fɔŋ lɛ eje emli.

Yesu tsa mumui toimulɔ ko

³¹ Yesu ku esɛɛ ekoŋŋ kɛjɛ Tiro niiaŋ kɛfoŋ yɛ Sidon ni etsɔ̃ Dekapoli kpokpai lɛ anɔ kɛba Galilea Ŋshɔ lɛ naa.

³² Ni akɛ mɔ ko ni muɔ toi ni mumui hu ji lɛ ba eŋɔɔ, ni amɛkpa lɛ fai koni ekɛ enine aŋmɛ enɔ.

³³ Ni Yesu kɛ lɛ je asafo lɛ teŋ kɛtee afã, ni ekɛ ewaobii wo etoii amli, ni etsɛ̃ lajɔ̃ ekɛsa elilɛi he.

³⁴ Ni ekwɛ ŋwɛi ni ehuu yɛ emli ni ekɛɛ mumui toimulɔ lɛ akɛ, “Hefata!” Eshishi ji, “Gbelemɔ!”

³⁵ Ni amrɔ lɛ etoii lɛ gbele, ni elilɛi kpãa lɛ fɛne, ni ewie faŋŋ.

³⁶ Ni Yesu tswa amɛnaa ma akɛ amɛkakɛɛ mɔ ko; shi babaoo ni etswaa amɛnaa ma lɛ, babaoo ni amɛjajeɔ ji no.

³⁷ Ni amɛhe jɔ̃ amɛhe babaoo diɛŋtsɛ ni amɛkɛɛ, “Efee nii fɛɛ jogbaŋŋ! Ehãa toimulɔi nuɔ nii, ni mumuii hu wieɔ.”