Marko 4 - ŊMALƐ KRƆŊKRƆŊ LƐ

Nidulɔ lɛ he abɛ lɛ

¹ Yesu bɔ̃i nitsɔɔmɔ ekoŋŋ yɛ Galilea Ŋshɔ lɛ naa. Mɛi babaoo babua amɛhe naa yɛ ehe, no hewɔ lɛ, ebote lɛlɛ ko mli ni eyata shi. Lɛlɛ lɛ ma nu lɛ hiɛ, ni asafo lɛ fɛɛ bua shi yɛ ŋshɔ lɛ naa.

² Ni etsɔ̃ɔ amɛ nii pii yɛ abɛbuai amli; yɛ enitsɔ̃ɔmɔ lɛ mli lɛ ekɛɛ,

³ “Nyɛboa toi! Naa, nidulɔ ko yiŋ etee nidumɔ.

⁴ Ni eba mli akɛ be ni eshwãa wui lɛ, ekomɛi yashwie gbɛ toi, ni loofɔji ba amɛbakɔlɔ.

⁵ Ekomɛi yashwie tɛsai anɔ he ni amɛnaaa su pii yɛ, ni amɛkwɛ̃ oya, ejaakɛ amɛnaaa su ni mli kwɔ.

⁶ Shi be ni hulu je lɛ, eshã amɛ, ni akɛni amɛbɛ fã hewɔ lɛ amɛglã.

⁷ Wui lɛ ekomɛi yashwie ŋmei ateŋ, ni ŋmei lɛ kwɛ̃ kɛba ŋwɛi ni amɛgbe tsei lɛ, hewɔ lɛ amɛwooo yibii.

⁸ Shi wui lɛ ekomɛi yashwie shikpɔŋ kpakpa nɔ, ni amɛkwɛ̃ ni amɛdara, ni amɛwo yibii: eko nyɔŋmai etɛ̃, eko nyɔŋmai ekpaa, kɛ eko oha.”

⁹ Ni Yesu kɛɛ, “Mɔ ni yɔɔ toi ni akɛnuɔ nii lɛ, hã ni enu.”

Nɔ hewɔ ni Yesu wie yɛ abɛbuai amli

¹⁰ Be ni shwɛ Yesu kome lɛ, mɛi ni yɔɔ ehe lɛ kɛ kaselɔi nyɔŋma kɛ enyɔ lɛ bi lɛ abɛ lɛ shishi.

¹¹ Ni ekɛɛ amɛ akɛ, “Nyɛ lɛ akɛ Nyɔŋmɔ Maŋtsɛyeli lɛ he teemɔ sane lɛ ehã nyɛ, shi mɛi ni yɔɔ sɛɛ lɛ, abɛbuai amli akɛ amɛ wieɔ nii fɛɛ yɛ koni

¹² ‘Na lɛ amɛna nɛ, shi amɛkayoo, ni nu lɛ amɛnu nɛ, shi amɛkana shishi; ni eba lɛ akɛ amɛkpale ni akɛ amɛhe eshai lɛ afa amɛ.’ ”

Yesu tsɔ̃ɔ nidulɔ lɛ he abɛ lɛ shishi

¹³ Kɛkɛ ni Yesu bi amɛ akɛ, “Ani nyɛnuuu abɛ nɛɛ shishi? Belɛ te aaafee tɛŋŋ mɔ ni nyɛaanu abɛi lɛ fɛɛ shishiŋ?

¹⁴ Nidulɔ lɛ duɔ Nyɔŋmɔ wiemɔ lɛ.

¹⁵ Gbɛtoi bii lɛ ji mɛi ni nuɔ wiemɔ lɛ, shi amrɔ nɔŋŋ ni Satan baa ebasharaa wiemɔ ni adu yɛ amɛtsuiiaŋ lɛ.

¹⁶ Tɛsaa shikpɔŋ nɔ bii lɛ ji mɛi ni nuɔ wiemɔ lɛ ni amɛmɔɔ mli mra kɛ miishɛɛ;

¹⁷ shi amɛbɛ shishifã yɛ amɛ diɛŋtsɛ amɛmli hewɔ lɛ be fioo kɛkɛ amɛhiɔ shi, ni kɛ amanehulu loo yiwaa te shi yɛ wiemɔ lɛ hewɔ lɛ, amrɔ nɔŋŋ ni amɛnane tɔ̃tɔ̃ɔ.

¹⁸ Shikpɔŋ ni ŋmei yɔɔ nɔ bii lɛ ji mɛi ni nuɔ wiemɔ lɛ;

¹⁹ shi je nɛɛŋ henaagbamɔ kɛ ninamɔ he lakamɔ kɛ nii krokomɛi ahe akɔnɔ yaboteɔ amɛmli ni amɛgbeɔ wiemɔ lɛ ni ewooo yibii.

²⁰ Shi shikpɔŋ kpakpa nɔ bii lɛ ji mɛi ni nuɔ wiemɔ lɛ ni amɛmɔɔ mli, ni amɛwoɔ yibii, eko nyɔŋmai etɛ̃, eko nyɔŋmai ekpaa, kɛ eko hu oha.”

Kane ni akɛhɔ tsese shishi

²¹ Ni Yesu bi amɛ akɛ, “Ani akɛ kane maa tsese loo saatso shishi? Ani jeee kanetso nɔ akɛmaa?

²² Nɔ ko bɛ ni abu nɔ ni agbeleŋ nɔ, ni asaŋ nɔ ko bɛ ni akɛtee ni ajieŋ lɛ shi.

²³ Kɛji mɔ ko yɛ toi ni ekɛnuɔ nii lɛ, enu.”

²⁴ Ni esaa ekɛɛ amɛ akɛ, “Nyɛjwɛŋa nɔ ni nyɛnuɔ nɛɛ he jogbaŋŋ! Nɔ susumɔ nɔ ni nyɛkɛsusuɔ lɛ, no akɛaasusu ahã nyɛ, ni aaafata he ahã nyɛ.

²⁵ Mɔ ni yɔɔ nɔ ko lɛ, aaahã lɛ eko afata he, shi mɔ ni bɛ nɔ ko lɛ, aaahe fioo ni eyɔɔ lɛ tete yɛ edɛŋ.”

Dumɔwui ni kwɛ̃ lɛ

²⁶ Yesu tee nɔ ekɛɛ, “Bɔ ni Nyɔŋmɔ maŋtsɛyeli lɛ yɔɔ nɛ, etamɔ nuu ko ni shwãa dumɔwui yɛ shikpɔŋ.

²⁷ Eyawɔɔ nyɔɔŋ, ni eteɔ shi kɛji je tsɛre, ni no mli fɛɛ lɛ dumɔwui lɛ kwɛ̃ɔ, ni edaa, ni eleee bɔ ni feɔ.

²⁸ Shikpɔŋ lɛ diɛŋtsɛ woɔ yibii: jwɛifɔ lɛ tsutsu, kɛkɛ lɛ ŋmãatso lɛ, ni no sɛɛ lɛ ŋmãa lɛ diɛŋtsɛ yɛ ŋmãatso yi.

²⁹ Shi kɛ ŋmãa lɛ tsu lɛ, amrɔ lɛ ehãa akɛ nikpamɔ kakla lɛ yaa, ejaakɛ ŋmaakpamɔbe lɛ eshɛ.”

Sinapi wu lɛ

³⁰ Yesu bi akɛ, “Mɛni he wɔkɛ Nyɔŋmɔ Maŋtsɛyeli lɛ aaato? Aloo mɛɛ abɛ wɔɔbu yɛ he?

³¹ Etamɔ sinapi wu ni ji wu bibioo fe shikpɔŋ nɔ wui fɛɛ.

³² Shi kɛ adu lɛ, ekwɛ̃ɔ, ni edaa fe shwie bai fɛɛ. Egbalaa niji kpelei, bɔ ni ŋwɛi loofɔji aaanyɛ afee tsui yɛ ehɔɔŋ lɛ shishi.”

³³ Yesu tsɔ̃ abɛbuai pii ni tamɔ enɛɛmɛi anɔ eshiɛ wiemɔ lɛ etsɔ̃ɔ mɛi lɛ, bɔ ni amɛaanyɛ amɛnu shishi.

³⁴ Ekɛ amɛ ewieee akɛ ja yɛ abɛbuai amli; shi kɛ shwɛ ekɛ ekaselɔi lɛ sɔŋŋ lɛ, etsɔ̃ɔ amɛ abɛi lɛ fɛɛ shishi.

Yesu fã ahum yi ni efɔ̃ɔ tswaa

³⁵ Nakai gbi lɛ nɔ nɔŋŋ be ni shɛ gbɛkɛnaashi lɛ, Yesu kɛɛ ekaselɔi lɛ akɛ, “Nyɛhãa wɔfoa ŋshɔ lɛ kɛyaa esɛɛgbɛ.”

³⁶ No hewɔ lɛ, amɛshi asafo lɛ ni amɛŋɔ lɛ bɔ ni eyɔɔ yɛ lɛlɛ lɛ mli lɛ nɔŋŋ kɛtee; ni lɛji krokomɛi hu fata ehe.

³⁷ Shi ahum kpele ko batswa, ni ŋshɔkei kumɔ wo lɛlɛ lɛ mli, ni eehe eyi.

³⁸ Ni Yesu yɛ lɛlɛ lɛ sɛɛgbɛ; etsɔle sune ni ewɔ. Ni kaselɔi lɛ tsĩɛ lɛ ni amɛkɛɛ, “Tsɔɔlɔ, ni wɔhiɛ heɔ akpãtã nɛɛ, jeee ohe sane koŋ?”

³⁹ Ni ete shi ni efã kɔɔyɔɔ lɛ yi, ni ekɛɛ ŋshɔ lɛ akɛ, “Bu onaa ni ofee diŋŋ!” Kɔɔyɔɔ lɛ fɔ̃ɔ tswaa, ni ŋshɔ lɛ ŋmɛ dɛmm.

⁴⁰ Kɛkɛ ni ebi amɛ akɛ, “Mɛɛba nyɛsheɔ gbeyei nɛkɛ? Mɛɛba ni nyɛbɛ hemɔkɛyeli?”

⁴¹ Amɛshe gbeyei naakpa, ni amɛkɛɛkɛɛ amɛhe akɛ, “Namɔ po nɛ, ni kɔɔyɔɔ kɛ ŋshɔ tete boɔ lɛ toi nɛɛ?”