Marko 2 - ŊMALƐ KRƆŊKRƆŊ LƐ

Kuumɔhelatsɛ ko tsamɔ

¹ Gbii komɛi asɛɛ lɛ, Yesu ba Kapernaum ekoŋŋ, ni anu ehe akɛ eyɛ shĩa.

² Mɛi babaoo babua amɛhe naa bɔ ni anaaa gbɛ yɛ agbo lɛ naa tete. Be ni eshiɛɔ etsɔ̃ɔ mɛi lɛ,

³ akɛ mɔ ko ni yeɔ kuumɔhela ni mɛi ejwɛ tere lɛ ba eŋɔɔ.

⁴ Shi akɛni mɛi lɛ ayifalɛ hewɔ lɛ amɛnyɛɛɛ amɛkɛ lɛ ashɛ eŋɔɔ lɛ, amɛyafã tsu ni eyɔɔ mli lɛ yiteŋ, ni amɛgbu folɔ ni amɛshiu helatsɛ lɛ kɛ saa ni ekã nɔ lɛ kɛtsɔ̃ jɛi kɛbayi shi.

⁵ Be ni Yesu na amɛhemɔkɛyeli lɛ, ekɛɛ helatsɛ lɛ akɛ, “Bi, akɛ ohe eshai lɛ efa bo!”

⁶ Shi mlatsɔɔlɔi komɛi ni tara jɛi lɛ susu yɛ amɛtsuiiaŋ akɛ,

⁷ “Mɛɛ hewɔ mɔ nɛ wieɔ wiemɔ ni tamɔ enɛ? Eebɔ musu! Namɔ aaanyɛ ekɛ eshai afa, akɛ ja Nyɔŋmɔ kome kɛkɛ?”

⁸ Amrɔ nɔŋŋ ni Yesu yoo yɛ emumɔ mli akɛ amɛmiisusu nɛkɛ yɛ amɛtsuiiaŋ lɛ, ebi amɛ akɛ, “Mɛɛba nyɛsusuɔ nɛkɛ nii nɛɛ yɛ nyɛtsuiiaŋ?

⁹ Te emli nɔ ni kɛɛmɔ jaraaa hu, akɛ aaakɛɛ mɔ ni ekumɔ lɛ akɛ, ‘Akɛ ohe eshai lɛ efa bo’, aloo ‘Tee shi, wo osaa lɛ ni onyiɛ’ lɛ?

¹⁰ Shi bɔ ni afee ni nyɛna akɛ Gbɔmɔ Bi lɛ yɛ hegbɛ yɛ shikpɔŋ lɛ nɔ akɛ ekɛ eshai faa lɛ” ekɛɛ mɔ ni ekumɔ lɛ akɛ,

¹¹ “Miikɛɛ bo akɛ, tee shi, wo osaa lɛ ni oya shĩa.”

¹² Ni amrɔ lɛ ete shi, ni ewo esaa lɛ ni eje kpo yɛ amɛ fɛɛ amɛhiɛ. Amɛ fɛɛ amɛnaa kpɛ amɛhe, ni amɛwo Nyɔŋmɔ hiɛ nyam amɛkɛɛ, “Wɔnako enɛ eko dã!”

Levi tsɛmɔ

¹³ Ni Yesu je kpo ekoŋŋ kɛtee ŋshɔ lɛ naa. Asafo lɛ fɛɛ ba eŋɔɔ, ni ebɔ̃i amɛ nitsɔɔmɔ.

¹⁴ Ni be ni ehoɔ lɛ, ena Levi ni ji Alfeo bi lɛ ni eta toohemɔhe lɛ, ni ekɛɛ lɛ akɛ, “Nyiɛmɔ misɛɛ!” Ni ete shi enyiɛ esɛɛ.

¹⁵ Ni be ni Yesu ta niyenii ahe yɛ Levi shĩa lɛ, toohelɔi kɛ eshafeelɔi pii hu fata ekɛ ekaselɔi lɛ ahe ni ayeɔ nii lɛ ejaakɛ amɛyi fa, ni amɛnyiɛ esɛɛ.

¹⁶ Be ni Farisifoi lɛ ateŋ mlatsɔɔlɔi lɛ na akɛ Yesu kɛ eshafeelɔi kɛ toohelɔi nɛɛ miiye nii lɛ, amɛbi ekaselɔi lɛ akɛ, “Mɛɛba ni ekɛ toohelɔi kɛ eshafeelɔi yeɔ nii ni ekɛ amɛ nuɔ nɛɛ?”

¹⁷ Shi be ni Yesu nu lɛ, ekɛɛ amɛ akɛ, “Mɛi ni yɔɔ hewalɛ lɛ tsofatsɛ he ehiaaa amɛ, shi mɛi ni he yeɔ lɛ moŋ. Mibaaa jalɔi atsɛmɔ, shi eshafeelɔi moŋ.”

Ŋmaahilɛ he sane

¹⁸ Gbi ko be ni Yohane Baptisilɔ lɛ kaselɔi lɛ kɛ Farisifoi lɛ hiɔ ŋmaa lɛ, mɛi komɛi ba Yesu ŋɔɔ babi lɛ akɛ, “Mɛɛba ni Yohane kɛ Farisifoi lɛ akaselɔi lɛ hiɔ ŋmaa ni bo lɛ okaselɔi lɛ ehiii ŋmaa lɛ?”

¹⁹ Yesu to he ekɛɛ, “Ani ayɛmforowu lɛ bialɔi lɛ aaanyɛ ŋmaa ahi be mli ni ayɛmforowu lɛ kɛ amɛ yɔɔ lɛ? Gbii abɔ ni ayɛmforowu lɛ kɛ amɛ yɔɔ lɛ, amɛnyɛŋ ŋmaa amɛhi.

²⁰ Shi be aaaba ni aaaŋɔ ayɛmforowu lɛ kɛaajɛ amɛŋɔɔ; ni nakai gbi lɛ dani amɛaahi ŋmaa.

²¹ Mɔ ko kɛ mamanaa hee taaa atade momo; ejaakɛ mamanaa hee lɛ ni akɛta lɛ tserɛɔ emomo lɛ, ni fɔlɔ lɛ lɛɔ.

²² Asaŋ mɔ ko kɛ wain hee wooo wolotɔi memeji amli; ejaakɛ wain hee lɛ aaaflɛ wolotɔi lɛ, ni wain lɛ aaashwie shi, ni wolotɔi lɛ aaafite; shi moŋ wain hee lɛ wolotɔi hei amli akɛwoɔ.”

Hejɔɔmɔgbi lɛ Nuŋtsɔ ji Gbɔmɔ Bi lɛ

²³ Hejɔɔmɔ gbi lɛ eko nɔ lɛ Yesu yatsɔ̃ abele ŋmɔji komɛi amli, ni be ni ekaselɔi lɛ yaa lɛ, amɛbɔ̃i abele lɛ kuumɔ.

²⁴ No hewɔ lɛ, Farisifoi lɛ kɛɛ Yesu akɛ, “Kwɛ, mɛɛba okaselɔi lɛ feɔ nɔ ni aŋmɛɛɛ gbɛ akɛ afeɔ yɛ hejɔɔmɔ gbi lɛ nɔ nɛɛ?”

²⁵ Yesu to he akɛ, “Ani nyɛkaneko nɔ ni David fee gbi ko be ni efi lɛ ni hɔmɔ ye lɛ kɛ mɛi ni ekɛnyiɛ lɛ dã.

²⁶ Bɔ ni ebote Nyɔŋmɔ We lɛ yɛ Osɔfonukpa Abiatar yinɔ ni eyaye aboloo ni akɛmãa Nyɔŋmɔ hiɛ lɛ, ni ehã mɛi ni ekɛnyiɛ lɛ hu eko amɛye, tsɛbelɛ mɔ ko bɛ hegbɛ ni eyeɔ akɛ ja osɔfoi lɛ kɛkɛ lɛ?”

²⁷ Ni Yesu kɛɛ amɛ akɛ, “Gbɔmɔ hewɔ ato hejɔɔmɔ gbi lɛ, shi jeee hejɔɔmɔ gbi lɛ hewɔ abɔ gbɔmɔ.

²⁸ No hewɔ lɛ, hejɔɔmɔ gbi lɛ po nuŋtsɔ ji Gbɔmɔ Bi lɛ.”