Marko 15 - ŊMALƐ KRƆŊKRƆŊ LƐ

Yesu yɛ Pilato hiɛ

¹ Ni be ni je kɛɛ etsɛreɔ lɛ, osɔfonukpai lɛ kɛ maŋ onukpai lɛ kɛ mlatsɔɔlɔi lɛ kɛ akwaashɔŋ muu lɛ fɛɛ tee ajina, ni amɛfi Yesu, ni amɛkpala lɛ kɛyahã Pilato.

² Ni Pilato bi lɛ akɛ, “Ani bo ji Yudafoi lɛ amaŋtsɛ lɛ?” Ni ehere nɔ ekɛɛ lɛ akɛ, “Okɛɛ.”

³ Ni osɔfonukpai lɛ folɔ enaa pii.

⁴ Ni Pilato bi lɛ ekoŋŋ akɛ, “Otooo he eko? Kwɛ onaa sɔŋŋ ni amɛfolɔɔ.”

⁵ Shi Yesu etooo he eko dɔŋŋ, ni Pilato hiɛ fee lɛ yaa.

Abu Yesu gbele fɔ

⁶ Shi daa kɛshɛ Gbijurɔ lɛ, eŋmɛɔ gboklɛfonyo kome ni amɛbiɔ lɛ he ehãa amɛ.

⁷ Shi mɔ ko yɛ ni atsɛɔ lɛ Baraba ni awo lɛ niiaŋ kɛ atuatselɔi ni gbe gbɔmɔ yɛ atuatsemɔ lɛ mli.

⁸ Kɛkɛ ni asafo lɛ ba babɔ̃i lɛ faikpamɔ akɛ efee tamɔ bɔ ni efeɔ daa lɛ ehã amɛ.

⁹ Shi Pilato here amɛ nɔ ni ekɛɛ, “Nyɛmiisumɔ akɛ miŋmɛɛ Yudafoi amaŋtsɛ lɛ he mihã nyɛ lo?”

¹⁰ Ejaakɛ ele akɛ hetsɛ̃ naa ni osɔfonukpai lɛ mɔ lɛ hã lɛ.

¹¹ Shi osɔfonukpai lɛ wo asafo lɛ yiŋ akɛ amɛhã eŋmɛɛ Baraba moŋ he ehã amɛ.

¹² Ni Pilato saa here nɔ ekɛɛ amɛ ekoŋŋ akɛ, “Belɛ mɛni nyɛtaoɔ akɛ mifee mɔ ni nyɛtsɛɔ lɛ Yudafoi amaŋtsɛ lɛ he mɔ?”

¹³ Shi amɛbolɔ ekoŋŋ amɛkɛɛ, “Sɛŋmɔ lɛ!”

¹⁴ Ni Pilato bi amɛ akɛ, “Shi mɛɛ efɔŋ po efee?” Shi amɛbolɔ fe tsutsu lɛ akɛ, “Sɛŋmɔ lɛ!”

¹⁵ Ni akɛni Pilato taoɔ akɛ efee nɔ ni asafo lɛ taoɔ hewɔ lɛ, eŋmɛɛ Baraba he ehã amɛ; ni Yesu lɛ, ekɛ kpelebii yi lɛ, ni ekɛ lɛ hã ni ayasɛŋ lɛ.

Asraafoi lɛ ye Yesu he fɛo

¹⁶ Ni asraafoi lɛ kpala lɛ kɛtee amralo mɔɔ lɛ mli, ni amɛtsɛ asraafoiaku muu lɛ fɛɛ kɛbakpe.

¹⁷ Ni amɛwo lɛ atade tsuru ko, ni amɛfee ŋmei akekre amɛkɛfi eyitso.

¹⁸ Ni amɛbɔ̃i lɛ ŋamɔ akɛ, “Oshwiee, Yudafoi amaŋtsɛ.”

¹⁹ Ni amɛkɛ tso tswia eyiteŋ, ni amɛfɛ̃ lajɔ̃ amɛshwie ehe, ni amɛkula shi amɛja lɛ.

²⁰ Ni be ni amɛyeyee ehe fɛo lɛ, amɛ jie atade tsuru lɛ yɛ ehe, ni amɛkɛ lɛ diɛŋtsɛ etadei lɛ wo lɛ, ni amɛkpala lɛ kɛtee ni amɛyasɛŋ lɛ.

Yesu sɛŋmɔ kɛ egbele

²¹ Ni asraafoi lɛ nyɛ Simon Kirenenyo ko ni jɛ kosɛɛ ni ji Aleksandro kɛ Rufo tsɛ lɛ nɔ akɛ ewo Yesu sɛŋmɔtso lɛ.

²² Ni amɛkpala lɛ kɛtee he ko ni atsɛɔ jɛi Golgota lɛ, eshishi ji Yitsoŋoŋohe.

²³ Ni amɛhã lɛ wain ni akɛ mire efutuŋ akɛ enu; shi enuuu.

²⁴ Ni be ni amɛsɛŋ lɛ lɛ, amɛja etadei lɛ amli, ni amɛfɔ̃ nɔ oshiki, nɔ ni mɔ akɔ.

²⁵ Shi ŋmɛlɛ nɛɛhu mli amɛsɛŋ lɛ lɛ.

²⁶ Ni aŋma sane ni akɛfɔ̃ enɔ lɛ yɛ eyiteŋ akɛ, “YUDAFOI LƐ AMAŊTSƐ LƐ.”

²⁷ Ni amɛsɛŋ ojotswalɔi enyɔ amɛfata ehe, mɔ kome ye eninejurɔ, ni mɔ kome ye ebɛku. [

²⁸ Ni ŋmalɛ ni kɛɛ akɛ, “Ni abu lɛ ashi efɔŋfeelɔi anɔ” lɛ ba mli.]

²⁹ Ni mɛi ni hoɔ lɛ wie musubɔɔ wiemɔi amɛshi lɛ, ni amɛhoso amɛyitsei ni amɛkɛɛ, “Ei, bo ni okumɔɔ Sɔlemɔtsu ni osaa omaa lɛ gbii etɛ̃ lɛ nɛ!

³⁰ Heremɔ bo diɛŋtsɛ oyiwala, ni oje sɛŋmɔtso lɛ nɔ okpeleke shi!”

³¹ Nakai nɔŋŋ osɔfonukpai lɛ kɛ mlatsɔɔlɔi lɛ hu ye ehe fɛo yɛ amɛteŋ amɛkɛɛ, “Ehere mɛi krokomɛi ayiwala, shi lɛ diɛŋtsɛ enɔ lɛ enyɛɛɛ ehere;

³² Kristo, Israel maŋtsɛ lɛ, aje sɛŋmɔtso lɛ nɔ akpeleke shi koo, koni wɔna ni wɔhe wɔye!” Ni mɛi ni asɛŋ afata ehe lɛ hu bɔ lɛ ahora.

³³ Ni be ni shɛ ŋmɛlɛ nyɔŋma kɛ enyɔ lɛ, duŋ wo yɛ shikpɔŋ lɛ nɔ fɛɛ kɛyashi ŋmɛji etɛ̃ mli.

³⁴ Ni ŋmɛji etɛ̃ mli lɛ, Yesu bo kɛ gbee ni wa ekɛɛ, “Eloi, Eloi, lama Sabaktani?” Eshishi ji, “MiNyɔŋmɔ, miNyɔŋmɔ, mɛɛba okwa mi?”

³⁵ Ni be ni mɛi ni damɔ jɛi lɛ ateŋ mɛi komɛi nu lɛ, amɛkɛɛ, “Naa, eetsɛ Elia.”

³⁶ Ni mɔ ko sha foi ni eyaŋɔ ŋshɔŋ kotsa etsɔ ashiŋ mli, ni ekɛma tso naa ehã lɛ akɛ enu ni ekɛɛ, “Nyɛhãa wɔmɛa ni wɔkwɛ akɛ Elia aaabajie lɛ lo.”

³⁷ Ni Yesu bo waa ni ebu enaa.

³⁸ Ni Sɔlemɔtsu lɛ mli muhɔɔ lɛ mli gba enyɔ kɛjɛ ŋwɛi kɛbayi shi.

³⁹ Shi be ni asraafoiohaatsɛ ni damɔ eŋɛlɛnɔ lɛ na akɛ ebo nɛkɛ ni ebu enaa lɛ, ekɛɛ, “Lɛɛlɛŋ akɛ nɛkɛ gbɔmɔ nɛɛ, Nyɔŋmɔ Bi ni!”

⁴⁰ Ni yei komɛi hu yɛ jɛi ni amɛdamɔ sɛɛ flɛŋŋ amɛmiikwɛ; amɛteŋ mɛi komɛi ji Maria Magdalena kɛ Maria, Yakobofio kɛ Yose nyɛ lɛ, kɛ Salome,

⁴¹ mɛi ni be ni eyɔɔ Galilea ni amɛnyiɛɔ esɛɛ ni amɛsɔ̃mɔɔ lɛ lɛ, kɛ yei krokomɛi pii ni kɛ lɛ ba Yerusalɛm lɛ.

Yesu fuu

⁴² Ni be ni shɛ gbɛkɛ lɛ, akɛni eji Hesaamɔ gbi ni nyiɛ hejɔɔmɔ gbi lɛ hiɛ hewɔ lɛ,

⁴³ Yosef ni jɛ Arimatia, ni ji akwaashɔŋnyo ko ni yɔɔ gbɛi ni lɛ hu ekwɛɔ Nyɔŋmɔ Maŋtsɛyeli lɛ gbɛ lɛ, ba ni ekɛ ekãa yiŋ kɛtee Pilato ŋɔɔ, ni eyabi Yesu gbonyo lɛ.

⁴⁴ Shi Pilato hiɛ fee lɛ yaa akɛ egbo momo; ni etsɛ asraafoiohaatsɛ lɛ ni ebi lɛ akɛ egbo etsɛ lo?

⁴⁵ Ni be ni enu kɛjɛ asraafoiohaatsɛ lɛ naa lɛ, ekɛ gbonyo lɛ ke Yosef.

⁴⁶ Ni Yosef yahe klala, ni ebajie lɛ kɛkpeleke shi, ni ekɛ klala lɛ ha ehe, ni ekɛ lɛ yaŋmɛ gbonyobu ni akpɛ yɛ tɛsaa mli lɛ mli, ni ekoklo tɛ ekɛŋa bu lɛ naa.

⁴⁷ Ni Maria Magdalena kɛ Maria, Yose nyɛ lɛ, miikwɛ, ni amɛna he ni akɛ lɛ ŋmɛ lɛ.