Marko 14 - ŊMALƐ KRƆŊKRƆŊ LƐ

Ato Yesu yinɔ apam

¹ Be ni eshwɛ gbii enyɔ ni ayeɔ Hehoo kɛ Akpiti Gbijurɔ lɛ, osɔfonukpai lɛ kɛ mlatsɔɔlɔi lɛ tao bɔ ni amɛaafee ni amɛmɔ Yesu yɛ ŋaa mli ni amɛgbe lɛ.

² Shi amɛkɛɛ, “Jeee Gbijurɔ lɛ nɔ, koni basabasafeemɔ akaba maŋ lɛ mli.”

Afɔ Yesu mu yɛ Betania

³ Be ni Yesu yɔɔ Betania yɛ Simon, kpitiyelɔ lɛ, we lɛ ni eta niyeniiashi lɛ, yoo ko ni hiɛ alabastro tɔ ni nardo mu ŋmiiŋmi ni jara wa naakpa yɔɔ mli ba; ni ejwa alabastro tɔ lɛ, ni efɔse mu lɛ eshwie Yesu yiteŋ.

⁴ Shi mɛi komɛi ni yɔɔ jɛi lɛ amli wo la ni amɛkɛɛkɛɛ amɛhe akɛ, “Mɛni hewɔ ni afite mu lɛ nɛkɛ nɛɛ?

⁵ Ejaakɛ kulɛ nɛkɛ mu nɛɛ, aaanyɛ ahɔ̃ɔ ana fe denarioi ohai etɛ̃ ni akɛhã ohiafoi!” Ni amɛwie yoo lɛ he huhuuhu.

⁶ Shi Yesu kɛɛ, “Nyɛfɔ̃a lɛ hiɛmɔ! Mɛni hewɔ nyɛhaoɔ lɛ? Etsu nitsumɔ fɛɛfɛo ehã mi.

⁷ Ejaakɛ ohiafoi lɛ nyɛkɛ amɛ yɛ daa, ni be fɛɛ be ni nyɛsumɔɔ lɛ nyɛaanyɛ amɛ ejurɔ nyɛfee; shi mi lɛ jeee daa mikɛ nyɛ aaahi shi.

⁸ Efee nɔ ni ebaanyɛ; etsɔ̃ hiɛ ebafɔ migbɔmɔtso lɛ mu eto mifuu.

⁹ Miikɛɛ nyɛ yɛ anɔkwale mli akɛ, he fɛɛ he ni aaashiɛ Sanekpakpa lɛ yɛ, yɛ je lɛ mli fɛɛ lɛ, aaagba nɔ ni yoo nɛɛ efee nɛɛ hu akɛkai lɛ.”

Yuda kpɛlɛ̃ nɔ akɛ eeetsɔ̃ɔ Yesu sɛɛgbɛ

¹⁰ Kɛkɛ ni Yuda Iskariot, mɛi nyɔŋma kɛ enyɔ lɛ ateŋ mɔ kome lɛ, yiŋ etee osɔfonukpai lɛ aŋɔɔ koni eyatsɔ̃ɔ amɛ Yesu sɛɛgbɛ.

¹¹ Shi amɛ lɛ be ni amɛnu lɛ amɛnya, ni amɛwo lɛ shi akɛ amɛaahã lɛ shika. Hewɔ lɛ, etao bɔ ni eeefee ni ehã amɛnine ashɛ enɔ yɛ be ni sa mli.

Yesu kɛ ekaselɔi lɛ anaagbee niyenii

¹² Akpiti Gbii Juji lɛ amli klɛŋklɛŋ gbi lɛ nɔ, be ni agbeɔ Hehoo toobi lɛ, Yesu kaselɔi lɛ bi lɛ akɛ, “Nɛgbɛ osumɔɔ akɛ wɔyasaa nii wɔto wɔhã bo ni oye Hehoo lɛ yɛ?”

¹³ Ni etsu ekaselɔi lɛ ateŋ mɛi enyɔ, ni ekɛɛ amɛ akɛ, “Nyɛyaa maŋ lɛ mli, ni nuu ko ni hiɛ nu kɛ kpulu kɛ nyɛ aaakpe; nyɛnyiɛa esɛɛ;

¹⁴ ni he ni eeeyabote lɛ, nyɛkɛa shĩatsɛ lɛ akɛ, ‘Tsɔɔlɔ lɛ kɛɛ, nɛgbɛ gbɔiatoohe lɛ ni mikɛ mikaselɔi lɛ baaye Hehoo lɛ yɛ mli lɛ yɔɔ?’

¹⁵ Ni eeetsɔ̃ɔ nyɛ ŋwɛi asa kpeteŋkple ko ni awula mli ni asaa jɛi; nyɛsaa nii nyɛtoa wɔ yɛ jɛi.”

¹⁶ Ni ekaselɔi lɛ yiŋ amɛtee maŋ lɛ mli ni amɛyana bɔ ni ekɛɛ amɛ lɛ, ni amɛsaa Hehoo niyenii lɛ amɛto.

¹⁷ Ni be ni shɛ gbɛkɛ lɛ, ekɛ mɛi nyɔŋma kɛ enyɔ lɛ tee jɛi.

¹⁸ Be ni amɛtara shi amɛyeɔ nii lɛ, Yesu kɛɛ, “Miikɛɛ nyɛ yɛ anɔkwale mli akɛ, nyɛteŋ mɔ kome ni kɛ mi miiye nii baatsɔ̃ɔ misɛɛgbɛ.”

¹⁹ Ni amɛbɔ̃i ŋkɔmɔyeli kɛ lɛ bimɔ ekomekome akɛ, “Miŋ lo?”

²⁰ Ni ehere nɔ ekɛɛ amɛ akɛ, “Nyɛ mɛi nyɔŋma kɛ enyɔ lɛ ateŋ mɔ komeŋ, mɔ nine ni kɛ minine kpeɔ yɛ kã lɛ mli lɛ.

²¹ Gbɔmɔ Bi lɛ miiya tamɔ bɔ ni aŋma yɛ ehe lɛ moŋ; shi kpoo hã mɔ ni tsɔ̃ɔ Gbɔmɔ Bi lɛ sɛɛgbɛ lɛ! Faŋ nɔ ni anaaa afɔ nakai gbɔmɔ lɛ.”

Nuŋtsɔ Niyenii lɛ shishitoo

²² Ni be ni amɛyeɔ nii lɛ, Yesu kɔ aboloo, ni ejɔɔ nɔ, ni ekumɔ mli, ni ekɛhã amɛ ni ekɛɛ, “Nyɛhea! Enɛ ji migbɔmɔtso lɛ.”

²³ Ni ewo kpulu lɛ ni eda shi, ni ekɛhã amɛ ni amɛ fɛɛ amɛnu eko.

²⁴ Ni ekɛɛ amɛ akɛ, “Enɛ ji milá ni ji kpãŋmɔ lɛ nɔ ni afɔse ashwie shi yɛ mɛi pii ahewɔ lɛ.

²⁵ Miikɛɛ nyɛ yɛ anɔkwale mli akɛ minuŋ waintso yibii nɛɛ eko dɔŋŋ kɛyashi gbi nɔ ni manu lɛ ehee yɛ Nyɔŋmɔ Maŋtsɛyeli lɛ mli.”

²⁶ Ni be ni amɛla yijiemɔ lala ko lɛ, amɛje kpo amɛtee Mugɔŋ lɛ nɔ.

Yesu gba bɔ ni Petro baakwa lɛ eto

²⁷ Yesu kɛɛ ekaselɔi lɛ akɛ, “Nyɛ fɛɛ nyɛnane aaatɔ̃tɔ̃; ejaakɛ aŋma akɛ, ‘Matswa tookwɛlɔ lɛ nɔ, ni toi lɛ aaagbɛ ashwã.’

²⁸ Shi mishitee lɛ sɛɛ lɛ matsɔ̃ nyɛhiɛ kɛaatee Galilea.”

²⁹ Shi Petro kɛɛ lɛ akɛ, “Kɛji mɛi lɛ fɛɛ nane aaatɔ̃tɔ̃ tete lɛ, mi lɛ minane etɔ̃tɔ̃ŋ.”

³⁰ Ni Yesu kɛɛ lɛ akɛ, “Miikɛɛ bo yɛ anɔkwale mli akɛ; ŋmɛnɛ nyɔɔŋ nɛɛ mli lɛ, wuɔ naŋ agbɛɛ shii enyɔ ni oookpa yɛ misɛɛ shii etɛ̃.”

³¹ Shi Petro wie kɛ ekãa fe tsutsu lɛ akɛ, “Kɛji gbo mikɛ bo aaagbo tete lɛ, mikpãŋ yɛ osɛɛ!” Ni amɛ fɛɛ amɛkɛɛ nakai nɔŋŋ.

Yesu yɛ Getsemane

³² Ni amɛtee he ko ni atsɛɔ jɛi akɛ Getsemane lɛ, ni ekɛɛ ekaselɔi lɛ akɛ, “Nyɛtaraa biɛ koni mayasɔle dã.”

³³ Ni eŋɔ Petro kɛ Yakobo kɛ Yohane efata ehe, ni ehe bɔ̃i kpokpomɔ kɛ haomɔ;

³⁴ ni ekɛɛ amɛ akɛ, “Misusuma werɛ eho ehe kɛyaashi gbele mli po; nyɛhia biɛ ni nyɛshia kpe!”

³⁵ Ni etee ehiɛ fioo, ni eho ebu shi, ni esɔle koni kɛ aaaho lɛ; ŋmɛlɛtswaa lɛ aho ehe;

³⁶ ni ekɛɛ, “Abba, Ataa! Onyɛɔ nii fɛɛ ofeɔ; jiemɔ kpulu nɛɛ yɛ minɔ; shi kɛ̃lɛ, jeee bɔ ni mi misumɔɔ, shi moŋ bɔ ni bo osumɔɔ!”

³⁷ Ni eba ebana amɛ akɛ amɛmiiwɔ, ni ekɛɛ Petro akɛ, “Simon, wɔ owɔɔ? Onyɛ̃ɛɛ kpe oshi ŋmɛlɛtswaa kome?

³⁸ Nyɛshia kpe ni nyɛsɔlea koni nyɛkabote kaa mli. Mumɔ lɛ miikpɛlɛ moŋ, shi heloo lɛ he waaa.”

³⁹ Ni eyiŋ etee ekoŋŋ ni eyasɔle, ni ewie nakai wiemɔ lɛ nɔŋŋ.

⁴⁰ Ni be ni eku esɛɛ eba ekoŋŋ lɛ, ebana akɛ amɛwɔ ejaakɛ amɛhiŋmɛii etsii, ni amɛleee nɔ hetoo ni amɛhãa lɛ.

⁴¹ Ni eba nɔ ni ji shii etɛ̃, ni ekɛɛ amɛ akɛ, “Nyɛ lɛ nyɛhe ejɔ nyɛ ni nyɛwɔɔ lolo nɛɛ? Efa! Ŋmɛlɛtswaa lɛ eshɛ, naa, aaŋɔ Gbɔmɔ Bi lɛ aawo eshafeelɔi adɛŋ.

⁴² Nyɛtea shi nyɛhãa wɔyaa; naa, mɔ ni baatsɔ̃ɔ misɛɛgbɛ lɛ eshɛ shi etã.”

Yesu sɛɛgbɛtsɔ̃ɔmɔ kɛ emɔmɔ

⁴³ Ni amrɔ lɛ nɔŋŋ, be ni ewieɔ lolo lɛ; Yuda, mɛi nyɔŋma kɛ enyɔ lɛ ateŋ mɔ kome lɛ, ba kɛ mɛi babaoo ni jɛ osɔfonukpai lɛ kɛ mlatsɔɔlɔi lɛ kɛ onukpai lɛ aŋɔɔ ni hiɛ klantei kɛ tsei.

⁴⁴ Shi sɛɛgbɛtsɔ̃ɔlɔ lɛ ehã amɛ okadi ko akɛ, “Mɔ naa ni mashwɔ lɛ, lɛ ni; nyɛmɔa lɛ ni nyɛkpalaa lɛ kɛyaa shweshweeshwe.”

⁴⁵ Ni be ni Yuda shɛ shi nɔŋŋ pɛ ni eba eŋɔɔ ni ekɛɛ, “Rabi!” Ni eshwɔ enaa.

⁴⁶ Ni amɛbashwie enɔ ni amɛmɔ lɛ.

⁴⁷ Shi mɛi ni damɔ jɛi lɛ ateŋ mɔ kome gbala eklante, ni ekɛbã osɔfonukpa lɛ tsulɔ lɛ, ni efo etoi.

⁴⁸ Ni Yesu fã enaa ni ekɛɛ amɛ akɛ, “Mimɔmɔ nyɛbaa kɛ klantei kɛ tsei tamɔ amɔɔ ojotswalɔ nɛɛ?

⁴⁹ Daa ni mikɛ nyɛ yɔɔ Sɔlemɔ we lɛ ni mitsɔ̃ɔ nii lɛ, nyɛmɔɔɔ mi; shi bɔ ni afee ni ŋmalɛi lɛ ana aba mli hewɔŋ.”

⁵⁰ Kɛkɛ ni ekaselɔi lɛ fɛɛ jo foi amɛshi lɛ.

⁵¹ Shi oblanyo ko ni kɛ klala ekete eyayaiaŋ nyiɛ esɛɛ, ni amɛmɔ lɛ;

⁵² shi eshi klala lɛ ni ejo foi kɛ ehe yayai.

Yesu yɛ Gwabɔɔ wulu lɛ hiɛ

⁵³ Ni amɛkpala Yesu kɛtee osɔfonukpa lɛ ŋɔɔ, ni osɔfonukpai lɛ kɛ maŋ onukpai lɛ kɛ mlatsɔɔlɔi lɛ fɛɛ naa bakpe shi yɛ eŋɔɔ.

⁵⁴ Ni Petro nyiɛ esɛɛ flɛŋŋ kɛyabote osɔfonukpa lɛ mɔɔ kpo te lɛ mli, ni ekɛ tsuji lɛ yatara shi, ni ewere la.

⁵⁵ Ni osɔfonukpai lɛ kɛ akwaashɔŋ muu lɛ fɛɛ tao Yesu he odase ko ni amɛwo lɛ gbee, shi amɛnaaa eko,

⁵⁶ ejaakɛ mɛi pii ye amale odase amɛshi lɛ moŋ nɛ; shi amɛdasei lɛ yeee hegbɔ.

⁵⁷ Ni mɛi komɛi te shi ni amɛye amale odase amɛshi lɛ amɛkɛɛ,

⁵⁸ “Wɔ diɛŋtsɛ wɔnu ni ekɛɛ akɛ, ‘Mi lɛ makumɔ Sɔlemɔtsu nɛɛ ni akɛ niji fee lɛ, ni gbii etɛ̃ mli lɛ mamã ekroko ni jeee niji akɛfee.’ ”

⁵⁹ Shi no tete hu, amɛdasei lɛ yeee hegbɔ.

⁶⁰ Ni osɔfonukpa lɛ te shi damɔ shi yɛ amɛ fɛɛ amɛhiɛ, ni ebi Yesu akɛ, “Otooo he eko? Mɛɛ odase mɛnɛɛmɛi yeɔ shiɔ bo nɛɛ?”

⁶¹ Shi etswaaa esɛŋ ni etooo he eko. Osɔfonukpa lɛ saa bi lɛ ekoŋŋ akɛ, “Ani bo ji Kristo, mɔ ni ajɔɔ lɛ Bi lɛ lo?”

⁶² Ni Yesu kɛɛ, “Miŋ; ni nyɛaana Gbɔmɔ Bi lɛ akɛ eta Ofe lɛ ninejurɔ nɔ ni eeba yɛ ŋwɛi atatui lɛ amli.”

⁶³ Shi osɔfonukpa lɛ gbala etadei ni ekɛɛ, “Mɛɛ odasefoi wɔsaa wɔtaoɔ dɔŋŋ?

⁶⁴ Nyɛnu emusubɔɔ lɛ; te nyɛjwɛŋɔ tɛŋŋ?” Ni amɛ fɛɛ amɛbu lɛ fɔ akɛ esa gbele.

⁶⁵ Ni mɛi komɛi bɔ̃i lajɔ̃fɛɛ kɛ ehe shwiemɔ, ni amɛfi ehiɛ, ni amɛyi lɛ, ni amɛkɛɛ lɛ akɛ, “Gbaa!” Ni tsuji lɛ shwie enɔ kɛ ma.

Petro kwa Yesu

⁶⁶ Be ni Petro yɔɔ shishi lɛ yɛ mɔɔ kpo te lɛ mli lɛ, osɔfonukpa lɛ weyei lɛ ateŋ mɔ kome ba,

⁶⁷ ni be ni ena Petro ni eewere la lɛ, ekwɛ lɛ, ni ekɛɛ, “Te bo hu okɛ Yesu Nazarenyo lɛ yɔɔ?”

⁶⁸ Shi etso ekɛɛ, “Mileee nɔ ni okɛɔ nɛɛ, ni minaaa shishi tete.” Ni eje kpo etee koi lɛ shi, kɛkɛ ni wuɔ gbɛɛ.

⁶⁹ Ni oblayoo lɛ na lɛ ekoŋŋ, ni esaa ebɔ̃i mɛi ni damɔ jɛi lɛ kɛɛmɔ akɛ, “Amɛteŋ mɔ kome nɛ!”

⁷⁰ Shi Petro tso ekoŋŋ. Ni fee sɛɛ fioo lɛ mɛi ni damɔ jɛi lɛ kɛɛ Petro ekoŋŋ akɛ, “Anɔkwale mli lɛ, amɛteŋ mɔ kome ji bo, ejaakɛ Galileanyo ji bo.”

⁷¹ Kɛkɛ ni ebɔ̃i loomɔ kɛ kitãkãmɔ akɛ, “Mileee gbɔmɔ ni nyɛwieɔ ehe nɛɛ!”

⁷² Ni amrɔ lɛ wuɔ gbɛɛ nɔ ni ji shii enyɔ; ni Petro kai wiemɔ ni Yesu kɛɛ lɛ akɛ, “Wuɔ naŋ agbɛɛ shii enyɔ ni oookpa yɛ misɛɛ shii etɛ̃” lɛ. Ni be ni ekai lɛ, efo aahu.