Marko 13 - ŊMALƐ KRƆŊKRƆŊ LƐ

Sɔlemɔ we lɛ fitemɔ he gbalɛ

¹ Be ni Yesu jeɔ kpo yɛ Sɔlemɔ we lɛ, ekaselɔi lɛ ateŋ mɔ kome kɛɛ lɛ akɛ, “Tsɔɔlɔ, kwɛ tɛi kɛ tsui kpelekplei!”

² Ni Yesu here nɔ ni ekɛɛ lɛ akɛ, “Oona nɛkɛ tsui kpeteŋkplei nɛɛ? Ashiŋ tɛ kome yɛ ekroko nɔ ni atsiŋ atswaŋ shi.”

Amanehului ashishijee

³ Ni be ni eta shi yɛ Mugɔŋ lɛ nɔ yɛ Sɔlemɔ we lɛ ŋlɛnɔ lɛ, Petro kɛ Yakobo kɛ Yohane kɛ Andrea bi lɛ yɛ afã nigii akɛ,

⁴ “Tsɔ̃ɔmɔ wɔ be mli ni aaafee nii nɛɛ, ni kɛ nii nɛɛ fɛɛ kwa aaaba mli lɛ, mɛni ji ehe okadi?”

⁵ Ni Yesu here nɔ ni ebɔ̃i amɛ kɛɛmɔ akɛ, “Nyɛkwɛa jogbaŋŋ koni mɔ ko akalaka nyɛ.

⁶ Ejaakɛ mɛi pii aaaba yɛ migbɛi mli, ni amɛaakɛɛ akɛ, ‘Mi ji lɛ!’ Ni amɛaalaka mɛi pii.

⁷ Shi kɛ nyɛnu tai kɛ tai asaji ahe lɛ, nyɛkahaoa, ejaakɛ ja nɛkɛ nibii nɛɛ ba mli, shi asaŋ naagbee lɛ shɛko.

⁸ Maŋ aaate shi awo maŋ, ni maŋtsɛyeli aaate shi awo maŋtsɛyeli, ni shikpɔŋhosomɔi aaaba yɛ hei srɔtoi, ni hɔmɔ aaaba. Enɛɛmɛi ji kɔ̃ɔmɔi abɔ̃imɔ.

⁹ “Shi nyɛ lɛ nyɛlea nyɛhenɔkwɛmɔ, ejaakɛ amɛaaŋɔ nyɛ kɛaatee gwabɔi amli, ni aaayi nyɛ yɛ kpeehei lɛ, ni akɛ nyɛ aaadamɔ lumɛi kɛ maŋtsɛmɛi ahiɛ yɛ mihewɔ koni nyɛye odase nyɛtsɔ̃ɔ amɛ.

¹⁰ Ni ja ashiɛ Sanekpakpa lɛ atsɔ̃ɔ jeŋmaji fɛɛ dã.

¹¹ Shi kɛ amɛkpala nyɛ kɛtee amɛyahã lɛ, nyɛkahaoa nyɛhe nyɛto yɛ nɔ ni nyɛaawie hewɔ; shi moŋ nɔ ni akɛaahã nyɛ yɛ nakai ŋmɛlɛtswaa lɛ nɔ lɛ, no nyɛwiea; ejaakɛ jeee nyɛ nyɛwieɔ lɛ, shi moŋ Mumɔ Krɔŋkrɔŋ lɛ ni.

¹² Shi nyɛmi aaaŋɔ nyɛmi ahã gbele, ni tsɛ hu kɛ bi aaahã; ni bii aaate shi awo amɛfɔlɔi, ni amɛkɛ amɛ aaahã ni agbe amɛ.

¹³ Ni mɛi fɛɛ aaanyɛ nyɛ yɛ migbɛi lɛ hewɔ; shi mɔ ni hiɛɔ mli kɛwulaa shi lɛ, aaahere eyiwala.”

Amanehulu kpeteŋkple lɛ

¹⁴ “Shi kɛ nyɛna amaŋfɔ̃ nihiinii lɛ akɛ ema he ni esaaa akɛ emaa lɛ, (mɔ ni kaneɔ lɛ, ayoo sɛɛ), no lɛ mɛi ni yɔɔ Yudea lɛ ajo foi aya gɔji lɛ anɔ;

¹⁵ ni mɔ ni yɔɔ tsu yiteŋ lɛ akakpleke shi aloo ebote shĩa eyakɔ nɔ ko;

¹⁶ ni mɔ ni yɔɔ ŋmɔshi lɛ ekaku esɛɛ eyakɔ etade.

¹⁷ Shi kpoo hã yei ni hiɛ musu kɛ mɛi ni hãa fufɔ yɛ nakai bei lɛ amli lɛ!

¹⁸ Shi nyɛsɔlea koni enɛ akaba yɛ fɛ̃ibe mli!

¹⁹ Ejaakɛ nakai bei lɛ amli lɛ amanehulu aaaba ni anãko enɔ dã kɛjɛ jeŋ ni Nyɔŋmɔ bɔ lɛ shishijee mli aahu kɛbashi ŋmɛnɛ, ni asaŋ anaŋ enɔ dɔŋŋ.

²⁰ Ni ja Nuŋtsɔ lɛ fo gbii lɛ anɔ, kɛjeee nakai lɛ ahereŋ heloo ko heloo ko yiwala; shi mɛi ni ehala lɛ ahewɔ lɛ eeefo gbii lɛ anɔ.

²¹ “Ni no mli lɛ, kɛji mɔ ko kɛɛ nyɛ akɛ, ‘Naa, Kristo lɛ yɛ biɛ!’ Aloo, ‘Naa, eyɛ biɛ!’ lɛ, nyɛkahea nyɛyea,

²² ejaakɛ amale kristoi kɛ amale gbalɔi aaate shi ni amɛaafee okadii kɛ naakpɛɛnii koni kɛ aaaho lɛ, amɛlaka mɛi ni ahala lɛ tete.

²³ Shi nyɛ lɛ nyɛkwɛa jogbaŋŋ; mikɛɛ nyɛ nɔ fɛɛ nɔ mito.”

Gbɔmɔ Bi lɛ baa

²⁴ “Shi no bei lɛ amli yɛ amanehulu nɛɛ sɛɛ lɛ, hulu hiɛ aaawo duŋ, ni nyɔɔŋtsere hu kpɛŋ;

²⁵ ni ŋulamii aaatserɛ kɛjɛ ŋwɛi atswia shi, ni aaahoso hewalɛi ni yɔɔ ŋwɛi lɛ.

²⁶ Kɛkɛ lɛ, aaana Gbɔmɔ Bi lɛ akɛ eeba yɛ atatuiaŋ kɛ hewalɛ kpele kɛ anunyam babaoo.

²⁷ No ni eeetsu ebɔfoi lɛ, ni amɛaabua mɛi ni ehala lɛ anaa kɛaajɛ kɔɔyɔi ejwɛ lɛ anɔ, kɛjɛ shikpɔŋ naagbeehe kɛyashi ŋwɛi naagbeehe.”

Agbãmitso he nikasemɔ

²⁸ “Nyɛkasea agbãmitso he abɛ ni ebuɔ lɛ. Kɛ shɛ be ni eniji efrɔke ni eefu baa lɛ, nyɛle akɛ latsaabe lɛ eshɛ etã.

²⁹ Nakai nɔŋŋ nyɛ hu, kɛ nyɛna akɛ nɛkɛ nii nɛɛ miiba mli lɛ, nyɛnaa nyɛlea akɛ eshɛ agboi anaa etã.

³⁰ Miikɛɛ nyɛ yɛ anɔkwale mli akɛ yinɔ nɛɛ hoŋ, ja nii nɛɛ fɛɛ eba mli dã.

³¹ Ŋwɛi kɛ shikpɔŋ baaho aya, shi miwiemɔi lɛ hoŋ eyaŋ.”

Mɔ ko leee gbi lɛ kɛ ŋmɛlɛtswaa lɛ

³² “Shi no gbi lɛ loo ŋmɛlɛtswaa lɛ mɔ ko leee; ŋwɛi bɔfoi lɛ leee, ni Bi lɛ hu leee, akɛ ja Tsɛ lɛ kɛkɛ.

³³ Nyɛkwɛa jogbaŋŋ, nyɛshia kpe ni nyɛsɔlea; ejaakɛ nyɛleee beyinɔ ni be lɛ shɛɔ.

³⁴ Etamɔ nuu ko ni edom eshi ewe, ni ehã etsuji lɛ hegbɛ kɛ amɛteŋ mɔ fɛɛ mɔ enitsumɔ, ni efã agbonaakwɛlɔ lɛ akɛ ebu.

³⁵ No hewɔ lɛ, nyɛsaraa; ejaakɛ nyɛleee beyinɔ ni shĩatsɛ lɛ baa, ekolɛ gbɛkɛ, loo nyɔɔŋteŋ, loo wuɔgbɛɛmɔ, loo leebi;

³⁶ koni ekaba trukaa ebana nyɛ akɛ nyɛmiiwɔ.

³⁷ Nɔ ni mikɛɔ nyɛ nɛɛ, mɛi fɛɛ mikɛɔ, Nyɛsaraa!”