Marko 10 - ŊMALƐ KRƆŊKRƆŊ LƐ

Gbãlãmligbalamɔ he nitsɔɔmɔ

¹ Ni Yesu je jɛi ni eyiŋ etee Yudea niiaŋ kɛ Yordan sɛɛgbɛ. Ni mɛi pii babua amɛhe naa ekoŋŋ yɛ ehe, ni etsɔ̃ɔ amɛ nii ekoŋŋ tamɔ bɔ ni efɔɔ feemɔ lɛ.

² Ni Farisifoi lɛ ba eŋɔɔ amɛbabi lɛ akɛ, “Ani nuu yɛ hegbɛ akɛ eshwieɔ eŋa?” Amɛbi enɛ kɛmiika lɛ.

³ Shi ehere nɔ ni ebi amɛ akɛ, “Mɛɛ kitã Mose wo nyɛ?”

⁴ Amɛkɛɛ, “Mose hã hegbɛ akɛ aŋma shwiemɔ wolo ni ashwie lɛ.”

⁵ Yesu kɛɛ amɛ akɛ, “Nyɛtsuiwalɛ hewɔ eŋma kitã nɛɛ ehã nyɛ;

⁶ shi kɛjɛ jeŋbɔɔ shishijee lɛ mli lɛ, nuu kɛ yoo Nyɔŋmɔ bɔ amɛ.

⁷ Enɛ hewɔ lɛ, nuu aaashi etsɛ kɛ enyɛ, ni eeekpɛtɛ eŋa he;

⁸ ni amɛyi enyɔ lɛ fɛɛ amɛaatsɔ̃ heloo kome; belɛ agbɛnɛ amɛjeee mɛi enyɔ dɔŋŋ, shi heloo kome.

⁹ No hewɔ lɛ, nɔ ni Nyɔŋmɔ kɛtsa lɛ, gbɔmɔ akagbala mli.”

¹⁰ Ni be ni amɛshɛ shĩa lɛ, ekaselɔi lɛ bi lɛ nakai sane lɛ nɔŋŋ ekoŋŋ.

¹¹ Ni ekɛɛ amɛ akɛ, “Mɔ fɛɛ mɔ ni shwieɔ eŋa ni eyaŋɔɔ mɔ kroko lɛ, efite gbãlã.

¹² Ni kɛji yoo shwie ewu ni eyagbã mɔ kroko lɛ efite gbãlã.”

Yesu jɔɔ gbekɛbii

¹³ Ni mɛi komɛi kɛ gbekɛbii bibii ba Yesu ŋɔɔ ko ni etara amɛhe; shi ekaselɔi lɛ fãmɔ mɛi lɛ.

¹⁴ Shi be ni Yesu na lɛ, emli fu, ni ekɛɛ ekaselɔi lɛ akɛ, “Nyɛhãa gbekɛbii lɛ abaa miŋɔɔ, ni nyɛkatsia amɛ gbɛ, ejaakɛ mɛi ni tamɔ mɛnɛɛmɛi anɔ ji Nyɔŋmɔ Maŋtsɛyeli lɛ.

¹⁵ Miikɛɛ nyɛ anɔkwale mli akɛ mɔ fɛɛ mɔ ni heee Nyɔŋmɔ Maŋtsɛyeli lɛ tamɔ gbekɛ bibioo lɛ, eboteŋ mli kwraa.”

¹⁶ Ni eloo amɛ atuu, ni ekɛ eniji shwie amɛnɔ, ni ejɔɔ amɛ.

Nuu niiatsɛ lɛ

¹⁷ Ni be ni eje kpo ni eyi gbɛ lɛ nɔ lɛ, mɔ ko hiɛ foi kɛbanina lɛ ni ebakula ehiɛ, ni ebi lɛ akɛ, “Tsɔɔlɔ kpakpa, mɛni mafee ni mana naanɔ wala?”

¹⁸ Ni Yesu kɛɛ lɛ akɛ, “Mɛɛba otsɛɔ mi mɔ kpakpa? Mɔ kpakpa ko bɛ akɛ ja Nyɔŋmɔ kome kɛkɛ.

¹⁹ Te ole kitãi lɛ, ‘Kaagbe gbɔmɔ, kaafite gbãlã, kaaju, kaaye amale odase, kaashishiu mɔ, wo otsɛ kɛ onyɛ!’ ”

²⁰ Shi nuu lɛ here nɔ ekɛɛ lɛ akɛ, “Tsɔɔlɔ, miye enɛɛmɛi fɛɛ nɔ kɛjɛ miblahiaŋ.”

²¹ Ni Yesu kwɛ lɛ ni etsui mɔ lɛ, ni ekɛɛ lɛ akɛ, “Eshwɛ bo nɔ kome: Yaa ni oyahɔ̃ɔ nii fɛɛ ni oyɔɔ ni okɛhã ohiafoi, ni ooona jwetri yɛ ŋwɛi; ni oba ni obanyiɛ misɛɛ.”

²² Shi nuu lɛ hiɛ tsake yɛ wiemɔ nɛɛ hewɔ, ni eyiŋ etee kɛ dɔlɛ, ejaakɛ eyɛ nii babaoo.

²³ Ni Yesu kwɛ ehewɔ kɛkpe, ni ekɛɛ ekaselɔi lɛ akɛ, “Nyɛna bɔ ni ewa hã niiatsɛmɛi akɛ amɛaabote Nyɔŋmɔ Maŋtsɛyeli lɛ mli!”

²⁴ Kaselɔi lɛ ahe jɔ̃ amɛhe yɛ ewiemɔi lɛ ahe. Shi Yesu here nɔ ekoŋŋ ni ekɛɛ amɛ akɛ, “Bii, te nyɛna bɔ ni ewa hã mɛi ni ŋɔɔ amɛhiɛ amɛfɔ̃ɔ nii anɔ lɛ akɛ amɛaabote Nyɔŋmɔ Maŋtsɛyeli lɛ mli!

²⁵ Ejaraaa hãaa yooma akɛ eeetsɔ̃ abui hiŋmɛi mli tamɔ bɔ ni ejaraa hãa niiatsɛ akɛ eeebote Nyɔŋmɔ Maŋtsɛyeli lɛ mli lɛ.”

²⁶ Ni amɛnaa kpɛ amɛhe naakpa, ni amɛbibii amɛhe akɛ, “Belɛ namɔ yiwala aaanyɛ ahere mɔ?”

²⁷ Yesu kwɛ amɛ ni ekɛɛ, “Gbɔmɛi agbɛfaŋ lɛ anyɛŋ afee, shi jeee yɛ Nyɔŋmɔ gbɛfaŋ; ejaakɛ Nyɔŋmɔ gbɛfaŋ lɛ anyɛɔ nii fiaa afeɔ.”

Yesu sɛɛnyiɛmɔ mli nyɔmɔwoo

²⁸ Petro bɔ̃i lɛ kɛɛmɔ akɛ, “Naa, wɔ lɛ wɔshi nii fiaa ni wɔbanyiɛ osɛɛ.”

²⁹ Yesu kɛɛ, “Miikɛɛ nyɛ anɔkwale mli akɛ mɔ ko bɛ ni eshi shĩa loo nyɛmimɛi hii loo nyɛmimɛi yei loo tsɛ loo nyɛ loo ŋa loo bii loo shikpɔji yɛ mi kɛ Sanekpakpa lɛ hewɔ,

³⁰ ni enaŋ shĩai kɛ nyɛmimɛi hii kɛ nyɛmimɛi yei kɛ nyɛmɛi kɛ bii kɛ shikpɔji toi oha yɛ benɛbe nɛɛ mli beebe, kɛ yiwalɛ hu; ni jeŋ ni baaba lɛ mli lɛ eeena naanɔ wala.

³¹ Shi klɛŋklɛŋbii pii aaatsɔ̃mɔ sɛɛkpelɔi, ni sɛɛkpelɔi aaatsɔ̃mɔ klɛŋklɛŋbii.”

Yesu wie egbele he nɔ ni ji shii etɛ̃

³² Ni amɛnyiɛ gbɛ kɛmiiya Yerusalɛm, ni Yesu nyiɛ amɛhiɛ; kaselɔi lɛ ahe ejɔ̃ amɛhe, ni mɛi ni nyiɛ sɛɛ lɛ miishe gbeyei. Ni eŋɔ mɛi nyɔŋma kɛ enyɔ lɛ ekoŋŋ kɛtee afã ni ebɔ̃i amɛ nɔ ni baaba enɔ lɛ kɛɛmɔ akɛ,

³³ “Naa, wɔmiiya Yerusalɛm, ni aaaŋɔ Gbɔmɔ Bi lɛ awo osɔfonukpai lɛ kɛ mlatsɔɔlɔi lɛ adɛŋ, ni amɛaabu lɛ gbele fɔ, ni amɛaaŋɔ lɛ amɛhã jeŋmajiaŋbii lɛ.

³⁴ Ni amɛaaye ehe fɛo, ni amɛaafɛ̃ lajɔ̃ amɛaashwie ehe, ni amɛkɛ kpelebii aaayi lɛ, ni amɛaagbe lɛ; ni gbii etɛ̃ sɛɛ lɛ, eeete shi ekoŋŋ.”

Yakobo kɛ Yohane nibimɔ lɛ

³⁵ Ni Yakobo kɛ Yohane, Zebedeo bii lɛ, ba Yesu ŋɔɔ amɛbakɛɛ, “Tsɔɔlɔ, wɔmiisumɔ akɛ nɔ fɛɛ nɔ ni wɔbaaba bo lɛ ofee ohã wɔ.”

³⁶ Ni ebi amɛ akɛ, “Mɛni nyɛsumɔɔ akɛ mifee mihã nyɛ?”

³⁷ Amɛkɛɛ lɛ akɛ, “Hã wɔ hegbɛ koni wɔteŋ mɔ kome ata oninejurɔ nɔ ni mɔ kome hu ata obɛku nɔ yɛ onumnyam lɛ mli.”

³⁸ Shi Yesu kɛɛ amɛ akɛ, “Nyɛleee nɔ ni nyɛbiɔ lɛ; ani nyɛaanyɛ kpulu ni mibanu lɛ nyɛnu, aloo nyɛaanyɛ ni akɛ mibaptisimɔ lɛ abaptisi nyɛ?”

³⁹ Ni amɛkɛɛ lɛ akɛ, “Wɔɔnyɛ.” Shi Yesu kɛɛ amɛ akɛ, “Kpulu ni mibanu lɛ nyɛaanu, ni baptisimɔ ni akɛaabaptisi mi lɛ akɛaabaptisi nyɛ nɛ;

⁴⁰ shi mininejurɔ kɛ mibɛku nɔ tamɔ lɛ jeee minɔŋ ni mikɛhãa, shi moŋ mɛi ni asaa ato lɛ anɔŋ.”

⁴¹ Ni be ni mɛi nyɔŋma lɛ nu lɛ amɛmli wo Yakobo kɛ Yohane la.

⁴² No hewɔ lɛ, Yesu tsɛ amɛ kɛba eŋɔɔ, ni ekɛɛ amɛ akɛ, “Nyɛle akɛ mɛi ni abuɔ amɛ jeŋmaji lɛ anɔyelɔi lɛ yeɔ amɛnɔ akɛ nuŋtsɔmɛi, ni amɛteŋ gbɔmɛi agboi lɛ yɛ amɛnɔ hewalɛ.

⁴³ Shi nyɛ lɛ ebɛ nyɛ nakai; shi moŋ mɔ fɛɛ mɔ ni taoɔ agbo atsɔ̃ yɛ nyɛteŋ lɛ, efee ehe nyɛsɔ̃ɔlɔ;

⁴⁴ ni mɔ ni taoɔ nyɛteŋ onukpa atsɔ̃ lɛ, efee ehe mɛi fɛɛ atsulɔ.

⁴⁵ Ejaakɛ Gbɔmɔ Bi lɛ hu baaa ni asɔ̃mɔ lɛ, shi sɔ̃ɔmɔ moŋ eba, koni eŋɔ esusuma ehã akɛ kpɔmɔnɔ yɛ mɛi pii ahewɔ.”

Yesu tsa Bartimeo shwilafo lɛ

⁴⁶ Ni amɛshɛ Yeriko. Ni be ni ekɛ ekaselɔi lɛ kɛ asafo yuu jɛ jɛi amɛyaa lɛ, Timeo bi Bartimeo, shwilafo nibalɔ lɛ, ta gbɛjegbɛ lɛ toi eebala nii.

⁴⁷ Ni be ni enu akɛ Yesu Nazarenyo lɛ ni lɛ, ebɔi blɔmɔ akɛ, “Yesu, David Bi, naa mi mɔbɔ!”

⁴⁸ Ni mɛi pii fãmɔ lɛ akɛ emua enaa. Shi ebolɔ babaoo moŋ fe tsutsu lɛ akɛ, “David Bi, naa mi mɔbɔ!”

⁴⁹ Yesu wa damɔ shi ni ekɛɛ, “Nyɛtsɛa lɛ kɛbaa!” Ni amɛtsɛ lɛ, ni amɛkɛɛ lɛ akɛ, “Na tsui, tee shi, eetsɛ bo!”

⁵⁰ Ni eshɛ etade nɔhaa lɛ efɔ̃, ni ete shi pa, ni eba Yesu ŋɔɔ.

⁵¹ Yesu bi lɛ akɛ, “Mɛni otaoɔ akɛ mifee mihã bo?” Ni shwilafo lɛ kɛɛ lɛ akɛ, “Rabuni, (eshishi ji Minuŋtsɔ), akɛ mana nii.”

⁵² Ni Yesu kɛɛ lɛ akɛ, “Yaa, ohemɔkɛyeli etsa bo.” Ni amrɔ lɛ nɔŋŋ lɛ ena nii, ni enyiɛ Yesu sɛɛ yɛ gbɛ lɛ nɔ.