Luka 9 - ŊMALƐ KRƆŊKRƆŊ LƐ

Yesu tsu kaselɔi nyɔŋma kɛ enyɔ lɛ

¹ Agbɛnɛ Yesu tsɛ ekaselɔi nyɔŋma kɛ enyɔ lɛ kɛkpe, ni ehã amɛ hewalɛ kɛ hegbɛ yɛ mumɔi fɔ̃ji fɛɛ anɔ ni amɛtsa helai hu.

² Ni etsu amɛNyɔŋmɔ Maŋtsɛyeli lɛ shiɛmɔ kɛ helatsɛmɛi atsamɔ.

³ Ni ekɛɛ amɛ akɛ, “Nyɛkaŋɔa nɔ ko nyɛhiɛa nyɛdɛ̃ŋ yɛ nyɛgbɛfãa lɛ mli, nyɛkahiɛa tso loo kotoku loo aboloo loo shika loo atadei enyɔ.

⁴ Ni shĩa fɛɛ shĩa ni nyɛaabote mli lɛ, nyɛhia jɛi kɛyashi nyɛaaje jɛi.

⁵ He fɛɛ he ni mɛi lɛ hereee nyɛ yɛ lɛ, kɛ nyɛmiije nakai maŋ lɛ mli lɛ, nyɛkpokpoa nyɛnajiashi mlu lɛ nyɛkɛyea odase nyɛshia amɛ.”

⁶ Ni amɛyiŋ amɛtee ni amɛyakpa maji lɛ anɔ amɛjaje Sanekpakpa lɛ, ni amɛtsa mɛi yɛ he fɛɛ he.

Herode yeyeeyefeemɔ

⁷ Lumɔ Herode nu nii ni afee lɛ fɛɛ he, ni efee yeyeeye, ejaakɛ mɛi komɛi kɛɛ akɛ Yohane ete shi kɛjɛ gbohii ateŋ;

⁸ mɛi komɛi hu kɛɛ akɛ Elia ejie ehe kpo; mɛi krokomɛi hu kɛɛ akɛ blema gbalɔi lɛ eko ete shi ekoŋŋ.

⁹ Ni Herode kɛɛ, “Yohane lɛ mifo eyi; shi namɔ ji mɔ ni minunuɔ nɛkɛ saji yɛ ehe nɛɛ?” Ni eetao Yesu ena.

Yesu hã mɛi akpei enumɔ niyenii

¹⁰ Be ni bɔfoi lɛ ku amɛsɛɛ amɛba lɛ, amɛbagba Yesu nibii fɛɛ ni amɛfee lɛ. Ni ekɛ amɛ tee ŋa lɛ nɔ he ko banee yɛ maŋ ko ni atsɛɔ lɛ Betsaida lɛ masɛi.

¹¹ Be ni asafoi lɛ na lɛ lɛ, amɛtiu lɛ, ni ehere amɛ atuu ni ejaje Nyɔŋmɔ Maŋtsɛyeli lɛ he sane etsɔ̃ɔ amɛ, ni etsa mɛi ni tsamɔ he ehia amɛ lɛ.

¹² Be ni je bɔ̃i namɔ lɛ mɛi nyɔŋma kɛ enyɔ lɛ ba eŋɔɔ amɛbakɛɛ lɛ akɛ, “Wo asafo lɛ gbɛ koni amɛya akrowai kɛ ŋmɔji ni kamɔ wɔhewɔ lɛ amli, ni amɛyato jɛmɛi ni amɛna niyenii; ejaakɛ ŋa nɔ wɔyɔɔ nɛɛ.”

¹³ Shi ekɛɛ amɛ akɛ, “Nyɛ diɛŋtsɛ nyɛhãa amɛ nɔ ko amɛyea.” Ni amɛkɛɛ, “Wɔbɛ nɔ ko fe aboloi enumɔ kɛ loi enyɔ pɛ, ni belɛ ja wɔtee wɔyahe niyenii wɔbahã asafo nɛɛ fɛɛ.

¹⁴ Ejaakɛ amɛyi aaafee hii akpei enumɔ.” Ni ekɛɛ ekaselɔi lɛ akɛ, “Nyɛhãa amɛtaraa shi kuikui aaafee nyɔŋmai enumɔ enumɔ.”

¹⁵ Amɛfee nakai, ni amɛhã mɛi lɛ fɛɛ tara shi.

¹⁶ Ni ekɔlɔ aboloi enumɔ kɛ loi enyɔ lɛ ni ekwɛ ŋwɛi ejɔɔ nɔ, ni ekumɔ mli, ni ekɛhã ekaselɔi lɛ ni amɛkɛmamɔ asafo lɛ hiɛ.

¹⁷ Amɛye, ni amɛ fɛɛ amɛtɔrɔ, ni akɔlɔ fufuji ni shwɛ lɛ awo kafui nyɔŋma kɛ enyɔ obɔ̃bɔ̃.

Petro ye Yesu he odase

¹⁸ Gbi ko be ni Yesu kome sɔleɔ lɛ ekaselɔi lɛ babua amɛhe naa yɛ eŋɔɔ; ni ebi amɛ akɛ, “Namɔ mɛi lɛ kɛɔ akɛ mi ji?”

¹⁹ Ni amɛto he akɛ, “Yohane Baptisilɔ lɛ, ni mɛi komɛi kɛɔ akɛ Elia; ni mɛi komɛi hu kɛɔ akɛ, blema gbalɔi lɛ eko ete shi ekoŋŋ.”

²⁰ Ni ebi amɛ akɛ, “Shi nyɛ lɛ, namɔ nyɛkɛɔ akɛ mi ji?” Ni Petro to he ekɛɛ, “Nyɔŋmɔ Kristo lɛ.”

²¹ Shi etswa amɛnaa ma ni ewo amɛ akpɔ akɛ amɛkatsi tã amɛkɛɛ mɔ ko.

Yesu wie egbele kɛ eshitee he

²² Ni Yesu kɛɛ, “Ja Gbɔmɔ Bi lɛ na amanehulu babaoo, ni maŋ onukpai lɛ kɛ osɔfonukpai lɛ kɛ mlatsɔɔlɔi lɛ kwa lɛ, ni agbe lɛ, ni gbi ni ji etɛ̃ lɛ ete shi ekoŋŋ.”

Hekwamɔ

²³ Ni ekɛɛ mɛi lɛ fɛɛ akɛ, “Kɛji mɔ ko miisumɔ akɛ enyiɛ misɛɛ lɛ, ekwa ehe, ni ewo esɛŋmɔtso lɛ daa gbi ni enyiɛ misɛɛ.

²⁴ Ejaakɛ mɔ fɛɛ mɔ ni sumɔɔ akɛ ebaa esusuma yi lɛ, eeelaaje lɛ; shi mɔ ni laajeɔ esusuma yɛ mihewɔ lɛ, eeehere eyiwala.

²⁵ Ejaakɛ mɛɛ sɛɛ gbɔmɔ naa kɛji ena jeŋ muu lɛ fɛɛ, shi eshɛ ehe efɔ̃ aloo ekpãtã lɛ diɛŋtsɛ ehe hiɛ lɛ?

²⁶ Ejaakɛ mɔ fɛɛ mɔ ni mi kɛ miwiemɔi lɛ ahe feɔ lɛ hiɛgbele lɛ, lɛ hu ehe aaafee Gbɔmɔ Bi lɛ hiɛgbele, be ni eeeba yɛ lɛ diɛŋtsɛ enunyam lɛ kɛ eTsɛ nɔ lɛ kɛ bɔfoi krɔŋkrɔŋi lɛ anɔ lɛ mli lɛ.

²⁷ Shi miikɛɛ nyɛ anɔkwale akɛ mɛi komɛi yɛ mɛi ni damɔ biɛ nɛɛ ateŋ ni amɛsaŋ amɛnaa gbele kɛyaashi beyinɔ ni amɛaana Nyɔŋmɔ Maŋtsɛyeli lɛ.”

Yesu gbɔmɔtso su tsake

²⁸ Wiemɔi nɛɛ asɛɛ aaafee gbii kpaanyɔ lɛ Yesu ŋɔ Petro kɛ Yohane kɛ Yakobo, ni ekɛ amɛ tee gɔŋ ko nɔ ni eyasɔle.

²⁹ Be ni esɔleɔ lɛ, ehiɛ su tsake ni etade lɛ yɛ futaa ni ekpɛ kaŋkaŋ.

³⁰ Ni naa, hii enyɔ kɛ lɛ bawie, amɛ ji Mose kɛ Elia,

³¹ ni amɛbajie amɛhe kpo yɛ anunyam mli ni amɛwie ejeŋ naa ni ebaaya eyagbe yɛ Yerusalɛm lɛ he.

³² Shi wɔ ni tsii eŋɔ Petro kɛ mɛi ni fata ehe lɛ; ni be ni wɔ lɛ tserɛ yɛ amɛhiɛ kwraa lɛ, amɛna Yesu anunyam lɛ kɛ hii enyɔ lɛ ni damɔ emasɛi lɛ.

³³ Ni be ni hii lɛ kɛ lɛ gbalaa mli lɛ, Petro kɛɛ Yesu akɛ, “Nuŋtsɔ, ehi akɛ wɔhiɔ biɛ, ni hã ni wɔfee bui etɛ̃, onɔ ekome kɛ Mose nɔ ekome kɛ Elia nɔ ekome;” shi eleee nɔ ni ekɛɔ lɛ.

³⁴ Be ni ewieɔ enɛ lɛ atatu ba bakete amɛnɔ; ni ekaselɔi lɛ she gbeyei be ni amɛbote atatu lɛ mli lɛ.

³⁵ Ni gbee ko jɛ atatu lɛ mli kɛɛ, “Mɔ nɛ ji mi-Bi ni mihala lɛ; nyɛboa lɛ toi!”

³⁶ Ni be ni gbee lɛ gbɛɛ lɛ, Yesu kome too ana. Ni amɛfee dioo, ni nɛkɛ bei nɛɛ amli lɛ amɛgbaaa mɔ ko nii ni amɛna lɛ eko.

Yesu tsa gbekɛ nuu ko ni mumɔ fɔ̃ŋ yɔɔ emli

³⁷ Enɔ jetsɛremɔ be ni amɛjeɔ gɔŋ lɛ nɔ amɛkpelekeɔ shi lɛ, mɛi pii kɛ lɛ bakpe.

³⁸ Ni nuu ko jɛ mɛi lɛ ateŋ bo ekɛɛ, “Tsɔɔlɔ, miikpa bo fai, kwɛmɔ mibi lɛ, shi mibi kome ji lɛ.

³⁹ Mumɔ ko mɔɔ lɛ, ni ekpakpa ko dani ejeɔ emli.

⁴⁰ Mikpa okaselɔi lɛ fai koni amɛfã lɛ lɛ, amɛnyɛɛɛ.”

⁴¹ Ni Yesu here nɔ ekɛɛ, “Ao yinɔbii ni heee yeee ni bɛ amɛŋɛlɛnɔ! Mɛɛ beyinɔ mikɛ nyɛ aaahi shi, ni mato mitsui shi mahã nyɛ kɛyashi? Kɛ obi lɛ aba biɛ!”

⁴² Be ni ebaa ni eshɛko eŋɔɔ lɛ, mumɔ fɔŋ lɛ too lɛ etswa shi ni ehã eshɔ̃, shi Yesu fã mumɔ fɔ̃ŋ lɛ yi, ni etsa gbekɛ lɛ, ni eŋɔ lɛ ehã etsɛ lɛ ekoŋŋ.

⁴³ Ni amɛ fɛɛ amɛnaa kpɛ amɛhe yɛ Nyɔŋmɔ hewalɛ kpeteŋkple lɛ hewɔ. Shi be ni mɛi lɛ fɛɛ ahiɛ efee amɛ yaa yɛ nibii fɛɛ ni Yesu fee lɛ he lɛ, ekɛɛ ekaselɔi lɛ akɛ,

Yesu wie egbele lɛ he ekoŋŋ

⁴⁴ “Nyɛ lɛ nyɛhãa nɛkɛ wiemɔi nɛɛ ayaa nyɛtoiiaŋ; ejaakɛ aaaŋɔ Gbɔmɔ Bi lɛ awo gbɔmɛi adɛŋ.”

⁴⁵ Shi amɛ lɛ amɛnaaa wiemɔ nɛɛ shishi, ni akɛtee amɛ ni amɛkayoo sɛɛ, ni amɛmiishe gbeyei akɛ amɛaabi lɛ wiemɔ nɛɛ he nɔ ko.

Namɔ ji agbo fe fɛɛ?

⁴⁶ Shi ŋwanejee ko bate shi yɛ amɛteŋ akɛ namɔ ji agbo fe fɛɛ yɛ amɛteŋ.

⁴⁷ Be ni Yesu na amɛtsuiiaŋ susumɔi lɛ, ekɛ gbekɛ fioo ko badamɔ emasɛi;

⁴⁸ ni ekɛɛ amɛ akɛ, “Mɔ fɛɛ mɔ ni hereɔ gbekɛ fioo nɛɛ yɛ migbɛi mli lɛ, ehereɔ mi; ni mɔ ni hereɔ mi lɛ, ehereɔ mɔ ni tsu mi lɛ; ejaakɛ mɔ ni ji bibioo yɛ nyɛ fɛɛ nyɛteŋ lɛ, lɛ ji agbo fe fɛɛ.”

Mɔ ni eteee shi ewooo nyɛ lɛ eyɛ nyɛgbɛfaŋ

⁴⁹ Ni Yohane here nɔ ekɛɛ, “Nuŋtsɔ, wɔna mɔ ko kɛ ogbɛi miifa mumɔi fɔ̃ji, ni wɔtsi lɛ gbɛ, ejaakɛ ebɛ wɔ mɛi ni wɔnyiɛ osɛɛ lɛ ateŋ.”

⁵⁰ Ni Yesu kɛɛ lɛ akɛ, “Nyɛkatsia lɛ gbɛ, ejaakɛ mɔ ni eteee shi ewooo nyɛ lɛ, eyɛ nyɛgbɛfaŋ.”

Samaria maŋ ko ni hereee Yesu lɛ

⁵¹ Be ni gbii ni abaaŋɔ Yesu lɛ kɛya ŋwɛi lɛ eshɛ etã lɛ, eŋmɔ eyiŋ kpɔ akɛ eeya Yerusalɛm.

⁵² Ni etsu bɔfoi kɛtsɔ̃ ehiɛ; ni amɛtee amɛyabote Samariabii amaŋ ko mli, koni amɛsaa he ko amɛto lɛ.

⁵³ Shi amɛhereee lɛ, ejaakɛ eeya Yerusalɛm.

⁵⁴ Ni be ni Yakobo kɛ Yohane, ekaselɔi lɛ, na enɛ lɛ, amɛkɛɛ, “Nuŋtsɔ, oosumɔ akɛ wɔkɛɛ ni la ajɛ ŋwɛi aba abashã amɛ?”

⁵⁵ Shi etsɔ̃ ehe ni ebɔ amɛ kɔkɔ [ni ekɛɛ, “Ani nyɛleee nɔ mumɔ ni nyɛhiɛ lɛ lo?

⁵⁶ Gbɔmɔ Bi lɛ baaa gbɔmɛi asusumai ahiɛkpãtãmɔ, shi moŋ amɛyiwalaheremɔ eba.”] Ni amɛtee maŋ kroko mli.

Mɛi ni taoɔ Yesu sɛɛ anyiɛ

⁵⁷ Be ni amɛnyiɛ gbɛ lɛ nɔ kɛyaa lɛ mɔ ko bakɛɛ lɛ akɛ, “Nuŋtsɔ, manyiɛ osɛɛ kɛaatee he fɛɛ he ni oyaa.”

⁵⁸ Ni Yesu kɛɛ lɛ akɛ, “Osɔi yɛ bui, ni ŋwɛi loofɔji hu yɛ tsui; shi Gbɔmɔ Bi lɛ bɛ he ni ekɛ eyitso ŋmɛɔ.”

⁵⁹ Ni ekɛɛ mɔ kroko akɛ, “Nyiɛmɔ misɛɛ!” Shi lɛ lɛ ekɛɛ, “Nuŋtsɔ; ŋmɛɛ mi gbɛ ni maya mayafu mitsɛ dã.”

⁶⁰ Ni Yesu kɛɛ lɛ akɛ, “Hã ni gbohii afu amɛgbohii, shi bo lɛ yaa ni oyashiɛ Nyɔŋmɔ Maŋtsɛyeli lɛ!”

⁶¹ Ni mɔ kroko hu kɛɛ, “Manyiɛ osɛɛ, Nuŋtsɔ; shi ŋmɛɛ mi gbɛ ni maya mayashɛ mɛi ni yɔɔ miwe lɛ dã.”

⁶² Shi Yesu kɛɛ lɛ akɛ, “Mɔ ni kɛ enine yamɔɔ tsina kɔi mli ni ekuɔ ekuɛ ekwɛɔ esɛɛ lɛ, esaaa Nyɔŋmɔ Maŋtsɛyeli lɛ.”