Luka 5 - ŊMALƐ KRƆŊKRƆŊ LƐ

Kaselɔi ni atsɛ klɛŋklɛŋ lɛ

¹ Gbi ko be ni Yesu damɔ Genesaret Kpaakpo lɛ naa ni mɛi pii jwere enɔ amɛboɔ Nyɔŋmɔ wiemɔ lɛ toi lɛ,

² ena lɛji enyɔ ŋmɔlɔ shi yɛ kpaakpo lɛ naa; wolɛi lɛ eje mli ni amɛmiifɔ amɛyai ahe.

³ Ni Yesu yabote lɛlɛ lɛ ekome ni ji Simon nɔ lɛ mli, ni ekpa lɛ fai akɛ etsi kɛya nu lɛ hiɛ fioo; ni Yesu ho eta shi, ni etsɔ̃ɔ mɛi lɛ anii kɛjɛ lɛlɛ lɛ mli.

⁴ Be ni egbe ewiemɔ lɛ naa lɛ, ekɛɛ Simon akɛ, “Nyɛwiria kɛyaa he ni kwɔ lɛ ni nyɛyafɔa nyɛyai lɛ, koni nyɛgbe loo.”

⁵ Ni Simon here nɔ ni ekɛɛ lɛ akɛ, “Onukpa, wɔtsu nii waa nyɔɔŋ nɛɛŋ fɛɛ ni wɔnaaa nɔ ko; shi kɛ̃lɛ owiemɔ lɛ naa lɛ maŋmɛ yai lɛ.”

⁶ Ni be ni amɛfee nakai lɛ, amɛgbe loo babaoo bɔ ni amɛyai lɛ bɔ̃i gbalamɔ.

⁷ Ni amɛfɔ̃ amɛnanemɛi ni yɔɔ lɛlɛ kroko lɛ mli lɛ nine akɛ amɛba ni amɛbawa amɛ. Ni amɛba ni amɛwo lɛji enyɔ lɛ fɛɛ obɔ̃bɔ̃ kɛ loo ni amɛmiihe amɛshiu.

⁸ Shi be ni Simon Petro na lɛ, eho ekula Yesu naji anaa, ni ekɛɛ, “Nuŋtsɔ, jee mimasɛi; ejaakɛ gbɔmɔ eshafeelɔ ji mi!”

⁹ Ni ekɛ mɛi ni fata ehe lɛ fɛɛ ahe jɔ̃ amɛhe yɛ loo pii ni amɛgbe lɛ hewɔ;

¹⁰ ni nakai nɔŋŋ Yakobo kɛ Yohane, Zebedeo bii lɛ ni ji Simon hefatalɔi lɛ, hu ahe jɔ̃ amɛhe. Ni Yesu kɛɛ Simon akɛ, “Kaashe gbeyei! Kɛjɛ be nɛɛ nɔ kɛyaa nɛɛ obaahɛ gbɔmɛi.”

¹¹ Ni be ni amɛbakpeleke lɛ amɛshi nɔ fɛɛ nɔ ni amɛbanyiɛ esɛɛ.

Kpitiyelɔ ko tsamɔ

¹² Gbi ko lɛ Yesu yɛ maŋ lɛ eko mli, kɛkɛ lɛ naa nuu ko ni kpiti eshwie ehe kɛjɛ ŋwɛi kɛyi shi. Be ni ena Yesu lɛ, ekɛ ehiɛ bu shi ni ekpa lɛ fai ekɛɛ, “Nuŋtsɔ, kɛji oosumɔ lɛ, ooonyɛ ohã mihe atse.”

¹³ Ni Yesu kpã enine mli eta ehe ni ekɛɛ, “Miisumɔ, ohe atse!” Ni amrɔ lɛ kpiti lɛ tã yɛ ehe.

¹⁴ Ni etswa enaa ma akɛ, “Kaakɛɛ mɔ ko, shi moŋ yaa ni okɛ ohe ayatsɔ̃ɔ osɔfo lɛ, ni oyashã afɔle yɛ ohetsemɔ lɛ hewɔ tamɔ bɔ ni Mose to lɛ, koni no afee odase ahã amɛ.”

¹⁵ Shi babaoo ni ehe sane lɛ gbɛ shwã moŋ ji no, ni mɛi pii babuaa amɛhe naa ni amɛbabo lɛ toi, ni etsa amɛhelai lɛ.

¹⁶ Shi egbalaa ehe shi kɛyaa ŋa nɔ ni eyasɔleɔ.

Kuumɔhelatsɛ ko tsamɔ

¹⁷ Agbɛnɛ gbi lɛ eko be ni etsɔ̃ɔ nii lɛ, Farisifoi kɛ mlatsɔɔlɔi ni jɛ Galilea kɛ Yudea maji lɛ fɛɛ nɔ kɛ Yerusalɛm ba lɛ tara jɛi; ni ajie Nuŋtsɔ lɛ hewalɛ ni ekɛtsáa mɔ lɛ kpo yɛ jɛi.

¹⁸ Mɛi komɛi kɛ nuu ko ni kã saa nɔ ni ekumɔ ba; ni amɛmiitao akɛ amɛkɛ lɛ aba shĩa lɛ ni amɛkɛ lɛ abaŋmɛ ehiɛ.

¹⁹ Ni be ni amɛnaaa bɔ ni amɛaafee ni amɛkɛ lɛ aba ehiɛ yɛ asafo lɛ hewɔ lɛ, amɛkwɔ kɛtee tsu lɛ yiteŋ, ni amɛshiu lɛ kɛ esaa lɛ kɛtsɔ̃ ntayai lɛ amli kɛyaŋmɛ amɛteŋ yɛ Yesu hiɛ.

²⁰ Be ni Yesu na amɛhemɔkɛyeli lɛ ekɛɛ helatsɛ lɛ akɛ, “Naanyo, akɛ ohe eshai lɛ efa bo.”

²¹ Ni mlatsɔɔlɔi lɛ kɛ Farisifoi lɛ bɔ̃i susumɔ akɛ, “Namɔ ji mɔ nɛ ni wieɔ musubɔɔ wiemɔ nɛɛ? Namɔ aaanyɛ ekɛ eshai afa akɛ ja Nyɔŋmɔ koome pɛ.”

²² Shi be ni Yesu yoo amɛsusumɔi lɛ, ehere nɔ ekɛɛ amɛ akɛ, “Mɛni nyɛsusuɔ yɛ nyɛtsuii amli lɛ?

²³ Te nɔ ni kɛɛmɔ jaraaa hu, ‘Akɛ ohe eshai efa bo’ aloo ‘Tee shi ni onyiɛ’ lɛ?

²⁴ Shi be ni afee ni nyɛle akɛ Gbɔmɔ Bi lɛ yɛ hegbɛ yɛ shikpɔŋ lɛ nɔ akɛ ekɛ eshai faa lɛ” — ekɛɛ mɔ ni ekumɔ lɛ akɛ, “Miikɛɛ bo akɛ tee shi ni owo osaa lɛ ni oya owe!”

²⁵ Ni amrɔ lɛ nuu lɛ te shi yɛ amɛ fɛɛ amɛhiɛ, ni ewo nɔ ni ekã nɔ lɛ, ni eyiŋ etee lɛ diɛŋtsɛ ewe, ni ehiɛ Nyɔŋmɔ hiɛ nyam woo.

²⁶ Ni amɛ fɛɛ amɛnaa kpɛ amɛhe, ni amɛwo Nyɔŋmɔ hiɛ nyam, ni amɛshe gbeyei naakpa ni amɛkɛɛ, “Wɔna naakpɛɛnii ŋmɛnɛ!”

Levi tsɛmɔ

²⁷ Nii nɛɛ asɛɛ lɛ Yesu je kpo, ni eyana toohelɔ ko ni atsɛɔ lɛ Levi ni eta toohemɔhe lɛ, ni ekɛɛ lɛ akɛ, “Nyiɛmɔ misɛɛ!”

²⁸ Ni Levi shi nɔ fɛɛ nɔ, ni ete shi ebanyiɛ esɛɛ.

²⁹ Ni Levi ŋmɛ lɛ okplɔ̃ kpeteŋkple yɛ ewe lɛ, ni toohelɔi kɛ mɛi krokomɛi pii kɛ amɛ baye nii.

³⁰ Ni Farisifoi lɛ kɛ amɛmlatsɔ̃ɔlɔi lɛ wie ekaselɔi lɛ ahe huhuuhu ni amɛkɛɛ, “Mɛni hewɔ nyɛkɛ toohelɔi kɛ eshafeelɔi yeɔ nii ni nyɛkɛ amɛ nuɔ nii nɛɛ?”

³¹ Ni Yesu to he ni ekɛɛ amɛ akɛ, “Mɛi ni yɔɔ kpiŋtiŋkpliŋŋ lɛ ehiaaa amɛ tsofatsɛ, shi mɛi ni he yeɔ lɛ moŋ ehia.

³² Mibaaa jalɔi atsɛmɔ, shi moŋ miba eshafeelɔi atsɛmɔ koni amɛtsake amɛtsui.”

Ŋmaahilɛ he sane

³³ Ni amɛkɛɛ lɛ akɛ, “Yohane kaselɔi lɛ fɔɔ ŋmaahilɛ kɛ sɔlemɔ, ni Farisifoi lɛ akaselɔi lɛ hu feɔ nakai nɔŋŋ, ni bo lɛ okaselɔi lɛ yeɔ nii ni amɛnuɔ nii.”

³⁴ Shi ekɛɛ amɛ akɛ, “Ani nyɛaanyɛ nyɛhã yookpeemɔ he bialɔi lɛ ahi ŋmaa, be ni ayɛmforowu lɛ kɛ amɛ yɔɔ lolo lɛ?

³⁵ Shi gbii aaaba ni aaaŋɔ ayɛmforowu lɛ kɛaajɛ amɛŋɔɔ, ni no mli dani amɛaahi ŋmaa.”

³⁶ Ni ebu amɛ abɛ hu ekɛɛ, “Mɔ ko gbaaa mama hee naa ekɛtaaa atade momo; kɛji efee nakai lɛ, eeegbala ehee lɛ, ni mamanaa hee lɛ kɛ atade momo lɛ yeŋ.

³⁷ Ni mɔ ko kɛ wain hee wooo wolo tɔi memeji amli, kɛ efee nakai lɛ, wain hee lɛ aaaflɛ wolo tɔi lɛ ni eeeshwie shi, ni wolo tɔi lɛ hu aaafite.

³⁸ Shi wain hee lɛ, wolo tɔi hei amli akɛwoɔ.

³⁹ Asaŋ mɔ ko enuuu wain momo ni amrɔ nɔŋŋ ni etao ehee, ejaakɛ ekɛɔ akɛ, ‘Emomo lɛ hi.’ ”