Luka 19 - ŊMALƐ KRƆŊKRƆŊ LƐ

Yesu kɛ Zakeo

¹ Yesu yabote Yeriko ni eefoŋ.

² Ni nuu ko yɛ jɛi ni atsɛɔ lɛ Zakeo, ni toohelɔ nukpa ji lɛ, ni ena nii hu.

³ Ni eetao Yesu ena ni ele lɛ, shi mɛi pii lɛ ahewɔ lɛ enyɛɛɛ, ejaakɛ gbɔmɔ kpitioo ji lɛ.

⁴ Ni esha foi kɛtsɔ̃ hiɛ, ni eyakwɔ agbãmitso koni ena lɛ, ejaakɛ jɛi gbɛ ebaatsɔ̃.

⁵ Ni be ni Yesu shɛ jɛi lɛ, ewo ehiɛ nɔ ni ena lɛ, ni ekɛɛ lɛ akɛ, “Zakeo, ohe afee oya ni okpeleke shi, ejaakɛ owe lɛ sa akɛ mato ŋmɛnɛ.”

⁶ Ni ehe fee oya ni ekpeleke shi, ni ehere lɛ atuu.

⁷ Ni be ni mɛi na lɛ, amɛ fɛɛ amɛwie huhuuhu amɛkɛɛ, “Eyato nuu eshafeelɔ ŋɔɔ.”

⁸ Shi Zakeo ho damɔ shi ni ekɛɛ Nuŋtsɔ lɛ akɛ, “Nuŋtsɔ, naa, miiŋɔ minii fã make ohiafoi, ni kɛji mikɛ yaka naafolɔmɔ eshɔ̃ mɔ ko nɔ ko yɛ edɛŋ lɛ, miiku mabɔ he toi ejwɛ mahã lɛ.”

⁹ Yesu kɛɛ lɛ akɛ, “Ŋmɛnɛ yiwalaheremɔ eba shĩa nɛɛ, akɛni lɛ hu Abraham bi ji lɛ lɛ.

¹⁰ Ejaakɛ Gbɔmɔ Bi lɛ ba nɔ ni elaaje lɛ taomɔ kɛ eyiwalaheremɔ.”

Menai nyɔŋma lɛ he abɛ lɛ

¹¹ Shi be ni amɛboɔ nii nɛɛ toi lɛ, ebu abɛ ko eshi nɔ, ejaakɛ ebɛŋkɛ Yerusalɛm ni amɛsusu akɛ amrɔ lɛ nɔŋŋ Nyɔŋmɔ Maŋtsɛyeli lɛ baapue.

¹² No hewɔ lɛ, ekɛɛ, “Ablade ko dom etee maŋsɛɛ shɔŋŋ ni eyaŋɔ emaŋtsɛyeli ni eku esɛɛ eba.

¹³ Ni etsɛ etsuji nyɔŋma, ni ejie menai nyɔŋma ehã amɛ, ni ekɛɛ amɛ akɛ, ‘Nyɛtsɔ̃mɔa he kɛyashi maba.’

¹⁴ Shi emaŋbii lɛ nyɛ lɛ, ni amɛtsu bɔfoi kɛnyiɛ esɛɛ ni amɛyakɛɛ akɛ, ‘Wɔsumɔɔɔ ni mɔ nɛ abaye wɔnɔ maŋtsɛ.’

¹⁵ “Ni eba mli akɛ, be ni enine eyashɛ maŋtsɛyeli lɛ nɔ ni eku esɛɛ eba lɛ, efã akɛ atsɛ tsuji lɛ ni ekɛ shika lɛ hã lɛ kɛba, koni ena nɔ ni amɛteŋ mɔ fɛɛ mɔ ena yɛ hetsɔ̃ɔmɔ lɛ mli.

¹⁶ Klɛŋklɛŋ mɔ lɛ ba ni ebakɛɛ, ‘Nuŋtsɔ, omena lɛ efɔ menai nyɔŋma ewoŋ.’

¹⁷ Ni ekɛɛ lɛ akɛ, ‘Aekoo tsulɔ kpakpa! Akɛni oye anɔkwa yɛ nɔ ko bibioo mli hewɔ lɛ, ye maji nyɔŋma anɔ.’

¹⁸ Ni mɔ ni ji enyɔ lɛ ba ebakɛɛ, ‘Nuŋtsɔ, omena lɛ efɔ menai enumɔ ewoŋ.’

¹⁹ Ni lɛ hu ekɛɛ lɛ akɛ, ‘Bo hu ye maji enumɔ anɔ.’

²⁰ Ni mɔ kroko hu ba ebakɛɛ, ‘Nuŋtsɔ, naa, omena lɛ ni mifi miwo mama naa kɛto lɛ nɛ;

²¹ miyashe bo gbeyei, ejaakɛ yiwalɔ ji bo, okɔɔ nɔ ni okɛfɔ̃ko shi, ni okpaa nɔ ni oduko.’

²² Shi ablade lɛ kɛɛ akɛ, ‘Tsulɔ fɔ̃ŋ, bo diɛŋtsɛ odaaŋ wiemɔ mikɛaakojo bo! Ni ole akɛ yiwalɔ ji mi, ni mikɔɔ nɔ ni mikɛfɔ̃ko shi, ni mikpaa nɔ ni miduko lɛ,

²³ mɛɛ hewɔ mɔ ni okɛ mishika lɛ eyawooo shikatoohe lɛ, koni kɛ miba lɛ, ni mibahe minii kɛ ehekpa?’

²⁴ Ni ekɛɛ mɛi ni damɔ emasɛi lɛ akɛ, ‘Nyɛshɔ̃a mena lɛ yɛ edɛŋ, ni nyɛkɛhãa mɔ ni yɔɔ menai nyɔŋma lɛ.’

²⁵ Ni amɛkɛɛ lɛ akɛ, ‘Nuŋtsɔ, eyɛ menai nyɔŋma.’

²⁶ ‘Eyɛ mli nakai, shi miikɛɛ nyɛ akɛ, mɔ fɛɛ mɔ ni yɔɔ nɔ ko lɛ, lɛ nɔŋŋ aaahã; shi mɔ ni bɛ nɔ ko lɛ, nɔ ni eyɔɔ lɛ tete aaashɔ̃ yɛ edɛŋ.’

²⁷ “Shi nakai mihenyɛlɔi lɛ ni sumɔɔɔ akɛ miye amɛnɔ maŋtsɛ lɛ, nyɛkɛ amɛ abaa biɛ ni nyɛbagbea amɛ yɛ mihiɛ nɛɛ!”

Yesu Yerusalɛm botemɔ

²⁸ Ni be ni ewie nɛkɛ lɛ, eho eyi hiɛ kɛmiiya Yerusalɛm.

²⁹ Be ni ebɛŋkɛ Betfage kɛ Betania yɛ gɔŋ ni atsɛɔ lɛ Mugɔŋ lɛ he lɛ, etsu ekaselɔi lɛ ateŋ mɛi enyɔ,

³⁰ ekɛɛ, “Nyɛyaa akrowa ni tua nyɛhiɛ lɛ mli, ni kɛ nyɛbote mli lɛ nyɛaana tejibi ni mɔ ko tako enɔ pɛŋ ŋmɔ shi yɛ jɛi; nyɛfɛnea lɛ ni nyɛkɛ lɛ abaa.

³¹ Ni kɛji mɔ ko bi nyɛ akɛ, ‘Mɛɛba nyɛfɛneɔ lɛ?’ lɛ, nyɛkɛa lɛ akɛ, ‘Ehe miihia Nuŋtsɔ lɛ.’ ”

³² Ni mɛi ni atsu lɛ yiŋ amɛtee, ni amɛyana tamɔ bɔ ni ekɛɛ amɛ lɛ.

³³ Shi be ni amɛfɛneɔ tejibi lɛ, mɛi anɔ ni ji lɛ bi amɛ akɛ, “Mɛɛba nyɛfɛneɔ tejibi lɛ?”

³⁴ Ni amɛkɛɛ, “Ehe miihia Nuŋtsɔ lɛ.”

³⁵ Ni amɛkɛ lɛ ba Yesu ŋɔɔ, ni amɛkɛ amɛtadei shwie tejibi lɛ nɔ, ni amɛwo Yesu amɛta nɔ.

³⁶ Ni be ni eyaa lɛ, amɛkɛ amɛtadei ha gbɛ lɛ nɔ.

³⁷ Ni be ni ebɛŋkɛ he ni akpelekeɔ Mugɔŋ lɛ yɛ lɛ, ekaselɔi asafo muu lɛ fɛɛ bɔ̃i nyamɔ ni amɛkɛ gbee ni wa jie Nyɔŋmɔ yi, yɛ hewalɛ nitsumɔi fɛɛ ni amɛna lɛ hewɔ,

³⁸ amɛkɛɛ, “Ajɔɔ maŋtsɛ ni baa yɛ Nuŋtsɔ lɛ gbɛi mli lɛ! Hejɔlɛ yɛ ŋwɛi, ni anunyam yɛ ŋwɛi flooflo!”

³⁹ Ni Farisifoi lɛ ateŋ mɛi komɛi jɛ asafo lɛ mli kɛɛ lɛ akɛ, “Tsɔɔlɔ, kã okaselɔi lɛ.”

⁴⁰ Ni ehere nɔ ekɛɛ amɛ akɛ, “Miikɛɛ nyɛɛ akɛ, kɛji mɛnɛɛmɛi aaamua amɛnaa lɛ, no lɛ tɛi aaabolɔ.”

⁴¹ Ni be ni eshɛ etã ni ena maŋ lɛ, efo eshwie enɔ,

⁴² ni ekɛɛ, “Eji yɛ ogbi nɛɛ nɔ lɛ ona ole nii ni hi hã ohejɔlɛ lɛ kulɛ! Shi agbɛnɛ akɛtee bo.

⁴³ Shi gbii miiba, ni ohenyɛlɔi lɛ aaatsa bu awo ohe, ni amɛaabɔle bo kpula ni amɛaasa oyi yɛ he fɛɛ he,

⁴⁴ ni amɛaaŋɔ bo amɛtswa shi kɛ obii ni yɔɔ omli lɛ, ni amɛshiŋ tɛ kome yɛ ekroko nɔ yɛ omli, ejaakɛ oyooo oduromɔ saramɔbe lɛ!”

Yesu tsuu Sɔlemɔ we lɛ he

⁴⁵ Ni Yesu tee Sɔlemɔ we lɛ ni ebɔ̃i mɛi ni hɔ̃ɔ nii kɛ mɛi ni heɔ nii yɛ jɛi lɛ shwiemɔ,

⁴⁶ ekɛɛ amɛ akɛ, “Aŋma akɛ, ‘Miwe lɛ Sɔlemɔ we ni’; shi nyɛ lɛ nyɛkɛfee ojotswalɔi abu.”

⁴⁷ Ni etsɔ̃ɔ nii daa nɛɛ yɛ Sɔlemɔ we lɛ; shi osɔfonukpai lɛ kɛ mlatsɔɔlɔi lɛ kɛ maŋ lɛ mli hiɛnaanɔbii lɛ miitao ehiɛ amɛkpãtã;

⁴⁸ shi amɛnaaa bɔ ni amɛaafee, ejaakɛ maŋ muu lɛ fɛɛ kpɛtɛ lɛ ni amɛboɔ lɛ toi.