Luka 17 - ŊMALƐ KRƆŊKRƆŊ LƐ

Nanetɔ̃tɔ̃mɔ

¹ Yesu kɛɛ ekaselɔi lɛ akɛ, “Be fɛɛ be ni fee lɛ nibii ni hãa nane tɔ̃tɔ̃ɔ baaba; shi kpoo hã mɔ ni etsɔ̃ɔ enɔ kɛbaa lɛ!

² Aaawa ahã lɛ fe nɔ ni akɛ teji wiɛ ŋmɔ ekuɛ ni ayashɛ lɛ afɔ̃ ŋshɔŋ kɛji mɔ ko tɔ̃tɔ̃ bibii nɛɛ ateŋ mɔ kome nane lɛ.”

Mɔ kɛ enyɛmi ni etɔ̃ enɔ teŋ saamɔ

³ “Nyɛkwɛa nyɛhe ni ahia! Kɛji onyɛmi tɔ̃ onɔ lɛ, kã ehiɛ; ni kɛji eshwa ehe lɛ kɛfa lɛ.

⁴ Ni kɛji etɔ̃ onɔ shii kpawo gbi kome, ni shii kpawo hu gbi kome esaa eku esɛɛ kɛba oŋɔɔ ni ekɛɛ, ‘Mishwa mihe’ lɛ, kɛfa lɛ.”

Hemɔkɛyeli

⁵ Ni bɔfoi lɛ kɛɛ Nuŋtsɔ lɛ akɛ, “Fatamɔ wɔhemɔkɛyeli he ohã wɔ!”

⁶ Shi Nuŋtsɔ lɛ kɛɛ, “Kɛji nyɛyɛ hemɔkɛyeli tamɔ sinapi wu kuli lɛ, kulɛ nyɛaakɛɛ oduŋ nɛɛ akɛ, ‘Fãa kɛ oshishifãi ni oyama ŋshɔŋ!’ Ni eeebo nyɛ toi.”

Tsulɔ gbɛnaa nitsumɔ

⁷ “Shi nyɛteŋ namɔ yɔɔ tsulɔ ni ekɛ tsina kɔi miihu aloo eekwɛ kooloi, ni kɛji ejɛ ŋmɔshi eba pɛ lɛ, eeekɛɛ lɛ akɛ, ‘Baata shi mramra ni oye nii,’

⁸ shi ekɛŋ lɛ moŋ akɛ, ‘Too nii ohã mi ni omĩa koni osɔ̃mɔ mi kɛyashi maye nii ni manu nɔ ko; no sɛɛ koni bo hu oye nii ni onu nɔ ko lo?’

⁹ Ani eeeda nakai tsulɔ lɛ shi akɛ efee nɔ ni afã lɛ lɛ? Mikpaaa shi.

¹⁰ Nakai nɔŋŋ nyɛ hu, kɛ nyɛfee nibii fɛɛ ni afã nyɛ lɛ, nyɛkɛa akɛ, ‘Tsuji ni he bɛ sɛɛnamɔ ko ji wɔ; nɔ ni ji wɔgbɛnaa akɛ wɔtsuɔ lɛ, no pɛ wɔtsu nɛɛ.’ ”

Kpitiyelɔi nyɔŋma lɛ atsamɔ

¹¹ Ni eba mli akɛ, be ni enyiɛ gbɛ kɛyaa Yerusalɛm lɛ, eyatsɔ̃ Samaria kɛ Galilea teŋ.

¹² Ni be ni eyabote maŋ ko mli lɛ, hii kpitiyelɔi nyɔŋma kɛ lɛ kpe; ni amɛdamɔ sɛɛ flɛŋŋ,

¹³ ni amɛwo amɛgbee nɔ amɛkɛɛ, “Nuŋtsɔ Yesu, naa wɔ mɔbɔ!”

¹⁴ Ni be ni ena amɛ lɛ, ekɛɛ amɛ akɛ, “Nyɛyaa nyɛkɛ nyɛhe ayatsɔ̃a osɔfoi lɛ.” Ni eba mli akɛ, be ni amɛyaa lɛ, amɛhe tã.

¹⁵ Shi amɛteŋ mɔ kome lɛ, be ni ena akɛ atsa lɛ lɛ, eku esɛɛ kɛba, ni ekɛ gbee ni wa bawo Nyɔŋmɔ hiɛ nyam.

¹⁶ Ni ekɛ ehiɛ babu shi yɛ Yesu najianaa ni eda lɛ shi. Shi mɔ nɛ lɛ Samarianyo ni.

¹⁷ Ni Yesu here nɔ ekɛɛ, “Ani jeee mɛi nyɔŋma he tã lɛ? Shi mɛi nɛɛhu lɛ, nɛgbɛ amɛyɔɔ?

¹⁸ Aso anaaa amɛteŋ mɔ ko ni kuɔ esɛɛ ekɛ anunyam bahãa Nyɔŋmɔ, akɛ ja maŋsɛɛnyo nɛɛ?

¹⁹ Ni ekɛɛ lɛ akɛ, ‘Tee shi ni oya; ohemɔkɛyeli etsa bo!’ ”

Nyɔŋmɔ maŋtsɛyeli lɛ, eyɛ nyɛteŋ

²⁰ Ni Farisifoi lɛ bi lɛ akɛ, “Te be ni Nyɔŋmɔ maŋtsɛyeli lɛ baaba lɛ?” Eto he ehã amɛ akɛ, “Nyɔŋmɔ maŋtsɛyeli lɛ baaa tamɔ nɔ ko ni anaa;

²¹ ni asaŋ amɛkɛŋ akɛ, ‘Naa, eyɛ biɛ! Loo biɛ!’ Ejaakɛ naa, Nyɔŋmɔ maŋtsɛyeli lɛ eyɛ nyɛteŋ.”

Gbɔmɔ Bi lɛ gbi lɛ

²² Ni Yesu kɛɛ ekaselɔi lɛ akɛ, “Gbii aaaba ni nyɛaashwe ni nyɛna Gbɔmɔ Bi lɛ gbii lɛ ekome, ni nyɛnaŋ.

²³ Ni amɛaakɛɛ nyɛ akɛ, ‘Naa, eyɛ biɛ loo eyɛ jɛi!’ Nyɛkayaa ni nyɛkanyiɛa sɛɛ.

²⁴ Ejaakɛ tamɔ bɔ ni kɛ srawa gba ni ekpɛɔ nyram kɛjɛɔ ŋwɛi afã kome kɛyaa afã kroko lɛ, nakai nɔŋŋ Gbɔmɔ Bi lɛ baatamɔ yɛ egbi lɛ nɔ.

²⁵ Shi klɛŋklɛŋ lɛ ja ena amanehulu babaoo ni nɛkɛ yinɔbii nɛɛ kwa lɛ.

²⁶ Ni bɔ ni eba yɛ Noa gbii lɛ amli lɛ nakai nɔŋŋ ebaaba yɛ Gbɔmɔ Bi lɛ gbii lɛ amli hu;

²⁷ amɛmiiyeyee nii, amɛmiinunuu dãi, amɛmiiŋɔŋɔɔ yei, ni akɛ yei miihãhãa gbãlã kɛyaashi gbi nɔ ni Noa bote adeka lɛ mli ni nu afua lɛ ba ni ebakpãtã amɛ fɛɛ kwa amɛhiɛ lɛ.

²⁸ Etamɔ bɔ ni eba yɛ Lot gbii lɛ amli hu lɛ, Amɛmiiyeyee nii, amɛmiinunuu dãi, amɛmiihehee nii amɛmiihɔ̃ɔhɔ̃ɔ nii, amɛmiitɛo tsei ni amɛmiimamɔmamɔɔ tsui;

²⁹ shi gbi nɔ ni Lot je Sodom lɛ, la kɛ swɔɔ nɛ kɛjɛ ŋwɛi, ni ekpãtã amɛ fɛɛ kwa amɛhiɛ.

³⁰ Nakai nɔŋŋ kɛ̃ ebaaba gbi ni aaajie Gbɔmɔ Bi lɛ kpo lɛ.

³¹ “Nakai gbi lɛ nɔ lɛ, mɔ ni yɔɔ tsu yiteŋ ni enii yɔɔ shĩa lɛ akakpleke shi ebakɔlɔ, ni mɔ ni yɔɔ ŋmɔshi hu akaku esɛɛ kɛmiiba.

³² Nyɛkaia Lot ŋa lɛ!

³³ Mɔ fɛɛ mɔ ni taoɔ akɛ ebaa ewala yi lɛ, eeelaaje lɛ; shi mɔ fɛɛ mɔ ni aaalaaje lɛ lɛ, eeehere eyiwala.

³⁴ Miikɛɛ nyɛ akɛ, nakai nyɔɔŋ lɛ mli lɛ mɛi enyɔ aaakãmɔ saa kome nɔ: aaaŋɔ mɔ kome, ni aaashi mɔ kome.

³⁵ Yei enyɔ aaawiɛ yɛ he kome, aaaŋɔ mɔ kome, ni aaashi mɔ kome.” [

³⁶ Mɛi enyɔ aaahi ŋmɔshi, aaaŋɔ mɔ kome, ni aaashi mɔ kome.]

³⁷ Ni amɛhere nɔ amɛkɛɛ lɛ akɛ, “Nuŋtsɔ, nɛgbɛ?” Shi ekɛɛ amɛ akɛ, “He ni gbonyo kã lɛ, jɛi akpaŋai buaa amɛhe naa yɛ.”