Lalai 98 - ŊMALƐ KRƆŊKRƆŊ LƐ

Nyɔŋmɔ ji Je lɛ Nɔyelɔ

Lala ko.

¹ Oo, nyɛlaa lala hee nyɛhãa Yehowa, ejaakɛ efee naakpɛɛnii. Ejɛ lɛ diɛŋtsɛ ehewalɛ krɔŋŋ lɛŋ eye kunim ehã ehe.

² Yehowa ehã ale kunim ni eye lɛ; ejie edɛŋ yiwalaheremɔ lɛ kpo faŋŋ etsɔ̃ɔ yɛ majimaji lɛ ahiɛ.

³ Ekai esuɔmɔ ni tsakeee lɛ kɛ enɔkwayeli ni eyɔɔ hã Israel we lɛ. Je lɛ naagbeehei fɛɛ ena kunim ni wɔNyɔŋmɔ lɛ ye lɛ.

⁴ Je lɛ fɛɛ, nyɛbɔa oshe kɛ miishɛɛ nyɛhãa Yehowa; nyɛlaa miishɛɛ lalai, nyɛlaa yijiemɔ lalai!

⁵ Nyɛkɛ kpãa saŋku alaa yijiemɔ lalai nyɛhãa Yehowa. Hɛɛ! Nyɛtswaa kpãa saŋku kɛ ŋɔɔmɔ.

⁶ Nyɛkpãa tɛtɛrɛmantɛrɛi, nyɛkpãa koofɛŋi! Ni nyɛkɛ miishɛɛ abɔa oshe yɛ wɔmaŋtsɛ Yehowa hiɛ!

⁷ Ŋshɔ ahũu kɛ emli nibii fɛɛ; je lɛ kɛ mɛi fɛɛ ni yɔɔ mli abɔ oshe!

⁸ Fai atswa amɛdɛ̃, ni gɔji bluublu ala kɛ miishɛɛ yɛ Yehowa hiɛ;

⁹ ejaakɛ eeba ebaye je lɛ nɔ maŋtsɛ. Ebaakojo je lɛ yɛ jalɛ naa, ni ebaakojo gbɔmɛi bɔ ni sa pɛ.